Հայաստանի հեռուստատեսության եւ ռադիոյի ազգային հանձնաժողովը, ինչպես միշտ, լիարժեքորեն չի կատարում իրեն վերապահված գործառույթները: Բանն այն է, որ ՀՌԱՀ-ը չի հետեւում, որպեսզի հեռուստաեթերում ապահովվի նաեւ սուրդո թարգմանությունը. խոսքը խուլուհամրերի համար թարգմանության մասին է: Սուրդո թարգմանության բացակայությունը զգացվում է հատկապես նախագահական ընտրությունների քարոզարշավի շրջանակներում, եւ ստացվում է, որ խուլուհամր մարդիկ, ըստ էության, զրկված են տեղեկանալու իրենց իրավունքից: «Ժողովուրդ»-ի հետ զրույցում ՀՌԱՀ հասարակայնության հետ կապերի եւ լրատվության վարչության ղեկավար Լիլիթ Գազազյանը, մեկնաբանելով ստեղծված իրավիճակը, ասաց. «ՀՌԱՀ-ը հետեւում է ու չի անտեսում: Հանրային հեռուստառադիոընկերությունը եւ ՀՀ-ում գործող այն մասնավոր հեռուստաընկերությունները, որոնք հեռարձակում են նաեւ մանկական եւ (կամ) լրատվական հեռուստահաղորդումներ, պարտավոր են իրենց ծրագրերում ապահովել խուլուհամր հանրության համար հնարավոր տեղեկատվության ստացման մատչելիությունը, օրվա եթերաժամում առնվազն մեկական մանկական եւ լրատվական հեռուստահաղորդում հեռարձակել սուրդո թարգմանությամբ կամ հայերեն լուսագրով»:
.gif)
