Սյունիքի մարզպետ Սուրիկ Խաչատրյանի տան մոտ տեղի ունեցած միջադեպի հետևանքով հրազենային վնասվածք ստացած N զորամասի հրամանատար, գնդապետ Արտակ Բուդաղյանի առողջական վիճակը շարունակում է մնալ կայուն ծանր, սակայն կա դրական դինամիկա: Այս մասին լրագրողների հետ այսօրվա հանդիպմանը նշեց Կենտրոնական կլինիկական հոսպիտալի պետ Արամ Ասատուրյանը: Ըստ նրա` գնդապետը Գորիսի քաղաքային հիվանդանոցում վիրահատության ենթարկվելուց հետո տեղափոխվել է Կենտրոնական կլինիկական հոսպիտալ:
Արտակ Բուդաղյանը հրազենային վնասվածք է ստացել լյարդի շրջանում, գնդակը խրվել է գոտկային մկանային հյուսվածքների մեջ և դեպքի հաջորդ օրն իսկ, երբ նա տեղափոխվել է կենտրոնական կլինիկական հոսպիտալ, գնդակը հեռացվել է նրա մարմնից:
Կենտրոնական կլինիկական հոսպիտալի պետի հավաստմամբ՝ նա գտնվում է վերակենդանացման բաժնում, սակայն օրեր անց կտեղափոխվի այլ բաժանմունք: “Արտակ Բուդաղյանը առողջ տղամարդ է և լինելով զորամասի հրամանատար՝ նրա ֆիզիկական պատրաստությունը բավականին բարձր է, ինչից ելնելով` ենթադրվում է, որ նա արագ ոտքի կկանգնի”,- ասաց Արամ Ասատուրյանը և հավելեց, որ ներկայումս վիրահատության կարիք չկա:
Կենտրոնական կլինիկական հոսպիտալի պետը նշեց նաև, որ Արտակ Բուդաղյանը գիտակցությունը երբեք չի կորցրել՝ անգամ հոսպիտալ տեղափոխվելու ժամանակ, և կարողանում է նորմալ հաղորդակցվել: Այդուհանդերձ առայժմ գնդապետը ցուցմունք չի տվել դեպքի վերաբերյալ: Գնդապետ Արտակ Բուդաղյանին այցելել են ՀՀ զինվորական դատախազը և Զինված ուժերի քննչական ծառայության պետը:
“ՓԱՍՏԻՆՖՈ”
.gif)
