ՀՀ ՊՆ-Ի ԳԻՏՈՒԹՅԱՄԲ ՆԱԽԿԻՆՈՒՄ ԱԶԱՏԱԶՐԿՎԱԾՆ ԱՌԱՋՆԱԳԻԾ Է ԳՆՈՒՄ

ՀԵՏԵՎԵՔ ՄԵԶ Telegram-ՈՒՄ

Արդեն տեւական ժամանակ է, ինչ կինոռեժիսոր Արշակ Զաքարյանը սոցիալական ցանցում հրապարակում է տեղեկություններ հայ-ադրբեջանական, ղարաբաղա-ադրբեջանական սահմանում տիրող իրավիճակի եւ, առհասարակ, ռազմական գործողությունների մասին: Ընդ որում, այդ տեղեկությունները երբեմն ուղեկցվում են լուսանկարներով եւ տեսանյութերով:

ՊՆ-ԻՑ ԱՌԱՋ ԸՆԿՆԵԼՈՎ
Ավելին՝ շատ հաճախ, մինչ ՀՀ ՊՆ լրատվական բաժինը կհայտնի, թե սահմանում ինչ իրավիճակ է, եւ քանի զոհ ունի հակառակորդը, Ա. Զաքարյանը սոցիալական ցանցում արդեն հրապարակում է իր տեղեկությունները: Դրանից հետո նոր ՊՆ-ն պաշտոնական հայտարարություն է տարածում՝ գրեթե նույն տեղեկությունը հրապարակելով: Դատելով այս համընկումներից, ամենայն հավանականությամբ, վերջինիս գործողությունները համաձայնեցված են ԼՂՀ ՊԲ-ի եւ ՀՀ Պն-ի հետ: Եթե այդպես է, ապա զարմանալի է ՊՆ-ի գործելաոճը. ինչո՞ւ է վստահում մի քաղաքացու, որը ԱՄՆ-ում կալանավորված է եղել, ինչո՞ւ է թույլ տալիս նրան գնալ, զինվորների հետ առաջնագծում ճաշել, ինֆորմացիա հավաքել, նկարել եւ հրապարակել: Արդյո՞ք նա ունի զինվորական այն աստիճանը, որ իրավունք ունի բանակային գաղտնիքների տիրապետել: Արդյո՞ք հայոց բանակում որեւէ մեկը կարող է չսափրված մտնել զինվորների մեջ ու «դուխ տալ»: Չէ որ սահմանն այն նուրբ ու զգայուն տեղն է, որտեղ ցանկացած տեղեկության արտահոսք կարող է մեր երկրի համար ողբերգական հետեւանքներ ունենալ: Ի վերջո, ՀՀ ՊՆ-ն ունի լրատվական մի ողջ վարչություն, որտեղ աշխատողները վարձատրվում են ՀՀ պետբյուջեից: Ու եթե նրանք չեն կարողանում անհրաժեշտ լրատվական արտահոսքն ապահովել, նաեւ ոչ պաշտոնական խողովակներով, ապա նշանակում է՝ ՊՆ-ն քարոզչական դաշտում լրջագույն խնդիրներ ունի, ցավոք:

ՊՆ-Ի ԳՈՐԾԱՐՔԸ
Այս կարեւոր թեմայի շուրջ «Ժողովուրդ»-ը նախ զրուցեց Ա. Զաքարյանի հետ, ով հստակ բացատրեց, որ իր հրապարակումների հետ կապված ՀՀ ՊՆ եւ Արցախի ՊԲ պատասխանատու չեն. «Ես պաշտոնատար անձ չեմ, հրապարակում եմ իմ ֆեյսբուքյան էջում: Ծանոթ լինելով օրենքներին՝ ինքս եմ որոշում՝ ինչը կարելի է հրապարակել, ինչը՝ չէ: Իմ այս հրապարակումները համաձայնեցված չեն»: Նկատենք, որ «շարքային Զաքարյանի» հրապարակումները բլոգային, ժամանցային ու նաեւ մի քանի լրատվական կայքեր՝ որպես վերջին ճշմարտություն, տեղադրում են ու տարածում:
Ա. Զաքարյանի խոսքով՝ ՊՆ իրեն չի հովանավորում, ինքն է կազմակերպում օժանդակ օգնություն սահմանապահներին. «Իմ հայտարարությունների ողջ պատասխանատվությունը իմ վրա է, դրանք պաշտոնական հայտարարություններ չեն, իսկ ինչ վերցնում են լրատվամիջոցներն ու տարածում, դրա համար էլ պատասխանատու չեմ: Ես այստեղից-այնտեղից ինֆորմացիա չեմ դնում բանակի մասին, շփվում եմ բոլոր հետ, եւ այն, ինչ անում ենք, առաջնագծում ենք անում եւ այդ ինֆորմացիան օգտագործում եմ մեր ազգի համար»: Իհարկե, ազգին ծառայելը սուրբ գործ է, բայց այդ ծառայությունը յուրաքանչյուրը յուրովի է պատկերացնում: Եւ եթե հանկարծ լինի մի իրավիճակ, որ Զաքարյանի ու մեր պետության պատկերացումները տարբերվեն, այդտեղ դարձյալ մեղավոր դուրս կգան լրատվամիջոցները, որոնք մեծ էնտուզիազմով տարածել են ինչ-որ մեկի տրամադրած տեղեկությունը՝ դրանից բխող ամենատարբեր հետեւանքներով: Համաձայնեք՝ լուրջ չէ:
Բայց այստեղ առաջանում է ամենակարեւոր հարցադրումը՝ ինչպե՞ս է ՊՆ-ի հետ իր գործունեությունը չհամաձայնեցնող մի անձնավորություն հասնում առաջնագիծ: «Ժողովուրդ»-ի այս հարցին պարոն Զաքարյանը պատասխանեց. «Ամեն մարդ չի կարող ինքնաբուխ գնալ առաջնագիծ: Այն հանաձայնեցվում է Պն-ի հետ, եւ ես «ՕԺանդակ օգնություն բանակին» նախաձեռնության շրջանակում ապրանք եմ տանում եւ առաջնագծից տեղեկություններ հրապարակում»: Այսպիսով, պարզվում է, որ ՀՀ ՊՆ-ն կոնկրետ գործարքի մեջ է նախաձեռնության ղեկավարի հետ: Եւ այստեղ եւս բազմաթիվ հարցեր են առաջանում՝ ինչո՞ւ է ՊՆ-ն վստահում շարքային Զաքարյանին, այլ ոչ, օրինակ, Արթուր Սաքունցին կամ Ժաննա Ալեքսանյանին: Նրանք պակա՞ս հայրենասեր են, թե՞ որ ՊՆ-ի մասին ճոռոմ ելույթներ չեն ունենում, դրա համար մերժված են մշտապես:

ՆԱԽԿԻՆ ԿԱԼԱՆԱՎՈՐԸ
Իսկ ո՞վ է Արշակ Զաքարյանը, որ ՊՆ-ն միանշանակ վստահում է նրան ու թույլատրում զինվորների հետ առաջնագծում լինել՝ ընդ որում, չսափրված եւ «ապրանքի դիմաց տեղեկություն հավաքելով եւ տարածելով»: «Ժողովուրդ»-ին լուրեր հասան, որ Զաքարյանը ապրել է ԱՄՆ-ում, եւ հրապարակումներ եղան, որ նա տարիներ առաջ ԱՄՆ-ի իրավապահների հետ խնդիրներ է ունեցել, նույնիսկ ազատազրկման է դատապարտվել: Ի դեպ, Ա. Զաքարյանն ինքը չհերքեց այդ տեղեկությունը՝ հայտնելով, որ այդ մասին բազմիցս է խոսել, եւ իր բոլոր ընկերները տեղյակ են կատարվածի մասին:
Իհարկե, մենք Արշակ Զաքարյան անձի դեմ ոչինչ չունենք, քանի որ նա գուցե իսկապես հայրենիքի անմնացորդ նվիրյալ է եւ ցանկանում է իր ուժերի ու հնարավորությունների դաշտում օգնել բանակին: Այստեղ խնդիրը ՀՀ ՊՆ-ն է, նախարար Սեյրան Օհանյանը եւ տարբեր լսարաններում անվտանգության ու լրտեսության վտանգների մասին երկարաշունչ դասախոսություններ կարդացող փոխնախարար Դավիթ Տոնոյանը:

5 ՀԱՐՑ ՊՆ-ԻՆ
Ուստի «Ժողովուրդ»-ը մի քանի հարցեր ուղարկեց նաեւ ՊՆ
1. Ռեժիսոր Արշակ Զաքարյանը տեւական ժամանակ է, ինչ տեղեկություն է տրամադրում սահմանում տիրող իրավիճակի մասին: Ո՞վ է Զաքարյանին թույլատրել, որպեսզի նա առաջին գծի վերաբերյալ տեղեկություն հրապարակի, արդյո՞ք այն համաձայնեցված է պաշտպանության նախարարի հետ:
2.Արդյո՞ք ՀՀ ՊՆ-ին նման տեղեկություններ տարածելը անհրաժեշտ է, նա նախարարության կողմից լիազորվա՞ծ է նման տեղեկություն տարածելու համար:
3.Արշակ Զաքարյանին նախարարությունը ֆինանսական միջոցներ տրամադրո՞ւմ է՝ սահման մեկնելու համար, ՊՆ-ի ֆինանսավորմա՞մբ է նա առաջին գիծ գնում:
4.Ֆեյսբուքում «Շտապ հավաք» նախաձեռնություն էր ստեղծվել, որոնց անդամները ցանկանում էին սահման մեկնել, սակայն ՊՆ-ն չէր թույլատրել, ինչո՞ւ են Զաքարյանին թույլատրում, իսկ, օրինակ, նշված նախաձեռնության անդամներին չեն թույլատրում: Ո՞րն է նրանց տարբերությունը:
5.Արդյո՞ք ՊՆ-ն տեղյակ է, որ Արշակ Զաքարյանը ԱՄՆ-ում 7 տարի դատապարտվել ու ազատազրկվել է, ինչպե՞ս եք վերաբերում այդ հարցին:

ԿԻՍԱԱՋԱԿՑՈՒԹՅՈՒՆ
Եւ, ահա, ստացել ենք ՀՀ ՊՆ-ի աշխատակազմի ղեկավար Գ. Հայրապետյանի ստորագրությամբ մի գրություն, որտեղ ասված է. «Կինոռեժիսոր Արշակ Զաքարյանը նախաձեռնել է «ՕԺանդակ օգնություն բանակի» համացանցային ակցիան, որի շրջանակներում էլ համագործակցում է ՀՀ պաշտպանության նախարարության հետ` իրականացնելով այցելություններ ու նկարահանումներ սահմանային զորամասերում եւ մարտական հենակետերում: Օգտակար համարելով «ՕԺանդակ օգնություն բանակին» համացանցային ակցիան եւ դիտարկելով այն որպես բանակ-հասարակություն կապի ամրապնդմանը նպաստող նախաձեռնություն՝ ՀՀ ՊՆ-ն դեմ չէ վերջինիս իրականացմանը ու աջակցում է այդ նախաձեռնությանը: Որեւէ ֆինանսական աջակցություն կինոռեժիսոր Արշակ Զաքարյանի նախաձեռնած «ՕԺանդակ օգնություն բանակին» համացանցային ակցիային ՀՀ ՊՆ-ն չի տրամադրում» :
Ըստ ՊՆ աշխատակազմի ղեկավարի` ՀՀ ՊՆ-ն չի մեկնաբանում Արշակ Զաքարյանի անձնական տեսակետները, որոնք կարող են եւ չհամընկնել ՀՀ ՊՆ-ի պաշտոնական դիրքորոշումներին. «ՀՀ Պն-ն որեւէ առնչություն չունի նաեւ Արշակ Զաքարյանի ֆեյսբուքյան էջում կատարված գրառումների հետ: ՀՀ ՊՆ-ի անունից տեղեկատվություն տարածելու իրավունք եւ լիազորություն ունեն միայն համապատասխան պաշտոնատար անձինք: Արշակ Զաքարյանի` ՀՀ-ում հաստատվելուց ի վեր ՀՀ իրավապահ մարմինների կողմից վերջինիս գործունեության մեջ չի նկատվել ՀՀ օրենսդրությանը հակասող որեւէ բան, եւ նա, հանդիասանալով ՀՀ քաղաքացի, ունի նույն իրավունքներն ու պարտավորությունները, որոնք ունեն մյուս բոլոր ՀՀ քաղաքացիները: Բանակ-հասարակություն կապի ամրապնդման շրջանակում, ՀՀ Պն-ն համագործակցում է հասարակական կազմակերպությունների, քաղաքացիական հասարակության կառույցների ու անհատների հետ: Հետայսու նույնպես ՀՀ ՊՆ-ն իր վարած քաղաքականության շրջանակում պատրաստակամ է քննարկել համագործակցության ցանկացած առաջարկ եւ աջակցել հայրենասիրական նախաձեռնություններին»:
Թե որքանով են լուրջ ՀՀ ՊՆ-ի փաստարկները, թող ընթերցողները դատեն, մենք մնում ենք մեր կարծիքին, որ սահմանի մասին տեղեկությունները պետք է վերահսկվեն պետական օղակների կողմից, իսկ ՊՆ-ն կարծում է, որ ում մտքով ինչ անցնի, կարող է հրապարակել՝ չպատկերացնելով անգամ դրա վտանգավորության մասին: Ինչպես ասում են՝ ճաշակի հարց է, ափսոս, որ գործ ունենք ՀՀ սահմանների անվտանգության մասին նուրբ տեղեկատվության հետ:
շարքայիններ՝ ՍՈՆԱ ԳՐԻԳՈՐՅԱՆ
ՔՆԱՐ ՄԱՆՈՒԿՅԱՆ
ԹԱՄԱՐԱ ՄԻՔԱՅԵԼՅԱՆ

 

 

ԾԵԾ ԱՌԱՆՑ ՊԱՏՃԱՌԻ՞
Երեկ նախկին «Ղարաբաղ» կոմիտեի անդամ Սամսոն Ղազարյանին ծեծի են ենթարկել: Ըստ տարածված տեղեկությունների՝ Սամսոն Ղազարյանին ծեծել են մեքենայի շուրջ առաջացած տարաձայնության համար:
Նշենք, որ «Ղարաբաղ» կոմիտեի անդամը հայտնել էր, որ Երեւանի Արաբկիր համայնքում իր մեքենայի մեջ նախաճաշելիս է եղել, երբ իր մեքենայի հարեւանությամբ կանգնել է սեւ գույնի «Գազ 24» մակնիշի ավտոմեքենա: Այնտեղից իջած տղամարդը նախ մոտեցել եւ հարցուփորձ է արել Սամսոն Ղազարյանին, այնուհետեւ սկսել է քաշքշել եւ բռունցքով հարվածներ հասցնել դեմքին եւ գլխին՝ սպառնալով՝ վիզդ կկտրեմ: Նշենք, որ Ղազարյանը սովորաբար Երեւանում իր սեփական ավտոմեքենայով տաքսի սպասարկում է իրականացնում:
Ինչեւէ, ավելի ուշ armlur.am-ը տեղեկություն տարածեց, որ Սամսոն Ղազարյանին ծեծողին հայտնաբերել են, եւ վերջինս հարցաքննվում է ոստիկանության Արաբկիրի բաժնում: Այս տեղեկությունը հաստատեցին նաեւ ոստիկանության հասարակայնության հետ կապերի եւ լրատվության վարչությունից:
Եվ, ահա, տեղի ունեցած միջադեպի մասին «Ժողովուրդ»-ին որոշ մանրամասներ են հայտնի դարձել, այն, որ արդեն բացատրություն է տրվել առ այն, որ Սամսոն Ղազարյանի եւ «Գազ 24» մակնիշի ավտոմեքենայի վարորդի միջեւ երթեւեկության կանոնների հետ կապված խնդիր է եղել, ինչից հետո, ամենայն հավանականությամբ, «Գազ 24» մակնիշի ավտոմեքենայի վարորդը փորձել է Սամսոն Ղազարյանի «հարցերը լուծել»՝ նրա նկատմամբ բռնություն գործադրելով:
Սակայն Ղազարյանն այլ բան էր պատմել. «Բավականին պինդ երիտասարդ էր, մեքենայիս դուռը բացել, ասում էր՝ իջի, ով ես, ինչ ես: Ես չիջա, ինքը սկսեց ինձ հարվածել: Հետո, երբ ես փորձեցի մի բան վերցնեմ, նա ասեց՝ ինչ ես վերցնում, կխփեմ: Այնուհետեւ գնաց, նստեց 062 ԼԼ10 մգեցված ապակիներով մեքենան ու գնաց: Իմ հետ էլի էր նման բան եղել, ու ես էլի ոստիկանության լրատվական զանգահարել, տեղեկացրել եմ, ասել եմ, որ կարող է՝ ինչ-որ խումբ կա, որ սենց բաներ է անում: Ինձ թվում է, որ իմ հետ կապված չի: Ինքը ինձ չէր ճանաչում: Բոլորն էլ գիտեն, որ ինձ չեն կարող վախեցնել: Գասպարյան Վովան կարող է պարզել՝ ինչ խնդիր է ուզում լուծել, կարող է՝ ռեկետի խնդիր է: Իմ թաղում հնարավոր չէ՝ ինչ-որ հեղինակություն իմ հետ խնդիր ունենար ու լուծեր: Ես ենթադրում եմ, որ ինչ-որ խմբեր կան, որ որոշում են, թե ով որտեղ պետք է կանգնի քաղաքում»:
Հավելենք, որ Սամսոն Ղազարյանին ծեծի ենթարկող անձը ոստիկանության Արաբկիրի բաժնում բացատրություն տալուց հետո ազատ է արձակվել:
Ոստիկանության հասարակայնության հետ կապերի եւ լրատվության վարչությունից հայտնեցին, որ կատարվում է հետաքննություն:




Լրահոս