Կապանի վարչական տարածքով անցնող միջպետական ճանապարհի վրա այսօր 135 մետաղական կրպակներ կան, որոնք կառուցվել են դեռեւս պատերազմական տարիներին եւ հիմնականում պետական գրանցում չունեն: Միայն երկկողմ պայմանագիր է կնքվել քաղաքապետարանի հետ՝ հարկային դաշտից դուրս չմնալու համար: Քաղաքային իշխանությունները բազմիցս որոշել են դրանք ապամոնտաժել, սակայն այդպես էլ հստակ քայլեր չեն ձեռնարկել: Անցած տարի այդ տաղավարների տեղում նորերը կառուցելու նախագիծ կար, որը համաձայնեցվել էր Քաղաքաշինության նախարարության հետ: Սակայն 2009թ օգոստոսի 6-ից կառավարության որոշմամբ կասեցվեց Մ-2 Երեւան- Երասխ- Մեղրի- Իրանի սահման, միջպետական նշանակության ավտոմոբիլային ճանապարհների պաշտպանական գոտիներում եւ օտարման շերտերում շինարարության իրականացման եւ հողահատկացման գործընթացը: Արդյունքում Կապանի քաղաքապետ Արթուր Աթայանի կարգադրությամբ ստեղծվել է աշխատանքային խումբ, որը համակարգելու է չաշխատող 52 տաղավարների ապամոնտաժման եւ տեղափոխման գործընթացը: Արդեն փետրվարի 21-ից կսկսվի կրպակների ապամոնտաժումը, որի հիմնական նպատակն, ըստ քաղաքապետարանի, Կապանը տեսքի բերելն է: Սակայն արդյո՞ք 52 տաղավարների ապամոնտաժումով այն կբարելավվի. չէ՞ որ մնացած 82 կրպակները կշարունակեն մնալ իրենց տեղում: Սակայն այս հարցին ցավագին են մոտենում հատկապես աշխատող կրպակների տերերը. «Ես 3 օջախ եմ պահում, որ փակվեց, ի՞նչ եմ անելու, կամ ո՞ւր եմ գնալու. Էլ տեղ չկա, միայն հողի տակն է մնացել»,- բողոքում է մսավաճառ Վանիկը: Նրա գործընկերները նույնպես դժգոհում են. «Մենք պետությանը օգուտ ենք տալիս,- ասում է Թորոս պապը,- բոլոր վարձերը վճարում ենք, ո՞ւմ ենք խանգարում»: «Թող մեզ աշխատանքով ապահովեն, խնդիր չկա, կազատենք տարածքը»,- վստահեցնում են վաճառողները: Մետաղական կրպակների ապամոնտաժումից հետո քաղաքապետարանը մտադիր է սկսել շենքերի բակերում կայանած անսարք տրանսպորտային միջոցների տեղափոխման գործընթացը:ՄԵԼԻՆԵ ՄԱՐՏԻՐՈՍՅԱՆԿապան
.gif)
