Այս պահին բանակցություններ են ընթանում ճամբարակցիների և «Աշտարակ կաթ»-ի ներկայացուցիչների միջև. ինչ է մանրամասնում մարզպետը

Այսօր  «Ժողովուրդ» օրաթերթն արդեն գրել էր,  որ  սնանկացման եզրին գտնվող «Աշտարակ կաթ» ընկերությունից տուժած աշխատակիցները և գործարանին կաթ մատակարարած գյուղացիները սպառնում են կտրուկ քայլերի դիմել: Ճամբարակի քաղաքապետ Յուրա Ավալյանը «Ժողովուրդ» օրաթերթին հայտնել էր, որ այսօր՝ առավոտյան ժամը 11:00-ին, բոլոր այն քաղաքացիները, որոնց ընկերությունը թե՛ որպես աշխատավարձ էր պարտք, թե՛ մթերած կաթի գումար, հավաքվելու են և ուղևորվեն դեպի պանրի գործարան:

Այս առնչությամբ  ArmLur.am-ը զրուցեց Գեղարքունիքի մարզպետ Ռաֆիկ Գրիգորյանի հետ` պարզելու համար, թե տեղյակ է ճամբարակցիների որոշմանը և ինչ է պատրաստվում անել այս խնդրի շուրջ: Սակայն, վերջինս մեզ հետ զրույցում հայտնեց. «Ճամբարակցիները չեն փակի, իրանք եկել են, և մենք պայմանավորվել ենք»:

Ըստ մարզպետի՝  դա տարիներով եկած խնդիր է, որը  գտնվում է նրանց ուշադրության կենտորնում է և պարբերաբար  Ճամբարակի քաղաքապետի հետ քննարկումներ են տեղի ունենում:

«Այս պահին բանակցություններ են գնում համայնքի ներկայացուցիչների և «Աշտարակ կաթ»-ի ներկայացուցիչների միջև, որպեսզի այդ կուտակված պանրի հաշվին իրենց կաթի գումարը փոխհատուցվի: Նրանք գտնվում են «Աշտարակ կաթ»-ի  Ճամբարակի մասնաճյուղում»,-ասաց նա:

ArmLur.am-ի հետ զրույցում Ռաֆիկ Գրիգորյանը հավաստիացրեց, որ  ճամբարակցիների կուտակված պանիրը և կաթնամթերքը կիրացվի:

Լիդա Եղիազարյան