Գագիկ Հարությունյանը խախտել է «Հանրային ծառայության մասին» օրենքը. «Ժողովուրդ»

«Ժողովուրդ» օրաթերթը գրում է. «ՀՀ Սահմանադրական դատարանի նախագահ Գագիկ Հարությունյանի գույքի եւ եկամուտների մասին 2014 թվականի հայտարարագրի համաձայն՝ նրա անցած տարվա տարեկան եկամուտը կազմել է 13 միլիոն 503 հազար դրամ եւ հազար 440 եվրո: Այդ գումարից 12 միլիոն 498 հազար դրամը Գագիկ Հարությունյանի, որպես ՀՀ ՍԴ նախագահի, ստացած աշխատավարձն է, մնացած գումարը եւս ներկայացված է որպես աշխատավարձին հավասարեցված եկամուտ: ՍԴ նախագահը իր պաշտոնեական գործունեությունից բացի՝ իրավունք ունի զբաղվելու միայն մանկավարժական եւ գիտական վճարովի աշխատանքով: Տեղեկացնենք, որ Գագիկ Հարությունյանի դրամական միջոցները անցած տարվա վերջին կազմել են 6 միլիոն 300 հազար դրամ, 5 հազար 200 դոլար եւ 2 հազար 800 եվրո: Ի դեպ, ՍԴ նախագահն իր հայտարարագիրը ՀՀ բարձրաստիճան պաշտոնատար անձանց էթիկայի հանձնաժողովին է ներկայացրել փետրվարի 19-ին, իսկ «Հանրային ծառայության մասին» ՀՀ օրենքի համաձայն՝ նախորդ տարվա եկամուտների հայտարարագրի ներկայացման վերջնաժամկետը փետրվարի 15-ն է»:

Ավելի մանրամասն` թերթի այսօրվա համարում: