ՀԱՐՑ. Միշտ նկատել եմ, որ գրեթե բոլոր եկեղեցիները կառուցված են շատ շքեղ եւ լի են բազում խորհրդանիշերով: Մինչդեռ, իմ կարծիքով, դրանք պետք է լինեն հասարակ ու համեստ: Ի՞նչ խորհուրդ ունեն կամ արդյո՞ք պարտադիր են այդ շքեղությունները:    

ՊԱՏԱՍԽԱՆ. Եկեղեցին շքեղ է, որովհետեւ աներեւույթ Աստծո բնակարանն է: Սուրբ Հովհաննես առաքյալն ասում է. «Աստծո Որդու Արյունը սրբում է մեզ ամեն մեղքից… եթե մեկը մեղանչի, Աստծո առաջ բարեխոս ունենք Հիսուս Քրիստոսին՝ Արդարին եւ Անարատին, եւ Նա է քավությունը մեր մեղքերի» (Ա. Հովհ.  1:7, 2:2): Եկեղեցում Սուրբ պատարագի ժամանակ ենք հաղորդվում մեր Աստծո՝ Տեր Հիսուս Քրիստոսի հետ: Աստված Սուրբ է եւ սրբերի մեջ է բնակվում (տես՝ Բ Կորնթ. 6:14-7:1), ուստի այն տեղը, որտեղ տեղի է ունենում մեր սրբությունը՝ հաղորդությամբ Սուրբ, Անմեղ, Արդար եւ Անարատ Տեր Հիսուս Քրիստոսի հետ, պետք է լինի պատշաճորեն գեղեցիկ եւ մաքուր:
Աստված խորհրդավոր է, որովհետեւ Նրան ոչ ոք չի տեսնում, այլ իր հոգում խորհրդավոր կերպով հաղորդակից է Նրան: Եկեղեցին զարդարում են այս խորհրդավոր հաղորդությունը հիշեցնող եւ դրան նպաստող սիմվոլներով:

«ԺՈՂՈՎՈՒՐԴ». Թերեւս նշանակալին ոչ այնքան եկեղեցու շքեղությունն է, որքան նրա հաղորդած հոգեւոր հանգստությունը, քանի որ, ինչպես եկեղեցի այցելող մեր հայրենակիցներն են հաճախ խոստովանում, ամեն եկեղեցի նույն հոգեւոր հանգստությունը  չի պարգեւում: