ՀԱՐՑ. Ես ուզում եմ իմանալ` եթե ԱՁ-ն նույն հասցեում միաժամանակ իրականացնում է տեխնիկական սպասարկում (արտոնագրային վճարող հարկվող) եւ ավտոպահեստամասերի վաճառք (շրջանառության հարկով հարկվող), ապա նա կարո՞ղ է 1 ՀԴՄ օգտագործել, թե յուրաքանչյուրի համար պետք են առանձին ՀԴՄ-ներ:
Հմայակ Գեւորգյան (41 տարեկան, տնօրեն)
ՊԱՏԱՍԽԱՆ. Հ. Գեւորգյանի հարցին ի պատասխան` տեղեկացնում ենք, որ «Հսկիչ-դրամարկղային մեքենաների կիրառման մասին» ՀՀ օրենքի 4-րդ հոդվածի 1-ին կետի համաձայն` Հայաստանի Հանրապետության տարածքում անհատ ձեռնարկատերերի, նոտարների, փաստաբանական գործունեություն իրականացնողների (այսուհետ` անհատ ձեռնարկատեր) եւ կազմակերպությունների կողմից առեւտրի օբյեկտների, առեւտրի իրականացման վայրերում վաճառատեղերի միջոցով մանրածախ վաճառք իրականացնելիս կամ բնակչությանը ծառայություններ մատուցելիս կանխիկ դրամով կամ պլաստիկ քարտերի միջոցով իրականացվող դրամական հաշվարկների բոլոր դեպքերում (ներառյալ` կանխավճարները) հսկիչ-դրամարկղային մեքենաների կիրառումը պարտադիր է` բացառությամբ սույն հոդվածի 2-րդ մասով նախատեսված դեպքերի:
Ընդ որում, միաժամանակ արտոնագրային եւ շրջանառության հարկերով հարկվող գործունեության դեպքերում օրենքով առանձին ՀԴՄ-ներ կիրառելու պարտադիր դրույթ սահմանված չէ:
Հայաստանի Հանրապետության պետական եկամուտների կոմիտե
«ԺՈՂՈՎՈՒՐԴ». «Հսկիչ դրամարկղային մեքենաների կիրառման մասին» օրենքը չի տարածվում ՀՀ կենտրոնական բանկի, ՀՀ տարածքում գործող բանկերի, դրանց մասնաճյուղերի, ներկայացուցչությունների, գործառնական գրասենյակների, օտարերկրյա բանկերի` ՀՀ տարածքում գործող մասնաճյուղերի եւ ներկայացուցչությունների, վարկային կազմակերպությունների, ապահովագրական ընկերությունների, վերաապահովագրական ընկերությունների, ապահովագրական միջնորդային գործունեություն իրականացնող անձանց` միայն այդ գործունեության մասով, արժեթղթերի շուկայի մասնագիտացված մասնակիցների, գրավատների, վճարահաշվարկային կազմակերպությունների վրա:
.gif)
