ԱԺ ԲՀԿ խմբակցության անդամ Արմեն Ավետիսյանը «Ժողովուրդ»-ի հետ զրույցում նշեց, որ ինքը ԲՀԿ քաղխորհրդի անդամ է եւ հաճախ է հանդիպում Գագիկ Ծառուկյանի հետ: -Պարո՛ն Ավետիսյան, գրեթե մեկուկես տարի է, ինչ Դուք խորհրդարանում եք, խնդրում եմ նշել, թե ինչ եք արել այս ընթացքում եւ օրենսդրական ինչ նախաձեռնությամբ եք պատրաստվում հանդես գալ: -Ես բնապահպանության եւ գյուղատնտեսական հանձնաժողովի անդամ եմ եւ ընդհանրապես զբաղվում եմ գյուղատնտեսական եւ բնապահպանական աշխատանքներով: Կոնկրետ այս պահին նախագիծ չունենք, բայց աշխատում ենք 2 նախագծի վրա: -Իսկ չե՞ք պատրաստվում ինքներդ առանձին նախագիծ ներկայացնել: -Ո՛չ, որովհետեւ նախագիծը պարունակում է այնպիսի ոլորտներ, որ մենակով հնարավոր չէ ներկայացնել: -Դուք նախկինում եղել եք Մեդովկայի գյուղապետի տեղակալը, դժվա՞ր չէ այդ պաշտոնից տեղափոխվել խորհրդարան ու զբաղվել օրենսդիր գործունեությամբ: -Այո՛, օրենսդիր գործունեությամբ, բայց ես հենց սկզբում նշեցի, որ ես գյուղատնտեսության եւ բնապահպանության հանձնաժողովում եմ ընդգրկված, ու դժվար չէ, քանի որ այնտեղ մասնագիտական հարցեր կան, ու լուրջ աշխատանքներ են իրականացվում: Ես ինձ ԱԺ-ում զգում եմ այնպես, ինչպես պետք է պատգամավորն իրեն զգա խորհրդարանում: -Իսկ ԲՀԿ առաջնորդ Գագիկ Ծառուկյանը գո՞հ է Ձեր կատարած աշխատանքներից: -Կներեք, բայց այդ հարցը խնդրում եմ ուղղել Գ. Ծառուկյանին: -Դուք անձամբ կարողանո՞ւմ եք հանդիպել Գ. Ծառուկյանի հետ, կնշե՞ք, թե ինչ հարցեր եք քննարկում նրա հետ: -Ներկուսակցական հարցեր: Ես ԲՀԿ քաղխորհրդի անդամ եմ, պարոն Ծառուկյանի ուշադրության կենտրոնում մշտապես գյուղատնտեսության ոլորտն է: -Վերջին անգամ ե՞րբ եք հանդիպել Գ. Ծառուկյանի հետ եւ ի՞նչ հարցեր եք քննարկել: -Մոտակա ժամանակներս՝ երեւի մոտ 1 ամիս առաջ: Քննարկել ենք տարբեր հարցեր, բայց գյուղատնտեսության հարցերը մշտապես պարոն Ծառուկյանի ուշադրության կենտրոնում են: Ինքը գյուղատնտեսությանը շատ բարձր տեղ է տալիս, այսինքն՝ տեխնիկայով է աջակցում եւ այլն: