Հասարակ գեղջկուհուց մինչև համաշխարհային մեգաաստղ. այսօր Սելին Դիոնի ծննդյան օրն է (ֆոտո, վիդեո)

1968 թվականի մարտի 30-ին է ծնվել Սելին Մարի Կլոդետ Դիոնը: Նա ծնվել է կանադական Կվեբեկ քաղաքում: Ընտանիքում 14 երեխաներից ամենափոքրն էր: Ամենահասարակ գյուղացի աղջնակից Սելին Դիոնը դարձավ համաշխարհային մեգաաստղ: Ամբողջ աշխարհն ականատես եղավ՝ ինչպես շնորհալի երեխան դարձավ սուպերաստղ:

Սելին Դիոնը մեծացել է հռոմեա-կաթոլիկական աղքատ, բայց, ինչպես ինքն է ասում, երջանիկ ընտանիքում, Շառլեմանում (այժմ՝ թաղամաս Մոնրեալի արևմտյան ծայրամասում): Երաժշտությունը միշտ այդ ընտանիքի մասն է կազմել (Դիոնին անվանել են «Céline» երգի պատվին, որը ֆրանսիացի երգիչ Յուգ Օֆրեն ձայնագրել էր նրա ծնունդից երկու տարի առաջ):

Ծողների փոքրիկ ռեստորանում էլ Սելինն ունենում է իր առաջին ելույթը’ 5 տարեկանում: Մինչև այդ նրա ելույթների ունկնդիրները եղել են միայն ընտանիքի անդամները: «Երբ ինչ-որ մեկն ամաններն էր լվանում, ինձ նստեցնում էր խոհանոցի սեղանին, որը, ըստ էության, իմ առաջին «կենտրոնական» բեմն էր: Այդ ժամանակ պատառաքաղը, գդալը կամ ամաններ լվանալու խոզանակն ինձ համար բարձրախոս էին: Բայց խնդիրն այն էր, որ այլևս ոչ ոք չէր կարողանում իջեցնել ինձ սեղանից, ես շարունակում էի անդադար երգել»:

Սելինը միշտ առանձնահատուկ վերաբերմունք է ունեցել ձիերի հանդեպ: Նրա երազանքն էր իր առաջին հոնորարով գնել ձի: «Հետո ես մոռացա ադ մասին: Ինձ մեկ այլ երազանք գրավեց’ դառնալ իսկական երգչուհի: Տարիներ անց, երբ ստացա իմ առաջին հոնորարը, ձիու փոխարեն գնեցի բարձրակրունկ կոշիկներ»:

12 տարեկանում Սելինը մոր և եղբոր օգնությամբ գրում է ֆրանսիական երգ’ Ce N’etait Qu’un Rеve («Դա միայն երազ էր»): Ընտանիքի անդամները որոշում են երգի ձայնագրությունն ուղարկել այն հասցեով, որը գրված էր ֆրանսիացի հայտնի երգիչ Ժինե Ռենոյի ձայներիզի վրա: Հասցեի տերը բավականին ճանաչված անձնական մենեջեր Ռենե Անժելիլն էր: Պատասխան չստացան: Սելինի եղբայրն ինքը զանգահարեց Ռենեին և վստահաբար հայտարարեց, որ վերջինս չի էլ լսել անգամ ձայնագրությունը, հակառակ դեպքում’ միանգամից կզանգահարեր:

Սա արդեն հետաքրքրեց Ռենեին: Ձայնագրությունը լսելուց անմիջապես հետո նա ետ զանգահարեց եղբորը և պայմանավորվեց Սելինի հետ հանդիպման համար: Սելին Դիոնը մոր հետ ուղևորվեց իրենցից ոչ այդքան հեռու Մոնրեալ քաղաքը, որտեղ էլ Ռենեի գրասենյակն էր: «Սկզբում նա շատ սառն էր. չէր ժպտում, քիչ էր խոսում: Երբ երգեցի հենց իր գրասենյակում առանց երաժշտության, նա սրբեց աչքերն ու ասաց. «Դու ստիպեցիր ինձ հուզվել»:

Այդուհետ Ռենե Անժելիլը դառնում է Սելին Դիոնի պրոդյուսերը: «Այդ օրվանից նա դարձավ նաև մեր ընտանիքի անդամը»:

Մի անգամ Ռենեն Դիոնների տանից դուրս գալուց հայտարարում է. «Եթե դուք վստահեք ինձ, ես երաշխավորում եմ, որ ձեր աղջիկը կդառնա Ֆրանսիայի ամենահայտնի աստղերից մեկն ամենաուշը 5 տարուց»:

Մի անգամ, տեսնելով Մայքլ Ջեքսոնի ելույթը հեռուստատեսությամբ, Սելինը հայտարարեց իր պրոդյուսերին, որ ուզում է լինել նույնքան ճանաչված և սիրված: Նրանք միասին սկսեցին զբաղվել Սելինի իմիջով: Նա կտրեց մազերը, հանեց հոնքերը, ուղղեց ատամները:

Իրար ետևից թողարկում է հիթեր, որոնք երկար ժամանակ չեն իջնում թոփերից: Սելինն արդեն վայելում էր համաերկրացիների սերն ու ճանաչումը: Իր հարազատ քաղաքում նա արդեն սուպերաստղ էր համարվում: Իրար ետևից սկսում են թողարկվել Սելինի անգլալեզու և ֆրանսալոզու ալբոմները, որոնք վաճառվում էին մեծ քանակությամբ:
1988 թ.-ը ճակատագրական է դառնում Սելին Դիոնի համար թե անձնական կյանքում, թե մասնագիտական: Այս տարի նա հաղթում է «Եվրատեսիլ» միջազգային մրցույթում’ Ne partez pas sans moi երգով: Շուրջ 600 միլիոն մարդ Եվրոպայից, ԽՍՀՄ-ից, Ճապոնիաից, Ավստրալիայից հնարավորություն ունեցան լսելու նրա կենդանի կատարումը: Սելինն արդեն համաշխարհային ճանաչում ուներ:

Այս թվականին էլ Սելինի և նրա պրոդյուսեր Ռենեի հարաբերությունները զուտ ընկերականից վերածվում են ավելի էական հարաբերությունների: Նրանք հայտարարում են իրենց միասնության մասին: Դրան անմիջապես հաջորդում են մարդկանց մեկնաբանությունները: Շատերի կարծիքով, դա հաշվենկատ քայլ է Սելինի կողմից’ հօգուտ իր կարիերայի: Մյուսներն էլ այլասերված էին համարում Ռենեին’իրենից 26 տարի փոքր աղջկան սիրելու համար:

Երբ նրանք ծանոթացել էին, Ռենեն 38 տարեկան էր, իսկ Սելինը’ 12: Քչերն էին հավատում, որ դա իսկապես սեր է: Նախքան նրանց հարաբերությունները Ռենեն արդեն 2 անգամ ամուսնացել էր: 3-րդ ամուսնությունը եղավ վերջինը: 1994 թ. Սելին Դիոնն ու Ռենե Անժելիլը ամուսնացան:

Նրանց հարսանիքը համարվեց շոու բիզնեսի պատմության մեջ ամենաշքեղներից մեկը: Նորաստեղծ զույգին շնորհավորելու էին եկել մոտ 1000 մարդ: «Եթե ես այսօր այն Սելին Դիոնն եմ, որին բոլորը սիրում և հարգում են, ապա այդ ամեն համար ես պարտական եմ նրան’ Ռենեին»:

1997թ. Ջեյմս Քեմերոնը հրավիրում է Սելին Դիոնին կատարելու My Heart Will Go On երգը, որ դարձավ «Տիտանիկ» ֆիլմի սաունդթրեքը: Այն դարձավ նաև համաշխարհային շուկայում Սելին Դիոնի այցեքարտը:

1998թ. այս երգը ստացավ «Օսկար» և 1999-ին 3 «Գրեմմի»: Եթե կային մարդիկ, որոնց դեռ անհայտ էր Սելին Դիոնի անունը, այս երգից հետո դարձան նրա երկրպագուները, հանդիսատեսը կամ ուղղակի ունկնդիրը: Սելին Դիոնն իր կարիերայի բարձունքում էր: Նա դուետներ է կատարում Բարբրա Սթրեյզանդի, Բրայն Ադամսի, Բի Ջիսի, Կերոլ Կինգի, Լուչիանո Պավարոտիի, Անդրեա Բոչելիի, Շերի, Գարուի և համաշխարհային ճանաչում ունեցող այլ աստղերի հետ: «Իմ կյանքի ամենամեծ հաջողությունն էր ինձ համար, երբ հնարավորություն ստացա երգելու Բարբրա Սթրեյզանդի հետ:

Երբ փոքր էի ու հեռուստացույցով տեսնում էի նրան, երազում էի երբևէ տեսնել նրան թեկուզ հեռվից, թեկուզ որևէ համերգի ժամանակ»: Երբ Բարբրա Սթրեյզանդը Սելին Դիոնին ասում է, որ հիանալի ձայն ունի, Սելինը սկսում է արտասվել:

1999-ին Սելինի ամուսնու’ Ռենե Անժելիլի մոտ բժիշկները կոկորդի ուռուցք են հայտնաբերում: Տեղի է ունենում այն, ինչին չէր հավատում անգամ ինքը’ երգչուհին: Նա որոշում է թողնել բեմը և նվիրվել ընտանիքին: «Ես թողեցի բեմն ու դարձա խնամակալ ամուսնուս համար: Ես ամբողջովին հրաժարվել էի երգից: Դուրս չէի գալիս տնից, չէի հանդիպում ոչ ոքի, միայն ամուսնուս կողքին էի»:

Երկար ժամանակ քիմիաթերապիա անցնելուց հետո Ռենեն սկսում է առողջանալ: Բժիշկները հավատացնում էին զույգին, որ նրանք այլևս չեն կարողանա երեխա ունենալ: Սելինի երազանքները մի վայրկյանում հօդս են ցնդում: Բայց նրանք չեն հանձնվում:

Սելինն իմացավ իր հղիության մասին հենց այն օրը, երբ բժիշկները հայտարարեցին, որ իր ամուսինն ամբողջովին առողջ է: «Ինձ թվում է՝ ես բնությունից տրված երջանկություն ունեմ: Խոսքն այն փոքրիկ հաջողությունների մասին չէ, ինչպես պլատինե ալբոմը կամ ճանաչվածությունը, այլ իսկական երջանկության մասին, որ միշտ հանկարծակիի է բերում քեզ: Այն կարծես երկնքից թափվում է վրադ: Ես երբեք դա այդքան լավ չեմ գիտակցել, ինչպես 2001 թվականին»:

2001 թ. հունվարի 25-ին Սելին Դիոնն ու Ռենե Անժելիլը դառնում են մի հրաշք բալիկի ծնողներ: Երեխային կնքում են հենց այն եկեղեցում, որտեղ 7 տարի առաջ երդվել էին սիրել միմյանց:

2 տարվա դադարից հետո Սելին Դիոնը վերադառնում է ստեղծագործական կյանք: Սկսվում են համերգները, հարցազրույցներն ու շոուները: «Աննկարագրելի զգացում է, երբ հանդիսատեսը ոտքի է ելնում քո կատարումից: Ես նորից զգացի այն ջերմությունը, առանց որի թվում էր’ չէի կարող անգամ մեկ օր»: Վերադառնալով առաջվա գրաֆիկին և նունիսկ ավելի ծանրաբեռնելով այն’ Սելինը մոռանում է սեփական առողջության և նույնիսկ փոքրիկի հետ ժամանակ անցկացնելու մասին: «Ես կարոտում էի փոքրիկիս: Գրեթե միշտ տեսնում էի նրան քնած: Հաճախ գիշերները չէի քնում և ժամերով նայում էի փոքրիկիս ու արտասվում»:

