Մի քանի քաղաքական ուժեր հայտարարություն են տարածել՝ անդրադառնալով այսօր Երևանում տեղի ունեցած դեպքերինբ ևպատգամավորների ձերբակալություններին:
Ազատ դեմոկրատներ կուսակցությունը խստորեն դատապարտում է այսօր խաղաղ ցուցարարների նկատմամբ ոստիկանության կողմից բռնի ուժի կիրառումը։
- Անթույլատրելի ենք համարում ՀՀ ԱԺ պատգամավորներ Նիկոլ Փաշինյանի, Սասուն Միքայելյանի, Արարատ Միրզոյանի և շարժման մյուս մասնակիցների ձերբակալությունները:
Կից տեսե՛ք կուսակցության հայտարարության տեքստն ամբողջությամբ։
Հարգանքով՝
Ազատ դեմոկրատներ կուսակցության լրատվական ծառայություն
- Վերջին օրերի լարված, պայթյունավտանգ իրավիճակը հանգուցալուծելու, երկխոսության հարթակ ստեղծելու ՀՅ Դաշնակցության ջանքերը երեկ հույս էին առաջացրել, որ հնարավոր կլինի փոխզիջումային և կառուցողական լուծումներ գտնել: Մենք ամեն ինչ արել էինք կողմերին երկխոսության, բանակցությունների բերելու համար:
Ցավոք, սկսված գործընթացը, բևեռացված մոտեցումների պատճառով, այսօր տապալվեց: Բայց նույնիսկ վերջին իրադարձություններից հետո մենք շարունակում ենք հավատալ, որ ցանկացած փակուղային իրավիճակում կարելի է ելքեր գտնել և շտկել կացությունը:
Այս առումով կարևոր է, որ բոլոր կողմերը հասկանան՝ հաղթողներ ու պարտվողներ չեն կարող լինել: Հասարակության և պետության շահերը վեր են ամեն ինչից: Կոչ ենք անում բոլորին՝ սթափ գնահատել իրավիճակը, զերծ մնալ ծայրահեղություններից և բանական ու իրատեսական լուծումներ փնտրել:
Այլ տարբերակ ուղղակի գոյություն չունի: Մեզ ոչ ոք հակառակը չի կարող համոզել:
Իր սկզբունքային դիրքորոշումներին հավատարիմ՝ Դաշնակցությունը շարունակելու է երկխոսությանն ուղղված հետևողական ջանքերը:
22.04.2018թ.
ՀՅԴ Հայաստանի Գերագույն մարմին
- Օրինական հավաքներ անցկացնելու համար «Երկիր Ծիրանի» կուսակցությունը Հավաքների ազատության մասին օրենքի համաձայն նախօրոք և այսօր իրազեկել է լիազոր մարմնին և ոստիկանությանը։ Իրազեկումն ընդունվել է ի գիտություն լիազոր մարմնի կողմից։
2018 թվականի ապրիլի 22-ին «Երկիր Ծիրանի» կուսակցությունը ժամը 17:00-ից մինչև 22:00 Ազատության հրապարակում կանցկացնի հավաք, որից հետո՝ երթ։
Իսկ նույն օրը ժամը 17:00-ից մինչև 23:00 Հանրապետության հրապարակում կանցկացնի շտապ հավաք և երթ, որի երթուղին կլինի Հանրապետության հրապարակ – Ամիրյան փողոց – Մաշտոցի պողոտա – Հաղթանակ կամուրջ – Իսակովի պողոտա։ Շտապ հավաքի և երթի մասին օրենքով սահմանված կարգով իրազեկում է ուղարկվել լիազոր մարմնին և տեղեկացվել է ոստիկանությանը։
Զարուհի Փոստանջյանը ՀՀ ոստիկանապետից և ՀՀ մարդու իրավունքների պաշտպանից պահանջում է անհապաղ կապ հաստատել և շտապ հանդիպել իր հետ։ Նա գտնվում է Երևանի փողոցներում, որպեսզի համատեղ կազմակերպեն քաղաքացիների խաղաղ և անզեն հավաքների անցկացնելու իրավունքի իրականացումը։
«Երկիր Ծիրանի» կուսակցության լրատվական ծառայություն
- Հայաստանի դեմոկրատական կուսակցությունը ստեղծված իրավիճակը գնահատելով որպես պայթյունավտանգ և լի անկանխատեսելի հետևանքներով, որպես պետության գլուխ, դիմում է ՀՀ նախագահ Արմեն Սարգսյանին, անհապաղ հրավիրելու խորհրդակցություն քաղաքական կուսակցությունների և մտավորականության ներկայացուցիչների մասնակցությամբ։
Ցանկացած անխոհեմ քայլ հարցականի տակ է դնում մեր պետության և ժողովրդի անվտանգությունը։
Միաժամանակ խստորեն դատապարտում ենք կիրառված բռնի ուժը խաղաղ երթի մասնակիցների նկատմամբ և պահանջում ենք զսպվածություն հանդես բերել։
Հանգուցալուծումը կարող է լինել միմիայն քաղաքական ճանապարհով և մեթոդներով։
Հայաստանի Դեմոկրատական Կուսակցություն
22․04․2018թ․
.gif)
