ԱՄՆ-ի եւ Ֆրանսիայի կողմից Սիրիայի նկատմամբ ուժի կիրառման հավանականության օրըստօրե մեծացման ֆոնի վրա էապես փոխվում է տարածաշրջանային զարգացումների հեռանկարը` մոտենալով տարածաշրջանային պատերազմի բռնկման վտանգի շեմին: Այս մասին հայտարարություն է տարածել ,Նախախորհդարանիե քարտուղարությունը:
Հայտարարությունում նաեւ ասվում է.
“Նման իրավիճակը հղի է առաջին հերթին Սիրիայի, հնարավոր է նաեւ` տարածաշրջանի այլ երկրների բնակչության, այդ թվում` տեղի հայության համար հումանիտար աղետի սպառնալիքով:
Հայաստանի կառավարող վարչախմբի հանցավոր անգործության եւ դավաճանական կեցվածքի պատճառով սիրիահայությունը հայտնվում է լքված պատանդի վիճակում:
Եթե սիրիական հակամարտության անցնող փուլերում Սիրիայի հայ բնակչության համար շատ առումներով առաջնային էին մնում կեցության եւ սննդի հարցերը, ապա ԱՄՆ-ի հարձակման, դրանով պայմանավորված` կառավարական զորքերի ու ապստամբների զորաշարժերի եւ բախումների էական ակտիվացման, ինչպես նաեւ խաժամուժի լիակատար սանձազերծման հետեւանքով ամենայն հավանականությամբ առաջին պլանում կհայտնվի սիրիահայերի ֆիզիկական գոյության հարցը:
Հայոց Ցեղասպանության հարյուրամյակի շեմին դեռեւս Սիրիայում ապրող` Դեր Զորից փրկված նախնիների տասնյակ հազարավոր զավակների ֆիզիկական գոյությունը կրկին վտանգված է:
Այս պատճառով այլեւս ստեղծված իրավիճակից դուրս գալու միակ տարբերակը մնում է սիրիահայության զանգվածային տարհանումը` ցանկալի է դեպի Հայաստան:
Մեր ազգային ճակատագրի համար բախտորոշ զարգացումների այս փուլում Հայաստանի ու արտերկրահայ բոլոր առողջ ուժերից պահանջվում է հավաքական քաղաքական կամքի դրսեւորում եւ դրա արդյունավետ պարտադրում ապազգային վարչախմբին` նրա ձեռքի տակ եղած լծակները սիրահայության տարհանման ու դեպի Հայաստան փոխադրման խնդիրների լուծման համար:
Այս գործընթացը քիչ թե շատ հաջող կերպով կազմակերպելու պարագայում պետք է հաշվի առնել, որ սիրիահայերը Հայաստան են գալու որպես փախստականներ, ուստի հարկ կլինի ամեն կերպ ապահովել նրանց նկատմամբ միջազգային իրավունքի համապատասխան նորմերի կիրառումը եւ ՄԱԿ-ի աջակցությունը:
Միեւնույն ժամանակ պետք է նաեւ նկատի ունենալ, որ սիրիահայերը, որպես հայրենիք եւ իրավունքներ կորցրած նախնիների հետնորդներ, կարող են որեւէ այլ, առաջին հերթին` իրենց հայրենակիցների իրավազորության տակ գտնվող տարածքում համատեղ ապրելու եւ իրենց իրավունքները վերականգնելու հավակնություն ունենալ, ինչը հիմք կտա նրանց բնակեցնելու նաեւ Արցախի ազատագրված տարածքներում:
Նախախորհրդարանը դատապարտում է Սիրիայում ռազմաքաղաքական իրավիճակի սրացմանն ուղղված քայլերը, իսկ հայությանը կոչ է անում գործել ազգային շահի գերակայության գիտակցմամբ եւ համազգային ինքնակազմակերպման միջոցով ապահովել սիրիահայության տարհանումը դեպի հայրենիք”:
.gif)
