ՀՀ վարչապետ Հովիկ Աբրահամյանը բարձր է գնահատում վերջերս Երևանում հանցավոր խմբավորման վնասազերծման օպերացիան, որն իրականացվեց Ազգային անվտանգության ծառայության և Ոստիկանության համատեղ ջանքերով: Ինչպես փոխանցում է «Արմենպրես»-ը, այդ մասին վարչապետը նշեց Ազգային անվտանգության ծառայության աշխատողի օրվա կապակցությամբ հրավիրված հանդիսավոր նիստի ժամանակ: Առիթից օգտվելով՝ գործադիրի ղեկավարը երախտագիտություն հայտնեց իրենց կյանքը վտանգի ենթարկելու գնով մեր երկրի պետականությանն ու հասարակության անվտանգությանը սպառնացող վտանգը վնասազերծելու գործն իրականացրած բոլոր աշխատակիցներին:
Վարչապետը նշեց, որ այս օրը ևս մեկ առիթ է արժևորելու և գնահատելու մեր երկրի անվտանգության մարմինների աշխատանքն ու գործունեությունը՝ ուղղված հայրենիքի անվտանգության ապահովմանն ու ամրապնդմանը: «Ազգային անվտանգության ծառայությունը մեր պետականության անվտանգ գոյության ապահովման կարևորագույն կառույցներից է, և մենք բարձր ենք գնահատում ձեր դերն ու նշանակությունն այդ առաքելության իրականացման գործում», ասաց կառավարության ղեկավարը: Նրա խոսքով՝ ԱԱԾ աշխատակիցների գործունեությունն ունի իր առանձնահատկությունը, քանի որ հաճախ այն անտեսանելի է քաղաքացու համար, ավելին, նրանց աշխատանքի արդյունքների մասին հանրությունը հաճախ իրազեկվում է տարիներ անց:
Հովիկ Աբրահամյանի դիտարկմամբ՝ երբեմն էլ նրանց աշխատանքն ու սխրանքները մնում են գաղտնի, չնայած նրան, որ դրանք էական ազդեցություն են թողնում պետության անվտանգության և զարգացման հետագա ընթացքի վրա: Վարչապետը գոհունակությամբ է նշել, որ ՀՀ ԱԱԾն տարիներ ի վեր պատվով և մեծ հաջողությամբ է իրականացնում իր առջև դրված խնդիրները՝ ժամանակին արձագանքելով ներքին և արտաքին սպառնալիքներին, մեր երկրի առջև ծառացող տարաբնույթ մարտահրավերներին: ՀՀ անվտանգության ապահովման գործում ունեցած ներդրումների, ինչպես նաև ՀՀ ազգային անվտանգության մարմինների աշխատողի օրվա կապակցությամբ վարչապետ Հովիկ Աբրահամյանը ՀՀ կառավարությանն առընթեր ազգային անվտանգության ծառայության տնօրեն, գեներալգնդապետ Գորիկ Հակոբյանին, ԱԱԾ տնօրենի առաջին տեղակալ, գեներալմայոր Հրանտ Եպիսկոպոսյանին, ԱԱԾ տնօրենի տեղակալ, գեներալլեյտենանտ Արզուման Հարությունյանին պարգևատրեց ՀՀ վարչապետի հուշանվերով՝ անվանական ժամանացույցով: ԱԱԾ մի խումբ աշխատակիցներ պարգևարտրվեցին նաև ՀՀ վարչապետի հուշամեդալով:
.gif)
