Վթարի ենթարկված ավտոբուսը պատկանում է «Քինգ դելյուքս»-ին. տրանսպորտի նախարարությունը մանրամասներ է հայտնում

ՀՀ տրանսպորտի և կապի նախարարությունը տեղեկացնում է, որ նոյեմբերի 3-ին, տեղական ժամանակով ժամը 03.10-ին, Ռուսաստանի Դաշնության Տուլայի տարածաշրջանի Ուզլովսկի քաղաքի մոտ դեռևս չբացահայտված հանգամանքներում վթարի է ենթարկվել «Քինգ դելյուքս» ՍՊ ընկերությանը պատկանող ավտոբուսը, որը ոչ կանոնավոր ուղևորափոխադրում էր իրականացնում Մոսկվա-Երևան ուղղությամբ։

«Higer» մակնիշի 510 OP 61 պետհամարանիշով ավտոբուսը դուրս է եկել երթևեկելի մասից և շրջվել: Վթարի հետևանքով կան զոհեր և վիրավորներ։
Դեպքի առնչությամբ Ռուսաստանի Դաշնության ՆԳ նախարարությունում կատարվում է նախաքննություն։

ՀՀ տրանսպորտի և կապի նախարար Գագիկ Բեգլարյանն անմիջական կապի մեջ է ՌԴ տրանսպորտի նախարար Մաքսիմ Սոկոլովի հետ։ ՌԴ տրանսպորտի նախարարությունից տեղեկացնում են, որ իրավիճակը գտնվում է ՌԴ տրանսպորտի նախարարի և Տուլայի նահանգապետի անմիջական վերահսկողության ներքո։

Հիվանդանոցներում, վիրավորներին համապատասխան բուժօգնություն են ցուցաբերում լավագույն բժիշկները։ Վիրավորներից 2-ի վիճակը ծանր է, մյուսների կյանքին, այդ թվում նաև վերակենդանացման բաժանմունքում գտնվող 10 վիրավորների, վտանգ չի սպառնում։
Ստեղծված են համապատասխան պայմաններ, անհրաժեշտության դեպքում, կկազմակերպվի նաև վթարից տուժածների հարազատների տեղափոխումն ու դիմավորումը։

ՌԴ առողջապահության նախարարությունից ՀՀ առողջապահության նախարարությանը փոխանցած տեղեկության համաձայն ավտովթարի հետևանքով
տուժել է 48 մարդ, այդ թվում 17 ամյա 1 պատանի։ Զոհվել է 8 մարդ, որոնցից 5-ը՝ տեղում, 1-ը շտապօգնության մեքենայում, 2-ը՝ Ուզլովի շրջանի հիվանդանոցի վերակենդանացման բանժանմունքում։

Տեղական ժամանակով ժամը 14.00-ի դրությամբ հիվանդանոցային բուժում է ստանում վթարից տուժած 32 մարդ, 8 մարդ բուժօգնություն է ստացել ամբլուատոր պայմաններում։

Այլ մանրամասներ լինելու դեպքում՝ կտրվի լրացուցիչ տեղեկատվություն:
ՀՀ տրանսպորտի և կապի նախարարությունը խորապես ցավակցում է զոհվածների հարազատներին, իսկ վիրավորներին՝ մաղթում է շուտափույթ ապաքինում։

Հիշեցնենք, որ «Քինգ դելյուքս»-ը պատկանում է Աբովյանի քաղաքապետի նախկին թեկնածու, նախկին ՀՀԿ-ական, ԲՀԿ նախկին առաջնորդ Գագիկ Ծառուկյանի սանիկ Արթուր Հարությունյանին:

Տեղեկացնենք նաև, որ Ուզլովսկի մոտ տեղի ունեցած վթարի առնչությամբ գործում է նաև թեժ գիծ` 59-01-02, 59-01- 04, 59-01-05 հեռախոսահամարներով և [email protected] էլ. հասցեով:

Ռուսաստանի Դաշնության Տուլայի  տարածաշրջանի Ուզլովսկի քաղաքի մոտ տեղի ունեցած վթարի առնչությամբ  ՀՀ տրանսպորտի և կապի նախարարությունում գործում  է թեժ գիծ`  59-01-02,  59-01- 04,  59-01-05  հեռախոսահամարներով և [email protected] էլեկտրոնային հասցեով։