ՀՀ կրթության և գիտության նախարարությունում տեղի է ունեցել աշխատանքային հանդիպում, որտեղ քննարկվել են լրացուցիչ և շարունակական կրթությանն առնչվող հարցեր: Քննարկմանը մասնակցել են միջազգային և տեղական կազմակերպությունների ներկայացուցիչներ: ՀՀ ԿԳՆ լրացուցիչ և շարունակական կրթության բաժնի պետ Աիդա Տիգրանյանը ներկայացրել է կառավարության կողմից վերջերս ընդունված «Լրացուցիչ կրթական ծրագրերի կազմակերպման և իրականացման կարգը» և «Ոչ ֆորմալ և ինֆորմալ ուսուցման արդյունքների գնահատման և ճանաչման կարգը սահմանելու մասին» որոշումները: Ոլորտը կարգավորող նշված երկու որոշումներն ընդունվել են` հաշվի առնելով միջազգային փորձը և վերջին տարիներին կատարված աշխատաշուկայի ուսումնասիրությունները:
Նոր հաստատված իրավական ակտերն ապահովում են ոչ միայն միջազգային չափանիշների տեղայնացումը, այլև իրավական տեսանկյունից կարգավորվում են լրացուցիչ կրթության համակարգը՝ հնարավորություն տալով գործող կազմակերպություններին վերանայել և բարելավել իրենց կողմից տրամադրվող ծառայությունների որակը՝ ստանալով համապատասխան խորհրդատվություն և ծրագրերի փորձաքննություն: Հիմնվում է նոր համակարգ, որը հնարավորություն է տալիս գնահատել և ճանաչել ոչ ֆորմալ և ինֆորմալ ուսումնառության արդյունքները՝ անձին տալով հնարավորություն պետության կողմից ճանաչելու իր գիտելիքները և կարողությունները, որը նա ձեռք է բերել կրթության տարբեր ձևերով (լրացուցիչ կրթության կամ ինֆորմալ ուսումնառության միջոցով):
Իբրև նոր իրավական ակտերից բխող քայլ՝ արդեն ՀՀ ԿԳՆ-ի կողմից մրցութային կարգով ընտրվել է համակարգող կազմակերպություն`Ուսուցման ազգային հիմնադրամը, որի առջև խնդիր է դրված ապահովել ուսուցման ազգային ռեեստրի ստեղծումը, ինչպես նաև մշակել հստակ չափանիշներ՝ լրացուցիչ կրթություն ապահովող կազմակերպությունների և ուսուցման արդյունքների գնահատման ու ճանաչման գործընթացի համար: Քննարկան ընթացքում անդրադարձ է եղել նաև նոր կարգերից բխող հետագա գործողություններին առնչվող մի շարք հարցերի:
.gif)