2000թ. սկսած 10 տարվա ընթացքում Սելին Դիոնը թողարկում է 10-ից ավելի ալբոմներ, արժանանում «Գրեմմի», «Ֆելիքս» և World music awards մրցանակների: 2004 թ. հունվարի 6-ին Հոլիվուդի փառքի ծառուղում Սելին Դիոնը ստացավ իր անունով աստղը և նվիրեց այն հորը, որը չհասցրեց ներկա գտնվել այդ արարողությանը’ մահանալով ընդամենը մի քանի օր առաջ:

2010 թ. Սելինն ու Ռենեն հայտնում են հանրությանը, որ երեխաների են սպասում: Այո, երեխաների’ զույգ տղաների: 42 տարեկանում Սելինը դարձավ զույգ տղաների մայր: «Մեր սերն այնքան մեծ է, որ ուզում ենք բոլորը դա զգան: Մեր երեխաները մեծանում են ամենաանկեղծ սիրո ու հոգատարության մեջ»:

Սելին Դիոնի ճանապարհը դեպի համաշխարհային ճանաչում շատ հարթ է եղել, բայց ոչ դյուրին: Նրա տաղանդը գնահատել են ամենուր: Սակայն քիչ չեն եղել խոչընդոտները: Նրա ընտանեկան կյանքը միշտ բուռն քննարկումների առիթ է եղել: Նրա ամուսնուն երկու անգամ մեղադրել են բռնաբարության մեջ, սակայն երկու անգամ էլ անմեղ ճանաչել: «Մարդիկ չարացել են: Բայց հակառակ բոլորին’ մենք միասին ենք լինելու: Մենք ապացուցեցինք բոլորին, որ իմ ամուսինը հավատարիմ է ինձ: Մեր սերն այնքան փորձությունների միջով է անցնել, որ մենք հիմա միայն ուժ ենք ստանում’ հաղթահարելով խոչընդոտները»: Հայտնի Forbes ամսագիրը Սելին Դիոնին դասել է ամենաշատ վաստակող կանանց ցուցակում, որտեղ Օփրա Ուինֆրիից և Մադոննայից հետո 3-րդ տեղում Սելին Դիոնն է, որի տարեկան եկամուտը կազմել է 100 միլիոն ԱՄՆ դոլար:

Իմ ձայնը կապող օղակ է իմ էմոցիաների, հոգու, մտքերի, երազանքների և արտաքին աշխարհի միջև: Նա է իմ հաղթանակների և երջանկության աղբյուրը:
Ես շատ վաղ եմ սովորել մարդկանց հանդպես սիրալիր լինել: Ինձ սովորեցրել են ծնողներս, այն մարդիկ, ում հետ աշխատել եմ: Հիմա դա իմ բնավորության մի մասն է:
Իմ կյանքում երկու կին կա, որոնք ինձ համար իդեալական են և օրինակ: Անձնական կյանքում մայրս է, իսկ շոու բիզնեսում՝ Բարբրա Սթրեյզանդը, որն ինձ համար աշխարհի ամենահետաքրքիր երգչուհին է:
Ես երջանիկ աստղի տակ եմ ծնվել:

Ես շատ փոքր բերան ունեմ, բարակ շուրթեր, մեծ քիթ: Մի հոնքս ավելի ներքև է և հաստ, քան մյուսը: Ես միշտ երազել եմ ունենալ ավելի կլոր դեմք, մարգարտե ճերմակությամբ ատամներ… Բայց ինձ դուր են գալիս իմ մազերը և ոտքերը: Ես նույնիսկ լսել եմ, որ գեղեցիկ մեջք ունեմ: Այնպես որ հուսահատվել չեմ պատրաստվում:
Ամենից առաջ ես կին եմ: Ուզում եմ ազատ ժամանակ, որպեսզի բաց աչքերով նայեմ կյանքին: Ուզում եմ ապրել ամեն վայրկյանով, զգալ ակնթարթը, որպեսզի ապրեմ կյանքի այն փոքր ուրախությունները, որոնցից զրկել է ինձ կարիերաս:
Իմ կյանքը հեքիաթ է, և ես դա գիտեմ…