ՏՈՒԳԱՆԵԼՈՎ ԲՅՈՒՋԵ ԵՆ ԼՑՆՈՒՄ

Գյումրու Շահումյան փողոցի «Պինգվին» տոնավաճառում  հագուստ եւ կոշիկ վաճառող առեւտրականները վերջին շրջանում պարբերաբար բողոքի ակցիաներ են կազմակերպում: Օրերս նրանք նաեւ գործադուլ են  հայտարարել: Խնդիրն այն է, որ վերջերս առեւտրականների նկատմամբ հարկայինի կողմից խոշոր չափի գումարային տուգանքներ են կիրառվել: Հարկային  մարմինները նաեւ սպառնացել են, որ եթե տուգանքները «սուսուփուս»  չվճարեն, իրենք  ընդհանրապես  կդադարեցնեն  մանր ձեռնարկատերերի  գործունեությունը:  Այս սպառնալիքները ոտքի են հանել առեւտրականներին: Նրանք իրենց դժգոհությունները հայտնել են  Գյումրու հարկային տեսչության նորանշանակ պետ Թելման Ասատրյանին, սակայն վերջինս   ոչ միայն  չի պատասխանել ձեռնարկատերերի հարցերին, այլեւ  իր աշխատողներին հանձնարարել է բոլորին դուրս հանել շենքից: Ըստ առեւտրականների`  Գյումրու հարկային տեսչության աշխատակիցները բյուջեն  որեւէ կերպ լցնելու նպատակով պարբերաբար  մտնում են հագուստի տոնավաճառ եւ  պատրվակներ փնտրում տուգանքներ կիրառելու համար: Արդեն 12 մանր ձեռներեց 150-170 հազար դրամի չափով տուգանվել է: Գյումրեցի առեւտրականները նշում են, որ առանց այն էլ իրենց հարկային պարտավորությունները բարեխղճորեն կատարում են, ամեն ամիս հարկայինին վճարում են առեւտրից  ստացված եկամտի 11 տոկոսը: «Հարկայինը զզվեցրել է, հերիք է էլի՛, անօրինական կմտնին բազար ու նալոգը կդնեն մեր վրա, կսեն բերիք՝ լավ, չէ , ուրեմն փակե՛ք գնացե՛ք: Օր փակեցի, Հայաստանից կերտամ: Եթե չպիտի կրնամ տունս ու երեխեքիս պահեմ, մնամ ի՞նչ էնեմ»,-«Ժողովուրդ»-ի հետ զրույցում նշեց առեւտրական Վահագ Առաքելյանը:  Փորձեցինք պարզաբանում ստանալ նաեւ Գյումրու  հարկային տեսչությունից: Պետի տեղակալ Աշոտ Ավագյանի փոխանցմամբ` հարկայինն անցած ամիս հաշվել է առեւտրականների ստացած եկամտի չափը եւ յուրաքանչյուր տաղավարի ընդհանուր ֆինանսական շրջանառությունն ու հանգել  այն եզրակացության, որ մանր ձեռներեցները համեմատաբար քիչ են  հարկ վճարում: Ուստի  հարկերի հավաքագրման բացը որոշել է լրացնել տուգանքների միջոցով. «Հակառակ դեպքում պետական բյուջե քիչ գումար կգնա, հարկայինն էլ իր գործառույթները թերի կատարելու համար նկատողություն կստանա»,-անկեղծանում է Աշոտ Ավագյանը:«Ինչո՞ւ է հարկայինը հաշվում հենց մեր գումարները եւ ինչո՞ւ է մեր ստացած եկամտի հաշվին համալրում պետական բյուջեն: Ուղղակի ուզում են  մանր բիզնեսը տապալել, ուրիշ ոչինչ»,-կարծում է ձեռներեց Արեւհատ Պետրոսյանը: Տոնավաճառի աշխատակիցները  հարկային մարմիններին   հորդորում են խախտումներ չփնտրել իրենց մոտ եւ  հիշեցնում, որ  այլեւս չեն հանդուրժի կառույցի կամայականությունները:ԱՐՄԵՆՈՒՀԻ ՎԱՐԴԱՆՅԱՆԳյումրի