«Էրեբունի» պատմահնագիտական արգելոց թանգարանը հյուրընկալել է «Հին Երևան» լուսանկարների ցուցահանդեսը

«Էրեբունի» պատմահնագիտական արգելոց թանգարանն իր բացօթյա տարածքը «Թանգարանային գիշեր» միջոցառման շրջանակներում տրամադրել է Երևանի տարբեր թանգարանների, որոնք բացօթյա ցուցադրության հնարավորություն չունեն: «Արմենպրես»­ի հաղորդմամբ՝ ԻԿՕՄՕՍ-­ի Հայաստանի նախագահ, «Էրեբունի» պատմահնագիտական արգելոց­թանգարանի տնօրեն Գագիկ Գյուրջյանը մայիսի 21-­ին հրավիրված ասուլիսում նշեց. «Քանի որ այս տարի Թանգարանների միջազգային օրվա կարգախոսն է «Թանգարանները և մշակութային լանդշաֆտները», ցանկանում են ԻԿՕՄՕՍ­ի կարգախոսին համահունչ միջոցառում անցկացնել:

Երևանի թանգարանների մեծ մասը չունեն իրենց բացօթյա տարածքը, ուստի մենք որոշեցինք Երևանի թանգարանների ցուցահանդեսը անցկացնել «Էրեբունի» մշակութային լանդշաֆտում»: Բացօթյա հատվածում ներկակացվում է «Հին Երևան» լուսանկարների ցուցահանդես, իսկ ժամանակավոր ցուցադրությունների սրահում` Երևանի Ժամանակակից արվեստի թանգարանի գործերը, որոնք ստեղծվել են Հայաստանի Հանրապետության անկախության տարիներին: Գյուրջյանը նշեց նաև, որ կազմակերպվելու են Անկախության 25-­րդ տարեդարձ առիթով միջոցառումներ:

1977 թվականից ի վեր մայիսի 18-­ը՝ «Թանգարանների միջազգային օրը» համախմբում է աշխարհի 5 մայրցամաքների, ավելի քան 30 հազար թանգարանների` կոչ անելով տարվա համար առաջարկված թեմայի շրջանակում հանդես գալ հատուկ միջոցառումներով ու նախաձեռնություններով: Յուրաքանչյուր տարի առաջադրվում է օրվա խորհրդին առնչվող որևէ յուրահատուկ թեմա, ինչը հնարավորություն է տալիս շեշտելու թանգարանների գործունեության բազմազանությունը: Այս տարվա կարգախոսն է` «Թանգարանները և մշակութային լանդշաֆտները»: «Թանգարանների գիշեր» ծրագիրը մեկնարկել է 2005 թվականից՝ ԻԿՕՄ­ի, ՅՈՒՆԵՍԿՕ­ի և Եվրախորհրդի հովանավորությամբ:

Օրվա նպատակն է բարձրացնել թանգարանների դերը հասարակության սոցիալ­մշակութային կյանքում, ստեղծել նպաստավոր միջավայր՝ թանգարանային առարկաների հանրահռչակման համար: Գարնանային ակցիային այս տարի մասնակցում է Հայաստանում գործող շուրջ 112 թանգարան: