Երիտասարդ կենսաբանների ասոցիացիան Երևանի Անգլիական այգում նշել է Կենսաբազմազանության միջազգային օրը

Ամբողջ աշխարհում մայիսի 22­-ին նշվող Կենսաբազմազանության միջազգային օրվա կապակցությամբ «Երիտասարդ կենսաբանների ասոցիացիա» ՀԿ­ն (ԵԿԱ) կազմակերպել էր «Տարվա կենսաբազմազանությունը 2016» հանրային արշավը, որի ամփոփիչ միջոցառումը տեղի ունեցավ Երևանի Անգլիական այգում: Ինչպես «Արմենպրես»­ին տեղեկացրին ԵԿԱ­ից, միջոցառման շրջանակներում կազմակերպվել էր ցուցահանդես, որի ընթացքում տեղեկատվական վահանակների միջոցով ներկայացվել են հանրային քվեարկությանը մասնակցող տեսակները:

Հաղորդագրության մեջ նաև նշվում է. «Ամփոփելով հանրային քվեարկության արդյունքները, նշենք, որ տարվա բույս է ճանաչվել Նշենի նաիրյանը (Prunus dulcis), կենդանի՝ Սև ապոլոն թիթեռը (Parnassius mnemosyne), քարաքոս՝ Ռիզոկարպոն աշխարհագրականը (Rhizocarpon geographicum), սունկ՝ Ականջասունկ տափաստանայինը (Pleorotus eringii): Ցուցահանդեսի ժամանակ ներկայացվեցին նաև լուսանկարչական մրցույթի մասնակիցների (կենդանու, բույսի, քարաքոսի և սնկի) լուսանկարները և քվեարկության միջոցով ընտրվեցին երեք լավագույն լուսանկարները: Հաղթողները պարգևատրվեցին մրցանակներով: Միջոցառման ընթացքում ցուցադրվեցին նաև պրոֆեսիոնալ լուսանկարիչների աշխատանքները, որոնք վերաբերվում էին ՀՀ կենսաբազմազանությանը:

«Տարվա կենսաբազմազանությունը 2016» հանրային արշավի ընթացքում կազմակերպվել էին նաև Հայաստանի կենսաբազմազանության վերաբերյալ սեմինար­քննարկումներ Երևանի «Օհանյան», «Մխիթար Սեբաստացի» և «Փոքրիկ իշխան» կրթահամալիրներում: