ՆԻԿՈԼԻ ՎՃԻՌՆ ԱՆՓՈՓՈԽ ԹՈՂՆՎԵՑ

Փետրվարի 18-ին «Արթիկ» ՔԿՀ-ում  տեղի ունեցած դատական նիստում ՀՀ վերաքննիչ դատարանի  դատավոր Եվա Դարբինյանը որոշեց մերժել «Հայկական Ժամանակ» օրաթերթի գլխավոր խմբագիր Նիկոլ Փաշինյանի պաշտպանական կողմի  վերաքննիչ բողոքը: Նշենք, որ  այս անգամ  «Արթիկ» ՔԿՀ-ն բավական պատրաստված էր ներկայացել դատական նիստին: Երեք տեսախցիկով  ու մի քանի ֆոտոապարատներով «զինված» քրեակատարողականի աշխատակիցները  ֆիքսում էին ամեն ինչ՝  սկսած նրանից, թե ով է եկել դատական նիստին, վերջացրած  ընթացքում հնչող տարբեր ռեպլիկներով: Համազգեստավորները եւս շատ էին:  22 հոգի դատական նիստերի դահլիճում էին, նույնքանն էլ դրսում հետեւում էին անցուդարձին: Նիստի սկզբում նախ խոսեց Ն. Փաշինյանը, ով հայտարարեց, որ իր փաստաբանները նոր հայց են նախապատրաստելու` այս անգամ ՀՀ ԱՆ ՔԿ վարչության դեմ. «ՀՀ ԱՆ քրեակատարողական վարչության Հասարակայնության հետ կապերի բաժինը նախօրեին հերթական հայտարարությունն է տարածել իմ անձի վերաբերյալ,  որում  պնդել է, թե ես՝  Նիկոլ Փաշինյանս, իմ նամակները դիտմամբ չեմ հանձնում «Արթիկ» ՔԿՀ-ին, որ  պատրանք ստեղծվի, թե իմ անձի նկատմամբ որոշակի սահմանափակումներ են կիրառվում: Ես հրապարակավ դիմում եմ իմ փաստաբաններին, որպեսզի  Քրեակատարողական վարչության Հասարակայնության հետ կապերի բաժնի հայտարարությունը իրավական վերլուծության ենթարկվի, եւ դրա հեղինակի կամ հեղինակների նկատմամբ դատական հայց հարուցվի»:Այնուհետեւ  պաշտպանական ճառով հանդես եկավ Փաշինյանի փաստաբանը, որը հայտարարեց, թե սխալ հաշվարկի արդյունքում Փաշինյանը 5 ամիս ավել է մնալու կալանավայրում, ինչի պատճառներն, ըստ նրա,  քաղաքական են: Նիկոլ Փաշինյանը եւս իր հիմնավորումները ներկայացնելու հնարավորություն ստացավ` միաժամանակ  հայտարարելով, որ ինքը չի հավատում Հայաստանի արդարադատությանը եւ չի ակնկալում, որ Եվա Դարբինյանը ճիշտ որոշում կընդունի:  Այնուհետեւ  Վերաքննիչ դատարանը հրապարակեց  վճիռն` ըստ որի անփոփոխ թողնվեց ընդհանուր իրավասության դատարանի կայացրած վճիռը: Այսինքն` Նիկոլ Փաշինյանի պատժաչափը մնաց անփոփոխ:«Մենք ունենք համապատասխան վճռականություն` լինել անսասան էնքան, մինչեւ մեր երեխաներին կարողանանք փոխանցել  այնպիսի հայրենիք, որտեղ իրենք հավասարապես պաշտպանված կլինեն օրենքով եւ պատասխանատու կլինեն օրենքի առաջ»,- հայտարարեց Փաշինյանը: ԱՐՄԵՆՈՒՀԻ  ՎԱՐԴԱՆՅԱՆԳյումրի