ԱԱԾ նախկին բարձրաստիճան պաշտոնյա Գուրգեն Եղիազարյանը նոր բացահայտումներ է արել հոկտեմբերի 27-ի գործով

«Հանրապետություն» կուսակցության առաջնորդ, Հայաստանի Հանրապետության նախկին վարչապետ Արամ Սարգսյանը, անդրադառնալով հոկտեմբերի 27-ի ոճրագործությանը, ասել էր. «Ես ուզեցել եմ հասկանալ՝ որտեղի՞ց էր հոկտեմբերի 27-ի արյունը՝ դրսի՞ց էր, թե՞ ներսից, որովհետև Սերժ Սարգսյանը ինձ խոստովանել է, որ դա կազմակերպված էր, որ մի օր պիտի ասի, թե այդ ով էր կազմակերպել: Թող ասի, ես սպասում եմ այդ պատասխանին»:

ArmLur.am-ն այս հայտարարության առնչությամբ զրուցեց ԱԱԾ նախկին բարձրաստիճան պաշտոնյա Գուրգեն Եղիազարյանի հետ.

-Պարո՛ն Եղիազարյան, ինչպե՞ս կմեկնաբանեք Արամ Սարգսյանի այն հայտարարությունը, որ Սերժ Սարգսյանը խոստովանել է իրեն, որ մի օր պետք է ասի, թե ովքեր են կազմակերպել հոկտեմբերի 27-ը:

-Չեմ կարող մեկնաբանել, դա պետք է հանրապետության նախագահից հարցնեք, ուրեմն գործի մեջ կան նրբություններ, որոնց մասին հանրությունը տեղյակ չէ:

-Արդյոք օրենքի տեսանկյունից ճի՞շտ է, երբ հանցագործության դեպքում կան մանրամասներ, և իրավապահ մարմինները չեն զբաղվում այդ գործով:

-Դե, ես չեմ տիրապետում այն ինֆորմացիային, ինչին տիրապետում է Սերժ Սարգսյանը, և ասենք թե երբ է իմացել, հնարավոր է դրա մասին իմացել է ասենք 2 օր առաջ, չեմ կարող ասել:

– Ձեր կարծիքով հոկտեմբերի 27-ն ամբողջովին բացահայտվա՞ծ է:

-Ո՛չ, բացահայտված չէ հոկտեմբերի 27-ը և հատկապես, որ հատվածը բացահայտված չի, ես կարող եմ ասել, դա թուրքական արտաքին հետախուզության հետ էր կապված, քանի որ նրանք միտված պետք է ոչնչացնեին Կարեն Դեմիրճյանին: Գիտեք, ես նոր վեպ եմ ավարտել, շուտով տպագրության է հանձնվելու և կլինեն շատ նոր պարզաբանումներ այդ թեմայով:

-Պարո՛ն Եղիազարյան, այսինքն Ձեր նոր վեպն առնչություն ունի՞ հոկտեմբերի 27-ի հետ:

-Այ՛ո, ուղիղ առնչվում է:

զրուցեց Տաթև Հարությունյանը