ՔԱՂԱՔԱԿԱՆ ՀՐԱՀԱՆԳ «ՍԱՍՆԱ ԾՌԵՐԻ» ԳՈՐԾՈՎ

Թեեւ «Սասնա ծռեր» զինված խմբի անդամները, ենթարկվելով ԱԱԾ կոչին, ինքնակամ լքեցին Երեւան քաղաքի վարչության պարեկապահակային ծառայության գունդը, այնուամենայնիվ իշխանությունները նրանց նկատմամբ պատժի մեղմացման որեւէ քայլի չգնացին: Ավելին` չի բացառվում, որ խմբի անդամները ենթարկվեն ՀՀ քրեական օրենսգրքով նախատեսված ամենախիստ պատժամիջոցին:

Հիշեցնենք, որ 2016 թվականի հուլիսի 17-ի առավոտյան «Սասնա ծռեր» անունը կրող 31 հոգուց բաղկացած զինված խումբը ներխուժեց Հայաստանի ոստիկանության պարեկապահակային ծառայության տարածք:
Հարձակումը կատարվել էր «ԿՌԱԶ» մակնիշի բեռնատարով, որով «Ծռերը» կոտրել էին դարպասներն ու կից պարիսպը: Այնուհետեւ ինքնաձիգներով, բռնություն գործադրելով գնդում ծառայություն իրականացնող ոստիկանության աշխատակիցների նկատմամբ՝ ներխուժել էին գնդի տարածք` պատանդ վերցնելով ու պահելով ոստիկանության աշխատակիցներին եւ բուժաշխատողներին: Տեղի ունեցած իրադարձությունների արդյունքում սպանվեցին երեք ոստիկան` գնդապետ Արթուր Վանոյանը, լեյտենանտ Յուրի Տեփանոսյանը, ավագ ենթասպա Գագիկ Մկրտչյանը:
Շուրջ երկու շաբաթ ՀՀ իրավապահ համակարգը համոզում էր խմբի անդամներին ինքնակամ հանձնվել: Անգամ գործին խառնվեց Արցախի հերոս Վիտալի Բալասանյանը: Եւ շուրջ երկու շաբաթ անց՝ հուլիսի 21-ին, ժամը 20:00-ին խմբի անդամները ինքնակամ հանձնվեցին: Ու այս իրողությունը հաշվի առնելով, ըստ էության, նրանց նկատմամբ նախաքննություն իրականացնող մարմինը` ՀՔԾ-ն, պետք է մեղմ պատիժ սահմաներ: Սակայն «Ժողովուրդ» օրաթերթին իրավապահ համակարգին մոտ կանգնած աղբյուներից հայտնի դարձավ, որ քաղաքական հրահանգ է իջեցվել՝ խմբի անդամների մեծամասնության նկատմամբ կիրառել ամենախիստ պատիժը, այն է՝ ցմահ բանտարկություն:
Դատավորները՝ պատժի մասին
Արդյո՞ք «Սասնա ծռեր» խմբավորման անդամներին ցմահ ազատազրկման մասով քաղաքական հրահանգ է տրվել: Այս հարցի պատասխանը փորձեցինք իմանալ գործը քննող դատավորներից:
Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյան:
-Պարո՛ն Մակյան, Ձեզ քաղաքական հրահանգ է իջեցվե՞լ «Սասնա ծռեր» խմբի անդամներին խիստ պատիժ սահմանել. այն է՝ ցմահ ազատազրկում:
-Դուք ոնց եք պատկերացնում` Ձեր ասածները մեկնաբանեմ, իհարկե, նման բան չի կարող լինել: Այլ մեկնաբանություններ չունեմ, քանի որ դատարանին որեւէ մեկը չի կարող ուղղորդել:
Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյան:
-Պարո՛ն Գաբրիելյան, ստացե՞լ եք արդեն քաղաքական հրահանգ՝ «Սասնա ծռեր» խմբի անդամներին ցմահ ազատազրկման դատապարտելու մասին:
-Իիիիիի, էս ինչ հեքիաթներ եք ասում, սա որ թիվն է, տենց բան չկա, ամոթ է, տենց հարցի շուրջ ինձ հարց մի՛ ուղղեք: Լուրջ հարց կլինի, խոսենք, բայց սենց հարցերի շուրջ…
Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյան:
-Պարո՛ն Օհանյան, Ձեզ քաղաքական հրահանգ տրվե՞լ է արդեն, որպեսզի «Սասնա ծռեր» խմբի անդամներին ցմահ ազատազրկման դատապարտեք:
-Ինչ հրահանգ, ոչ մի հրահանգ: Ոչ մի այդպիսի բան չկա: Ինչե՞ր եք խոսում…
Դե, իհարկե, դժվար էր ակնկալել, որ որեւէ դատավոր կարող էր խոստովանել, թե ստացել է հրահանգ վճիռ կայացնելուց առաջ: Բայց փաստը մնում է փաստ, որ Հայաստանի դատական համակարգը գործում է քաղաքական պատվերի շրջանակում, եւ հիմնական որոշումները կայացվում են քաղաքական թելադրանքով: Դեպքերն ու ապացույցները բազմաթիվ են տարիներ շարունակ:
Ուր մնացին համոզողները
«Ժողովուրդ» օրաթերթը «Ազգային անվտանգություն» կուսակցության նախագահ Գառնիկ Իսագուլյանից հետաքրքրվեց, թե արդյո՞ք նրան չի հուզում` ինչ պատիժ կսահմանվի խմբի անդամներին: Ինչպես հայտնի է` իրադարձությունների ժամանակ Գառնիկ Իսագուլյանը եւս մի քանի անգամ հանդիպում ունեցավ խմբի անդամների հետ՝ համոզելով նրանց հանձնվել:
-Պարո՛ն Իսագուլյան, Դուք «Սասնա ծռեր» խմբի անդամներին հանձնվելու հորդորով դիմած անձանցից մեկն եք՝ Վիտալի Բալասանյանի հետ միասին: Խմբի անդամները հանձնվեցին՝ փոխարենը ակնկալելով, որ մեղմ պատիժ կլինի: Ձեզ չի՞ հետաքրքրում, թե ինչ պատիժ է նրանց սպասվում: Մեզ հասած տեղեկություններով` քաղաքական հրահանգ կա նրանց ցմահ ազատազրկման դատապարտել:
-Գիտեք` քանի որ դատական բուն գործընթացը սկսվել է, աշխատում եմ այդ գործի հետ կապված որեւէ մեկնաբանություններ չտալ:
Նախ` առաջին հերթին տղաներին ավելորդ բաների մեջ չգցենք: Երկրորդ` մենք միշտ սխալ ենք մեկնաբանում: Ես միշտ խոսել եմ, որ «Սասնա ծռերի» գործողությունների ժամանակ տարբեր էտապներ կային: Երբ խոսում էին` զենքերը վայր դնեն եւ հանձնվեն, դա առաջին էտապի մասին էր խոսքը, որի դեպքում կարող էին լինել որոշակի քաղաքական գործընթացներ: Բայց վերջին էտապում, եկեք անկեղծ լինենք, սա գիտեն նաեւ տղաները, այնպես չի, որ իրենք զենքերը վայր են դրել մեր հորդորով եւ հանձնվել են: Ուղղակի եղել է շատ հստակ հրահանգ` այսօր վերջին օրն է, մենք չենք կարող թույլ տալ, որ Երեւանի կենտրոնում այսքան երկար շարունակվի ապօրինություն, եւ հատուկ ծառայությունները գնալու էին հատուկ գործողության, որի ժամանակ, ցավոք սրտի, ինչ-որ միջադեպեր կլինեին: Եվ դրա հիման վրա տղաները գիտակցեցին եւ զենքերը վայր դրեցին: Հավատացեք` որեւէ մեկը Հայաստանի Հանրապետությունում, առավելեւս` ՀՀ նախագահ Սերժ Սարգսյանը, որի հետ առիթ ունեցել եմ այս խնդիրներով զրուցելու, որեւէ քաղաքական պատվեր որեւէ մարմնի իրավապահ չի իջեցրել, առավելեւս` դատարանին:
-Իրադարձությունների ավարտից հետո՞ եք խոսել Սերժ Սարգսյանի հետ:
-Այո՛, հանրապետության նախագահը երբեք թույլ չի տա որեւէ քաղաքական պատվեր իջեցնել: Ընդհակառակը, իրենք շատ կուզենային, որ տղաները դատավարական բոլոր նորմերը հարգեն:
-Միգուցե չեն հարգում դատավարական նորմերը` հասկանալով, որ բոլոր դեպքերում իրենց ցմահ ազատազրկում է սպասվում:
-Նորից եմ կրկնում` հանձնվելու պարագան ուրիշ ձեւով է եղել, բայց այն, ինչ կատարվել է ապօրինի, երեք ոստիկանի մահ ունենք, Դուք հասկացեք` դրանց հետեւում ընտանիքներ կան, պետությունը չի կարող այդ շռայլությունը թույլ տալ եւ սրա-նրա ցանկությամբ կայացնել դատավճիռներ, որոնք համարժեք չեն լինի իրենց կատարած հանցանքին:
Կարծում եմ, որ շատերի նպատակն էր, որ այդ տղաները այնտեղից կենդանի դուրս չգային, որն իրենց ավելի մեծ հնարավորություն կբացեր: Կա հանցագործության փաստ, եւ դատարանը պարտավոր է այդ ծանր հանցագործությունների համար, այո՛, դատավճիռներ կայացնել:
-Ցմահ ազատազրկումը իրավաչա՞փ որոշում է:
-Ես դատարանը չեմ, ես գործի նյութերին ամբողջապես չեմ տիրապետում եւ դատարանի փոխարեն չեմ էլ կարող որեւէ բան ասել: Ես` որպես ՀՀ քաղաքացի, ասում եմ, որ պետության իրավապահ մարմնի վրա ձեռք բարձրացնելը ծանրագույն հանցագործություն է:

