ՊԱՅՔԱՐՈՒՄ ԵՆ ՊՐԻՄԻՏԻՎ ԳՈՂՈՒԹՅԱՆ, ԱՅԼ ՈՉ ԹԵ ԳՈՂԵՐԻ ԴԵՄ

ՀՀ կառավարության վերջին նիստում նորանշանակ վարչապետ Կարեն Կարապետյանը հայտարարել էր, թե ավիատոմսերի գնումների ոլորտում ներդնելու են բավական բարդ համակարգ, որպեսզի վերացնեն պրիմիտիվ գողությունը.«Մեր նպատակն է վերացնել պրիմիտիվ գողությունը: Բոլորդ Ձեր համակարգերում կարգի բերեք: Ինձ զեկուցել են, թե մինչեւ այժմ ինչ մեխանիզմներ են գործել, որն ուղղակի ֆանտազիայի ժանրից է»,- ասել էր նա: Թե ում նկատի ուներ Կ. Կարապետյանը եւ արդյոք խոսելով պրիմիտիվ գողության վերացման մասին՝ այդպիսով նա չէր ակնարկում, որ այսուհետ գողությունը պետք է կատարել ոչ պրիմիտիվ ձեւերով. այս եւ այլ հարցերի շուրջ «Ժողովուրդ»-ը զրուցել է ԱԺ ՀՀԿ խմբակցության պատգամավորների հետ:

ՀՀ ԱԺ ՀՀԿ խմբակցության պատգամավոր Արտակ Սարգսյան /Սասի Արտակ/
-Պարո՛ն Սարգսյան, ըստ Ձեզ՝ ում նկատի ուներ նորանշանակ վարչապետը՝ գող ասելով:
Լռում է ու ժպտում:
-Արդյոք նկատի ուներ նախկին վարչապետ Հ. Աբրահամյանին կամ նախկին նախարարներին, օրինակ՝ Սերգո Կարապետյանին, Գագիկ Բեգլարյանին եւ մյուսներին:
Լռում է ու ժպտում:
-Ըստ Ձեզ, կարո՞ղ է նորանշանակ վարչապետը, խոսելով պրիմիտիվ գողության վերացման մասին, ակնարկում է, որ գողանալուց պետք է անել ոչ պրիմիտիվ ձեւերով:
Լռում է:

Բնապահպանության նախկին նախարար, ԱԺ ՀՀԿ խմբակցության պատգամավոր Վարդան Այվազյան
-Պարո՛ն Այվազյան, նորանշանակ վարչապետ Կ. Կարապետյանը հայտարարել էր, թե ավիատոմսերի գնումների ոլորտում ներդնելու են բավական բարդ համակարգ, որպեսզի վերացնեն պրիմիտիվ գողությունը: Ո՞վ է, ըստ Ձեզ, գողը, ո՞ւմ նկատի ուներ վարչապետը:
-Պրիմիտիվ գողության մասին ինքը հայտարարեց պրիմիտիվ գողություն անողներին:
-Իսկ ովքեր են, ըստ Ձեզ, այդ պրիմիտիվ գողերը:
-Գիտեք, Դուք մի քիչ ծայրահեղացնում եք, Դուք ուզում եք՝ ես անձեր անպայման ասեմ:
-Իհարկե, կառավարության ղեկավարը հրապարակավ կառավարության անդամներին կոչ է անում վերացնել պրիմիտիվ գողությունը, ասել է թե՝ սա հաղորդում է հանցագոծության մասին: Բա չիմանանք, թե մեր տված հարկերից վարձատրվող որ նախարարն է եղել այդ գողը, կամ գուցե նախկին վարչապետը, աշխատանքից ազատված նախկին նախարարները…
-Եկեք մի քիչ հարգալից վերաբերվենք. սկսած մեր պետության բարձրաստիճան ներկա ու նախկին պաշտոնյաներից, ավարտած վերջին քաղաքացիով: Ինչի ենք մենք մտածում… Ինքը պրիմիտիվ գողություն անվանեց այն տարբերակով, երբ որ մարդիկ կարող են խաղարկել ավիատոմսի թանկ եւ էժանի միջեւ: Դուք ինչ եք մտածում՝ նախարարներից որեւէ մեկը ունակ է կամ պետական պաշտոնյաներից որեւէ մեկը ունակ է 500 դոլարանոց տոմսի փոխարեն առնի 300 դոլորանոց եւ ցույց տա 500 դոլար:
-Իսկ Դուք կարծո՞ւմ եք, որ այդպես չէ: Ի վերջո, Կ. Կարապետյանը, կարծես թե, հակառակ կարծիքին է, եթե հայտարարում է, որ պետք է վերջ տալ այդ երեւույթին:
-Ես դա բացառում եմ: Պետական կառավարման համակարգում աշխատում է մինչեւ 10 հազար մարդ, երբ որ ինքը խոսում է պրիմիտիվ գողության մասին, ասում է պրիմիտիվ անձնավորությունների մասին:
-Այսինքն՝ բարձրաստիճան անձա՞նց նկատի չի ունեցել, օրինակ՝ Հ. Աբրահամյանին, ԳՆ Ս. Կարապետյանին…
-Ձեզ սենսացիա է պետք, որ ասեմ էսինչյան էսինչին: Հարցը գնում էր նրա մասին, որ սրանից հետո ավիափոխադրումներ իրականացնելու կամ ուղեւորություն կատարելու ժամանակ, որ գործուղում ես գնում, ստեղծում եք մեկ հարթակ: Այսինքն՝ ստեղծում եք մեկ էլեկտրոնային սայթ, որից գնումներ իրականացնելու պարագայում իրականացնում ես դրա միջոցով:
-Իսկ գուցե նորանշանակ վարչապետը ակնարկում էր, որ գողանալուց պետք է կարգին, ոչ պրիմիտիվ անել:
-Եթե լրատվամիջոցներում այդ տեսակետն է պտտվում, դա նման է մոտավորապես Քրիստոսի պատվիրանների պես ասված մի բանի, այսինքն՝ ոչ մի անգամ չեք ուզում լավը տեսնել, կլինի որ մի քիչ էլ լավը տեսնեք :Ինչու եք այդպես մտածում՝ գողացեք մեծ չափով: Համենայնդեպս, ինքը կարգավորման մեխանիզմ է մտցնում:
-Կարգավորման մեխանիզմը պրիմիտիվ գողերին կզսպի՞:
-Կոռեկտ չէ Ձեր հարցը, հիմա Ձեր հարցադրմանը չպատասխանեի, կնեղանայիք, չէ: Սրանից հետո բացահայտ հայտարարում ենք, որ պետք է գնումները կատարենք էլեկտրոնային եղանակով եւ ցանկացած լրագրող, որ ուզենա, կարող է դա տեսնել:

Աժ ՀՀԿ խմբակցության պատգամավոր Հակոբ Հակոբյան /Թունելի Հակոբ/
-Պարո՛ն Հակոբյան, ում նկատի ուներ Կ. Կարապետյանը պրիմիտիվ գողության մասին խոսելով, ո՞վ է գողը:
-Ասենք՝ Կարեն Կարապետյանը խոսք է ասել, եւ ես որոշեմ, թե ում է ասում:
-Փաստ է մեկ բան, որ վարչապետը կառավարությունում պրիմիտիվ գողեր է հայտնաբերել, չիմանանք, թե ում նկատի ուներ:
-Չունեմ տեսակետ: Խնդիրը ներկայացվել էր, որպեսզի հեշտացվի, կամ ճանապարհները, որոնք տանում են կառավարության կողմից ընդունված սկզբունքների խախտմանը, դրա դեմն առնվի: Իսկ թե ում նկատի ուներ կամ ինչ նպատակ ուներ, Կ. Կարապետյանի ասածը չեմ կարող մեկնաբանել, ինքը կարող է ասել:
-Ամեն դեպքում, կառավարության անդամների գերակշիռ մասը Ձեր կուսակից ընկերներն են, նրանց մեջ պրիմիտիվ գողություն անողներ կա՞ն:
-Պրիմիտիվ գողեր կան, թե չէ, եթե հարցը այդպես է, ուղղակի չգիտեմ:
-Ըստ Ձեզ՝ կարող է նորանշանակ վարչապետը, խոսելով պրիմիտիվ գողության մասին, ակնարկում է, որ գողանալուց պետք է կարգին գողանալ:
-Այս հարցը պետք է տալ այլ ատյաններում, ոչ թե ինձ: Ես հասկացա, որ փորձում են գողության դեմ պայքարել, ոչ թե գողերի:
-Դե, բայց եթե պրիմիտիվ գողությունը կա, ուրեմն գողերն էլ կան:
-Չէ, գողությունը լինում է տարբեր տեսակի, եղավ: /Ծիծաղելով մտնում է իր աշխատասենյակ/:

Զրուցեց ՔՆԱՐ ՄԱՆՈՒԿՅԱՆԸ

«ԻՆՁ ՁԵՐԲԱԿԱԼԵԼԸ ԽԱՅՏԱՌԱԿ ԴԵՊՔ ԷՐ»

Սեպտեմբերի 24-ին Հայաստանի քաղաքագետների միության նախագահ Հմայակ Հովհաննիսյանին բերման էին ենթարկել ոստիկանության Էրեբունու բաժանմունք` ասելով, որ նրա նկատմամբ հետախուզում է հայտարարված: Սակայն մինչ այդ ոստիկանները Հովհաննիսյանին հեռախոսով տեղեկացրել էին, որ անհրաժեշտ է հանդիպել` պարզելու 2015 թ. սահմանադրական հանրաքվեի ընթացքում ընտրակեղծարարության փաստերի վերաբերյալ ոստիկանություն ներկայացված նրա հաղորդման մանրամասները: «Ժողովուրդ»-ը կատարվածի մասին զրուցել է Հմայակ Հովհաննիսյանի հետ:

-Պարո՛ն Հովհաննիսյան, ո՞րն էր Ձեզ ձերբակալելու նպատակը:
-Խայտառակ դեպք է դա: Ես եթե մանրամասնեմ, պարզ երեւում է, որ նպատակ ունեին կտրող-ծակող իր ավելացնել իմ մոտ եղած իրերին: Բանը հասավ նրան, որ գուցե ընդհարում լիներ: Սակայն մինչ այդ ես զանգահարել էի Աշոտ Մանուչարյանին եւ խնդրել նրան տեղյակ պահել Արցախում դիրքերը պահող, քաղաքագետների միության վաստակը արժեւորող մեր ընկերներին, որ ես այսպիսի իրավիճակում եմ հայտնվել: Եվ միայն նրանց միջամտությամբ այդ ծրագիրը խափանվեց: Անգամ ֆիզիկական ընդհարման էր հասնում: Որեւէ ծանուցում չեմ ստացել իմ հետախուզման մեջ լինելու մասին: Ես ապրում եմ մի շենքում, որի բակում շաբաթը մեկ անգամ հավաքվում է ոստիկանությունը, ես միշտ անցնում եմ նրանց կողքով: Նրանք կարող էին մոտենալ ինձ եւ ասել, որ հետախուզման մեջ ես, հետեւի՛ր ինձ: Սա խայտառակ երեւույթ է:
-Լավ, իսկ ինչի՞ հետեւանքով առաջացավ ընդհարումը, որի մասին խոսում եք:
-Նրանք ասում էին՝ քեզ մոտ եղած պարագաները պետք է վերցնենք: Թող իրավաբանները ասեն, թե դա ինչ է նշանակում: Ասեցի՝ սրանք իմ իրերն են, որտեղ որեւէ վտանգավոր բան չկա: Ասում են՝ չէ, հիմա մենք դա կվերցնենք, հետո կվերադարձնենք: Ինձ մոտ եղել է միայն գումար, բանալիներ, կրակայրիչ, հեռախոս: Ես էլ ասացի՝ դուք վերցնելու եք, հետո ավելացնեք մի դանակ, ասեք՝ սա էլ է եղել քո իրերի մեջ, եւ ես ոչինչ դրանից հետո չէի կարող ապացուցել, որից հետո ինձ ձերբակալելու էին: Սա էր ծրագիրը:
-Այդ ժամանակ Ձեզ ասացի՞ն, թե որն էր Ձեր նկատմամբ հետախուզում հայտարարելու պատճառը:
-Հետախուզում են հայտարարել եւ բերման ենթարկել նրա համար, որ ես դատական վճիռը չեմ կատարում: Դատարանի վճիռն էլ աբսուրդ է: Ես պատգամավորության թեկնածու էի, «Հայհիդրոնախագիծ» ՓԲԸ բակում մոտեցել եմ կանանց եւ նրանց անպատվել եմ: Տեսանյութը կա, որտեղ պարզ երեւում է, որ դա տեղի է ունեցել քաղաքագետների միության շքամուտքի դիմաց, երբ արգելափակվել է իմ մուտքը իմ նախընտրական շտաբ: Հետագայում պարզվեց, որ գործը վերահսկող դատախազը Արտաշես Գեղամյանի որդին է:

Զրուցեց ՎԱՀԱԳՆ ՀԱԿՈԲՅԱՆԸ

ՀՐԱՎԵՐԸ՝ ԽԱԽՏՈՒՄՈՎ
«Ժողովուրդ»-ը պաշտոնական փաստաթղթերից տեղեկացավ, որ ՀՀ արդարադատության նախարարության քրեակատարողական վարչությունը շրջանակային համաձայնագրերի միջոցով գնել է շինանյութ: Սակայն ՀՀ ֆինանսների նախարարության գնումների աջակցման կենտրոնը բացասական եզրակացություն է տվել: Բանն այն է, որ հայտարարության հայտերի ներկայացման վերջնաժամկետը` այս տարվա հոկտեմբերի 4-ը, չի համապատասխանել «Գնումների գործընթացի կազմակերպման» կարգի 83-րդ կետի 2-րդ ենթակետով սահմանված պահանջներին: Բացի այս, հրավերի 21-րդ եւ 43-րդ չափաբաժիններով ներկայացված գնման առարկաների բնութագրերը չեն համապատասխանել «Գնումների մասին» ՀՀ օրենքի 12-րդ հոդվածի 5-րդ մասով սահմանված պահանջներին:

43 ԱՎԻԱՏՈՄՍ
Ինչպես հայտնի է՝ ՀՀ զինված ուժերի ռադիացիոն, քիմիական, կենսաբանական պաշտպանության զորքերի պետ-վարչության պետ Վարդան Նշանյանի գլխավորած աշխատանքային խումբը սեպտեմբերի 26-28-ը Մինսկում մասնակցել է ՀՀ եւ Բելառուսի պաշտպանության նախարարությունների միջեւ ռադիացիոն, քիմիական, կենսաբանական պաշտպանության ոլորտի համագործակցության հարցերի քննարկմանը: «Ժողովուրդ»-ը պաշտոնական փաստաթղթերից տեղեկացավ, որ այս այցի համար պետական բյուջեից ծախսվել է 15 մլն 50 հազար դրամ: Մեզ հայտնի դարձավ, որ պաշտպանության նախարարությունը օգոստոսի 10-ին պայմանագիր է կնքել «Ավիատուր գրուպ» ընկերության հետ եւ գնել է 43 հատ էկոնոմ կարգի ավիատոմս՝ Երեւան-Մոսկվա-Մինսկ-Մոսկվա-Երեւան ուղղություններով: Նշենք, որ յուրաքանչյուր ավիատոմսի համար վճարվել է 350 հազար դրամ: Թե որքանով է արդարացված 43 անձի մասնակցությունը ինչ-որ քննարկման, թողնում ենք ձեզ:

ՆՈՅԵՄԲԵՐԻՆ ՊԱՏՐԱՍՏ ԿԼԻՆԻ
Երբ հայտնի դարձավ, որ «Քոչվորների համաշխարհային խաղեր» փառատոնին Հայաստանից եւս պատվիրակություն է մասնակցել, ինչի մասին ո՛չ ՀՀ սպորտի եւ երիտասարդության հարցերի նախարարությունը եւ ո՛չ էլ ՀԱՕԿ-ը տեղյակ չեն եղել, հայտարարվեց, որ խնդրին անհրաժեշտ է իրավական լուծում տալ, որպեսզի ապագայում եւս նման դեպքեր չկրկնվեն: Մասնավորապես, ՀՀ սպորտի եւ երիտասարդության հարցերի նախարարությունը հայտարարեց, որ օրենքի նախագիծ է մշակում, որով ֆեդերացիաները պարտավորված կլինեն լիցենզավորվել, եւ ինքնակոչները կզրկվեն իբրեւ ֆեդերացիա հանդես գալու եւ Հայաստանի անունից հանդես գալու հնարավորությունից: «Ժողովուրդ»-ը ՀՀ սպորտի եւ երիտասարդության հարցերի նախարարությունից փորձեց պարզել, թե համապատասխան նախագծի մշակումն ինչ փուլում է: Ի պատասխան՝ նշված գերատեսչության մամուլի խոսնակ Աստղիկ Մարտիրոսյանն ասաց. «Նախագիծը գտնվում է համաձայնեցման փուլում, կառավարության կողմից հավանության արժանանալուց հետո նախատեսվում է նոյեմբերին այն ուղարկել ԱԺ»: