ՀՀ մարզերի 2017-2025թթ. զարգացման ռազմավարությունների մշակման շրջանակներում 2017 թվականի ապրիլի 6-8-ը Կապանում տեղի է ունեցել ՄարզՌազմ ծրագրի 4-րդ (վերջին) դասընթացը, որին մասնակցել են 10 մարզի աշխատակազմերից շուրջ 40 աշխատակից: ՀՀ տարածքային կառավարման և զարգացման նախարարի տեղակալ Արթուր Խաչատրյանը և նախարարության տարածքային կառավարման վարչության պետ Արթուր Սողոմոնյանը մարզերի աշխատանքային խմբերի հետ ամփոփել են 2017-2025 թթ. մարզային զարգացման ռազմավարությունների մշակման արդյունքները, 2016 թ. հոկտեմբեր – 2017 թ. մարտ ամիսների ընթացքում իրականացված դասընթացների ժամանակ տրամադրված գիտելիքները և հմտությունները, ներկայացվել են տարածքային զարգացման գործառնական ծրագրի մշակման մեթոդաբանությունը:
Փոխնախարար Արթուր Խաչատրյանի խոսքով, 2016 թ. հուլիսին Կառավարության կողմից` 2016-2025 թթ տարածքային զարգացման ռազմավարության ընդունումից հետո ՀՀ ՏԿԶ նախարարությունը մարզպետարանների, ինչպես նաև ԵՄ խորհրդատվական խմբի աջակցությամբ սկսել էր բոլոր մարզերի 2017-2025 թթ. զարգացման ռազմավարությունների մշակման աշխատանքները: <<Արդեն պատրաստ են ՀՀ մարզերի 2017-2025 թթ. զարգացման ռազմավարությունների նախագծերը, որոնց հիմնական նպատակներն են` տարածքների մրցունակության բարձրացում, զբաղվածության ընդլայնում, մարդկային կապիտալի զարգացում: Եվրամիության մեր գործընկերների աջակցությամբ իրականացվող ՄարզՌազմ ծրագրի շրջանակներում կազմակերպված այս հանդիպման նպատակն է ամփոփելու կատարված աշխատանքը, ինչպես նաև հող նախապատրաստել տարբեր ուղղություններով գործառնական ծրագրերի մշակման համար՝ տնտեսության բազմազանեցում (դիվերսիֆիկացիա), զբոսաշրջություն, փոքր և միջին բիզնեսի զարգացում, վերամշակվող արդյունաբերության զարգացում և այլն: Մարզային ռազմավարական փաստաթղթերը ուղենիշ են լինելու նաև ֆինանսավորման համար: Որևէ ծրագրի ֆինանսավորման առաջարկ հնչելու պարագայում հենց առաջին քայլով նախատեսվում է հստկեցնել, արդյոք ծրագրային այդ ուղղությունը, իբրև առաջնահերթություն, ներառված է տվյալ մարզի զարգացման ռազմավարական փաստաթղթում>>,-նշել է Արթուր Խաչատրյանը:
Դասընթացից ձեռքբերված հմտությունները և գիտելիքները մասնակիցները կիրառելու են նաև մարզային վարչակազմերի տարբեր գործերում: Հիշեցնենք, որ ս.թ. մարտի 21-ին ՀՀ մարզերի 2017-2025 թվականների զարգացման ռազմավարությունների նախագծերը փոխանցվել են ՀՀ կառավարության աշխատակազմ և առաջիկայում ՀՀ վարչապետի գլխավորությամբ տեղի է ունենալու նախագծերի քննարկում: Հավելենք, որ ռազմավարությունները ներկայացվել էին շահագրգիռ մարմինների քննարկմանը, որից հետո ստացված առաջարկությունները և դիտողությունները քննարկվել և ամփոփվել էին ՀՀ ՏԿԶ նախարարությունում:
ՀՀ մարզերի 2017-2025 թվականների զարգացման ռազմավարությունների նախագծերին կարող եք ծանոթանալ ՀՀ ՏԿԶՆ պաշտոնական կայքում http://mtad.am/hy/razmavarutyunner/, ինչպես նաև իրավական ակտերի նախագծերի միասնական կայքում https://www.e-draft.am/projects/45
.gif)
