«Ես առաջարկել եմ, որ հիվանդանոցը կիսենք». ինչ է լինելու ի վերջո «Երևան» ԲԿ-ի ճակատագիրը. մեկնաբանում է գլխավոր վիրաբույժը

Արդեն ArmLur.am-ը  տեղեկացրել էր, որ «Երևան» բժշկական կենտրոնը լուծարվում է, իսկ պատճառը ոչ թե  ֆինանսական խնդիրներն են, այլ բժշկական կենտրոնի սեփականատերերի միջև տեղի ունեցող ներքին խմորումները:

ArmLur.am-ը, զրուցելով ԲԿ-ի գլխավոր վիրաբույժ Տարոն Տոնոյանի հետ, փորձեց հստակեցնել, թե ինչ է լինելու ի վերջո «Երևան բժշկական» կենտրոնի ճակատագիրը: Սակայն, վերջինս մեզ հետ զրույցում նշեց. «Իրականության մեջ շատ լավ հասկանում եմ, որ խնդրի լուծումը իմ և իմ գործընկերոջ  փոխհամաձայնության գտնելու մեջ է: Եվ որևէ մեկը, որևէ լծակ կամ գործիք չունեն ազդելու խնդրի կարգավորմանը, հանգուցալուծման համար»:

Ըստ Տարոն Տոնոյանի՝ օրենքը, կարծես թե, բաց ունի. «Կոնկրետ ես տարբերակներ եմ առաջարկում, բայց իմ գործընկերը մեկ տարբերակ է միայն առաջարկում` տնօրեն դառնալը: Անօգուտ է արդեն բացատրել, որ կոնֆլիկտային իրավիճակներում միակողմանի չի կարող լինել….»:

Վիրաբույժի խոսքով ՝ տարբեր առաջարկներ է արել, սակայն բոլորն էլ մնացել են առանց արձագանք: Միակ արձագանքն այն է, որ նա  ուզում է տնօրեն դառնալ. «Բանը նրան է հասել, որ ասում է կամ տնօրեն կլինեմ կամ էլ այս հիվանդանոցը թող  «փդի»: Տարբերակներից վատագույնն էլ նա է, որ ես առաջարկել եմ, որ հիվանդանոցը կիսենք, բայց նա դրան էլ չի բարձրաձայնում»:

Տարոն Տոնոյանը ArmLur.am-ի հետ զրույցում ընդգծեց, որ իբրև թե իր գործընկերը  շատ է անհանգստանում ֆինանսական  մեծ պարտքերի համար. «Արդեն այդ գումարները փակված են, հիվանդանոցը այլևս որևէ դրամ պարտք չունի: Խնդիրը միայն մնացել է իմ և նրա միջև: Ցավոք սրտի, մինչև այսօր կոլեկտիվի բժիշկները գալիս են աշխատանքի: Առավոտներն այնտեղ ենք լինում 9-ից մինչև 11-ը, որոշ բժիշկներ ավելի երկար: Հիվանդների բուժումը կամ վիրահատությունները կազմակերպում ենք այլ կլինիկաներում: Առայժմ այսպես, մինչև հասկանանք, թե երբ է տրամաբանությունը հաղթում էմոցիաներին»:

Նկատենք, որ «Երևան ԲԿ»-ի շուրջ խնդիրներ միշտ եղել են, սակայն  փորձել են այն հարթեցնել: Իսկ  կառավարության փոփոխությունից հետո անմիջապես խնդիրն էլ ավելի սրվեց, քանի որ ներկայիս Առողջապահության նախարար Լևոն Ալթունյանը նշել էր, որ իրենց գործառույթների մեջ չի մտնում այդ խնդրով զբաղվելը: Ստացվում է, որ բժշկական կենտրոն է լուծարվում, սակայն դա ՀՀ առողջապահության նախարարությանը, մեղմ ասած, չի հուզում:

Լիդա Եղիազարյան