Գորիսի ոստիկանապետի լիազորությունները դադարեցվեցին, մնացին մարզային դատախազն ու քննչականի ղեկավարը. բացառիկ տեսանյութ

ՀՀ ոստիկանության պետ Վլադիմիր Գասպարյանի հրամանով՝ մինչև ծառայողական քննության ավարտը ժամանակավորապես դադարեցվել են ՀՀ ոստիկանության Սյունիքի մարզային վարչության Գորիսի բաժնի պետ Գևորգ Ազիզյանի լիազորությունները: Գորիսի բաժնի պետի ժամանակավոր պաշտոնակատար է հայտարարված ՀՀ ոստիկանության Սյունիքի մարզային վարչության պետը:

Այս մասին ArmLur.am-ին հայտնեց ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը:

Այսպիսով, ՀՀ ոստիկանապետ Վլադիմիր Գասպարյանը մաքրեց համակարգը կասկածելի տարրերից` մնացածը թողնելով քննության ավարտին: Իսկ ինչպե՞ս կվարվի ՀՀ գլխավոր դատախազ Գեւորգ Կոստանյանը, որ իր դատախազը պարտակել է հանցանքը եւ «գործ սարքել» Արթուր Գեւորգյանի գլխին` նրան բանտախուց ուղարկելով: Անհայտ է նաեւ, թե ինչ պատիժ է սպասվում ՀՀ քննչական կոմիտեի Սյունիքի մարզային կառույցի ղեկավար Վահան Դաղունցին, որը սարքել է գործը եւ ծեծի ենթարկված քաղաքացու նկատմամբ քրեական գործ է հարուցել ՀՀ քր. օրենսգրքի 316 հոդվածի` իշխանության ներկայացուցչին դիմադրելու հատկանիշներով: Մեզ մնում է սպասել զարգացումներին:

Հավելենք, որ մեր տեղեկություններով հարուցված քրգործը Հատուկ քննչական ծառայության վարույթ է ուղարկվել: Այս մասին, սակայն, դեռևս պաշտոնապես չի հայտարարվել:

Հիշեցնենք, որ «Ժողովուրդ» օրաթերթը հրապարակել էր, որ մարտի 8-ի երեկոյան մի խումբ երիտասարդներ գնացել են Գորիսի «Դիանա» ռեստորան, բայց նրանց թույլ չեն տվել ներս մտնել՝ ասելով՝ փակ է: Երբ երիտասարդները նստել են ավտոմեքենան, որ դուրս գան, ռեստորանի դարպասներով անարգել ներս է մտել Գորիսի ոստիկանապետ Գևորգ Ազիզյանը: Երիտասարդներից մեկը հարցրել է, թե ինչո՞ւ է օբյեկտը մեկի համար բաց, մյուսի համար՝ փակ: Այս խոսակցությունը լսելուն պես քաղաքացիական հագուստով ոստիկանապետը շրջվել է ու հաշիվ պահանջել երիտասարդից, ապա օձիքից բռնած, քարշ տալով փորձել է նրան ներս տանել:

Այդ պահին 3 ընկերները դուրս են եկել մեքենայից՝ պարզելու, թե ով և ինչու է իրենց ընկերոջը քարշ տալիս: Ոստիկանապետը կարճ ռազբորկայից հետո անցել է բռունցքների ու ծեծի ենթարկել Արթուր Գևորգյանին՝ հայհոյանքներ տալով: Դեպի մանրամասները հրապարակվել են ArmLur.am-ում՝ համապատասխան տեսանյութով: Ոստիկանապետից բացի, ռեստորանում են եղել նաև այլ իրավապահներ:

Դեպքի առթիվ Սյունիքի մարզային քննչական վարչությունում հարուցվել է քրեական գործ` իշխանության ներկայացուցչի նկատմամբ բռնություն գործադրելու դեպքի առթիվ, որի նախաքննության ընթացքում մեղադրյալը նաև ցուցմունք է տվել իրավապահների կողմից իր նկատմամբ կիրառված բռնության մասին: