Հայաստանն ուզում է թույլատրել ՌԴ քաղաքացիների մուտքը երկիր` առանց արտասահմանյան անձնագրերի առկայության: Այսօր լրագրողների հետ զրույցում այդ մասին հայտնեց պետական միգրացիոն ծառայության ղեկավար Գագիկ Եգանյանը: Նա նշեց, որ տվյալ դեպքում մուտքի համար բավարար կլինի միայն ներքին անձնագիրը:
Եգանյանը հավելեց, որ կան նաև տեխնիկական ու իրավական ոչ բարդ հարցեր, որոնք, ամենայն հավանականությամբ կլուծվեն կարճ ժամկետներում:
«Մարդկանց հիմնական հոսքը մեր երկրում այսպես թե այնպես կապված է Ռուսաստանի հետ: Բնականաբար, եթե ռուսաստանցիները տեսնեն, որ Հայաստան գալը հեշտ է, նրանք ավելի հաճախ կցանկանան գալ»,- հայտարարեց Եգանյանը:
Նա հավելեց, որ ռուս զբոսաշրջիկների հաճախակի այցերը Հայաստան նաև նոր ներդրումների հնարավորություններ կստեղծեն:
.gif)