ՔՆԱՐ ՄԱՆՈՒԿՅԱՆ

ՆԵՐՄԱՆ ԽՆԴՐԱՆՔՈՎ
«Ժողովուրդ» օրաթերթը անդրադարձել էր դատապարտյալների շրջանում առկա սպասողական վիճակին:
Հիշեցնենք՝ տեւական ժամանակ է, ինչ Սերժ Սարգսյանին ներման խնդրանքով 15 դատապարտյալների անուններ են ներկայացվել, սակայն որոշման մասով դեռեւս որեւէ տեղաշարժ չկա: 2017 թվականի դեկտեմբերի 23-ին «Ժողովուրդ»-ը գրել էր, որ ՀՀ մի շարք քրեակատարողական հիմնարկներում տեղեկություններ են տարածվել, որ Ամանորին ընդառաջ` Սերժ Սարգսյանը պատրաստվում է մի քանի ցմահ դատապարտյալների ներում շնորհել: Ավելին՝ մեզ հայտնի էր դարձել, որ քրեակատարողական հիմնարկներից համապատասխան փաստաթղթեր են պահանջել, որպեսզի հասկանան, թե որ ցմահ դատապարտյալի դեպքում հնարավոր կլինի ներում շնորհել` հաշվի առնելով նրա` ազատազրկման մեջ գտնվելու տարիների վարքագիծը եւ մի շարք այլ գործոններ:
Ի վերջո, Սերժ Սարգսյանին ներկայացվել է 15 հոգանոց ցուցակ, որտեղ ընդգրկվել են ցմահ դատապարտյալներ` դաշնակցական Արմենակ Մնջոյանը, Արմեն Տեր-Սահակյանը եւ Ստեփան Գրիգորյանը: Նկատենք, որ Սերժ Սարգսյանին ներկայացված ցմահ դատապարտյաների թիվը երեքով չի ավարտվում:
Ըստ «Ժողովուրդ» օրաթերթին հասած տեղեկությունների` ցմահ դատապարտյալ Արթուր Կիրակոսյանը, որը սպանության համար ազատազրկման մեջ է գտնվում 1997 թվականից, եւս ներման խնդրանքով դիմել է նախագահական: Նրանից նույնպես իր վարքագծի մասով ՔԿ վարչությունից թղթեր են պահանջել եւ ներկայացրել նախագահական:
Թե ինչ է սպասվում ներման խնդրանքով դատարան դիմած դատապարտյալներին, դժվար է ասել, նախագահականում դեռ լռում են: Այդ ընթացքում դատապարտյալները սրտատրոփ սպասում են:

ՔԱՂԱՔԱՊԵՏԱՐԱՆԸ ԴԱՏԱՐԱՆՈՒՄ
Երեւանի քաղաքապետարանի եւ «Երեւանի ոսկերչական գործարան» ԲԲԸ-ի միջեւ կռիվ է հասունանում: «Ժողովուրդ» օրաթերթի տեղեկություններով` 2018 թվականի հունվարի 23-ին քաղաքապետարանը դիմել է Ավան եւ Նոր Նորք վարչական շրջանների ընդհանուր իրավասության դատարան` պահանջելով, որ դատարանը ստիպի ոսկերչական ընկերությանը` հողամասի նկատմամբ սեփականության իրավունքը դադարեցնի, որպես հետեւանք սեփականության իրավունքի գրանցումը վերացնի եւ պարտավորեցնի հողամասը Երեւան համայնքին վերադարձնել:
Ըստ էության «Երեւանի ոսկերչական գործարան» ԲԲԸ-ն տարածք է վերցրել, սակայն ավելի ուշ պարզվել է, որ տարածքը ոչ օրինական է գրանցվել, եւ հիմա քաղաքապետարանը դատարանի միջոցով պահանջում է` քաղաքապետարանին պատկանող տարածքը հետ վերադարձվի:

ԲԱՆԱԿԱՅԻՆ ԱՐԴՅՈՒՆՔՆԵՐ
Արցախի Հանրապետության պաշտպանության նախարար, ՊԲ հրամանատար, գեներալ-լեյտենանտ Լեւոն Մնացականյանն ամփոփել է 2017թ. բանակային տարվա արդյունքները: Նա սկզբում ներկայացրել է հաշվետու ժամանակահատվածում ադրբեջանական զինուժի իրականացրած սադրիչ գործողությունները, մասնավորապես կանգ առնելով փետրվարի 24-ի լույս 25-ի գիշերը ՊԲ արեւելյան եւ հարավարեւելյան ուղղություններով ձեռնարկված դիվերսիոն ներթափանցման փորձերի վրա, ինչի արդյունքում հակառակորդը չեզոք գոտում թողնելով 5 հատուկ ջոկատայինի դիակ եւ տարհանելով 3 վիրավոր, հետ է շպրտվել ելման դիրքեր: ԱՀ ռազմական գերատեսչության ղեկավարը նշել է, որ ադրբեջանական զինուժի ոչ մի գործողություն աննկատ չի մնացել, եւ բանակը ձեռնարկել է համարժեք քայլեր, որոնք այսուհետ եւս թույլ կտան ապահովել մեր ժողովրդի խաղաղ կենսագործունեությունը: Ամփոփելով տարին` նա նշել է, որ պաշտպանության բանակին հաջողվել է պահպանել խաղաղությունը եւ Արցախի ժողովրդի անվտանգությունը:

ԴԵՍՊԱՆԸ ՎԹԱՐԻ Է ԵՆԹԱՐԿՎԵԼ
Երեւանի Խանջյան եւ Ագաթանգեղոս փողոցների խաչմերուկում` Խանջյանի թունելի սկզբնամասում, տեղի է ունեցել ավտովթար, որի հետեւանքով հիվանդանոց տեղափոխվածների թվում եղել է նաեւ Քուվեյթի պետությունում ՀՀ արտակարգ եւ լիազոր դեսպան Մանվել Բադեյանը: Պարզվել է, որ Lexus-ը վարել է 23-ամյա Դավիթ Բադեյանը: ՀՀ արտաքին գործերի նախարարությունից հայտնել են, որ Մանվել Բադեյանը լուրջ վնասվածքներ չի ստացել: