Մինչեւ այս պահը կարելի չեղաւ ճշդել Աթէշեան Սրբազանի Երեւան գալու ճակատագիրը: «Արեւելք» այս առումով փորձեց կապ հաստատել Պոլսոյ Պատրիարքարանի հետ, սակայն մեր բոլոր հեռախօսազանգերը մնացին անպատասխան: Ըստ մեր Պոլսոյ աղբիւրին, Արամ Սրբազան ներկայիս կը գտնուի Մոսկուա, սակայն ան այնտեղ կիրակի օր մատուցուած Սուրբ Պատարագին ներկայ չէ եղած: Տարբեր աղբիւրներ կը նշեն նաեւ, որ Արամ Սրբազան մտահոգուելով Երեւանի մէջ տիրող ընդհանուր դրութիւնէն, որոշած է մասնակից չդառնալ Հռոմի Պապի Հայաստան տալիք այցին եւ յարմար նկատած վերադառնալ Պոլիս:
Ուրեմն ցարդ յստակ չէ Արամ Սրբազանի վաղը՝ 22 յունիսին «Զուարթնոց» օդակայան հասնիլը, բայց եւ այնպէս, եթէ պատահի, որ Սրբազանը յաջողի անաղմուկ կերպով Երեւան մուտք գործել, չէ բացառուած, որ անոր գալուն դէմ օդակայանի առջեւ նախատեսուած բողոքի հաւաքը տեղափոխուի Մայր Աթոռ՝ Սուրբ Էջմիածին: Նշենք, որ վաղը Պոլսոյ Գում Գաբու շրջանին մէջ գտնուող Պոլսոյ Հայոց Պատրիարքարանի մայր մուտքին դիմաց տեղի պիտի ունենայ բողոքի հաւաք, ուր Արամ Սրբազանի գործունէութեան դէմ եղող համայնքային գործիչներ ելոյթներ պիտի հնչեցնեն: Կը սպասուի նաեւ, որ կազմակերպիչ մարմնին անունով խօսքով հանդէս գայ պոլսահայ իրաւաբան եւ հասարակական գործիչ՝ Թադէոս Պէպէք:
.gif)
