Տավուշի մարզի Գետահովիտ գյուղի բնակիչ, 20-ամյա Տարոն Ենգիբարյանին բախտ չվիճակվեց տեսնել նոր` 2011 թվականը: Նա սպանվեց Իջեւանի զորամասի հրամանատարի ձեռքերով:Տարեմուտից մի ժամ առաջ Տարոնը իր ընկերների հետ դեղորայք էր տարել ընկերներից մեկի եղբորը, ով Գետահովտի զորամասում էր ծառայում: Հենց մուտքի մոտ նրանց հանդիպել է հրամանատար, գնդապետ Սերգեյ Կարապետյանը, ով զայրացել է նրանց այցից, կրակ է բացել տղաների ավտոմեքենայի ուղղությամբ, ապա նրանց «բերման ենթարկել» զորամաս: Իր աշխատասենյակում Կարապետյանը շարունակել էր երիտասարդներին ինքնաձիգով ահաբեկել, որի արդյունքում տղաները ցատկել էին աշխատասենյակի երկրորդ հարկից: Թռիչքի հետեւանքով 20-ամյա Տարոն Ենգիբարյանը գլխի ծանր վնասվածքներ էր ստացել, իսկ 21-ամյա Աշոտ Ուլիխանյանը՝ ձախ ոտքի կոտրվածք: Տարոնը տեղափոխվեց Իջեւանի հիվանդանոց, ապա` Երեւանի «Սուրբ Գրիգոր Լուսավորիչ» բժշկական կենտրոն: 10 օր հետո, այդպես էլ գիտակցության չգալով, նա մահացավ: Այդ ընթացքում, ՀՀ պաշտպանության նախարար Սեյրան Օհանյանի հրամանով, Սերգեյ Կարապետյանն ազատվեց զբաղեցրած պաշտոնից եւ ձերբակալվեց: Այսօր նախկին հրամանատարի նկատմամբ ՀՀ քրեական օրենսգրքի մի քանի հոդվածներով մեղադրանք է առաջադրվել: Դեպքից մեկ ամիս անց «Ժողովուրդ»-ի թղթակիցը այցելեց մահացած երիտասարդի տուն: Գետահովիտը Իջեւան քաղաքին կից է, որի ծայրամասում է գտնվում Տարոնի հոր` Թաթուլ Ենգիբարյանի առանձնատունը: 45-ամյա Թաթուլ Ենգիբարյանը կոչումով կապիտան է, ծառայում է Իջեւանի ավտոմեքենաների հաշվառման-քննական բաժանմունքում (նախկինում «ՄՌՈՒ» էր կոչվում): Թաթուլ Ենգիբարյանը մշտապես աջակից է մարդկանց: Այդպիսի բարի եւ կարեկից անձնավորություն էր նաեւ որդին` Տարոնը: Նա նոր էր ավարտել ժամկետային զինվորական ծառայությունը: Ծառայել էր Ճամբարակում: Ազգային բանակից վերադառնալով` Տարոնը չարաբաստիկ դեպքից 3 օր առաջ` դեկտեմբերի 28-ին վերականգնվել էր Երեւանի պետական համալսարանի Իջեւանի մասնաճյուղի հումանիտար ֆակուլտետի պատմության բաժնի երկրորդ կուրսում: Նա Գետահովտի ֆուտբոլի թիմի առաջատարն էր, հուսալի պաշտպան: Երեք երեխաների հայր Թաթուլ Ենգիբարյանը խոր կսկիծով է հիշում ճակատագրական այդ օրը. «Տոնական սեղան էինք գցում, տղաս տնից դուրս եկավ` բջջային հեռախոսը լիցքավորելու: Ժամեր հետո ինձ զանգահարեցին, թե իբր նրա թեւը կոտրվել է»:Թաթուլ Ենգիբարյանը 10 օր տղայի մահճակալի մոտ է եղել: «Սուրբ Գրիգոր Լուսավորիչ» բժշկական կենտրոնի մասնագետներն արել են ամեն հնարավորը, սակայն չեն կարողացել փրկել Տարոնի կյանքը: Նրանք ցավով են տարել երիտասարդի կորուստը` չկարողանալով նայել նրա ծնողների աչքերին: Դժվար է Տարոնի ծնողների վիճակը: Լրագրողիս համար էլ նրանց տանը լինելը հեշտ չէր. մեծ վշտին առնչվելով` ինքդ էլ համակվում ես ցավով: Ներկայումս Թաթուլ Ենգիբարյանը ծանր ապրումների մեջ է, սակավախոս: Այցիս ժամանակ նրա կինը՝ վշտից հիվանդացած, անկողնում էր: Թաթուլ Ենգիբարյանը պատմեց, որ դեպքից հետո տղայի ատամը կոտրված էր: Դժվար է ասել` դա ծեծի, թե՞ երկրորդ հարկից ընկնելու հետեւանք է: Սակայն Տարոնի գլխից մի մազափունջ պոկված էր. գնդապետ Կարապետյանն այն կտրել էր` իբրեւ պատիժ:«Միայն պահանջում եմ արդար դատաքննություն եւ արդար պատիժ»,- «Ժողովուրդ»-ի հետ զրույցում ասաց Թաթուլ Ենգիբարյանը, ով անձնապես ճանաչել է Սերգեյ Կարապետյանին, սակայն չէր կարող իմանալ, որ նա կործանելու է իր որդու կյանքը: Թեեւ ՀՀ պաշտպանության նախարար Սեյրան Օհանյանը Տարոնի շիրիմին սգո ծաղկեպսակ է ուղարկել, բայց նա կարող էր կանխել այս ողբերգությունը, եթե զորամասի հրամանատարությունը չվստահեր մի մարդու, ով հեռու է հայ մարդու բարոյական որակներից: Շամխորի շրջանի հռչակավոր Չարդախլու բնակավայրին կից Աթաբեկ գյուղից սերված Սերգեյ Կարապետյանը, ծանոթների վկայությամբ, Հայաստանի տարբեր վայրերում, ուր ծառայել է, արտաամուսնական 9 կին ունի, բազում զավակներ: Սակայն չի հետաքրքրվել իր երեխաների ճակատագրով, չի հոգացել նրանց մասին: Կարապետյանի ծանոթներն ասում են, որ նա սիրում է կրկնել ռուսական գռեհիկ մի ասացվածք. «Կինը առանց բռնակի ճամպրուկ է, որը չի կարելի տեղափոխել, սակայն դեն գցելն էլ ափսոս է, պետք է տեղում օգտագործել»:Ահա այսպիսի «արժեհամակարգով» մարդու են վստահել սահմանի կարեւոր հատվածը պաշտպանող զորամասի հրամանատարությունը: Մարդ , որը չի մտածել իր երեխաների ճակատագրի մասին, խորտակեց ուրիշի զավակի կյանքը:ՈՍԿԱՆ ՍԱՐԳՍՅԱՆՏավուշի մարզ
.gif)
