ԼՈՒՐ ԿԱԴՐ

Լուսանկարն արվել է Աբովյան փողոցում

Երեկ ArmLur.am-ի տեսախցիկը ֆիքսել է, թե ինչպես են Աբովյան փողոցում ծառեր հատում: Տեղում աշխատողները վստահեցրել են, որ ծառահատումն ապօրինի չէ: Ծառերը չորացել են: Թե որքանո՞վ է արդարացված այսքան ծառերի հատումը, հայտնի չէ:

ՀԱՐՑ. Ես ուզում եմ իմանալ` ո՞վ իրավունք ունի ստանալ հատուկ կացության կարգավիճակ: Ո՞ւմ է տրվում նման կարգավիճակ: Եվ խնդրում եմ ասեք, թե որքա՞ն ժամանակով է տրվում եւ երկարաձգվում հատուկ կացության կարգավիճակը:

Ստելլա Լեւոնյան (54 տարեկան, տնային տնտեսուհի)

ՊԱՏԱՍԽԱՆ. Հատուկ կացության կարգավիճակը տրվում է ազգությամբ հայ օտարերկրացիներին: Կարող է տրվել նաեւ ՀՀ-ում տնտեսական կամ մշակութային գործունեություն ծավալող այլ օտարերկրացիների: Հատուկ կացության կարգավիճակը տրվում է տասը տարի ժամկետով: Այն կարող է տրվել մեկից ավելի անգամ:

Հայաստանի Հանրապետության միգրացիոն պետական ծառայություն

«ԺՈՂՈՎՈՒՐԴ». Նրանց, ում շնորհվում է հատուկ կացության կարգավիճակ, տրվում է ՀՀ հատուկ անձնագիր, որով կարելի է ազատ մուտք գործել Հայաստանի Հանրապետության տարածք եւ բնակվել այնտեղ առանց մուտքի վիզայի: Հայաստանի Հանրապետության տարածքում հատուկ կացության կարգավիճակ ունեցող օտարերկրացիներն ունեն Հայաստանի Հանրապետության քաղաքացիներին հավասար իրավունքներ, ազատություններ եւ պարտականություններ` բացառությամբ ընտրական իրավունքի:

ՀԱՐՑ. Խնդրում եմ ասեք` ես իրավունք ունե՞մ ստանալու մանկավարժական թոշակ: Ուզում եմ իմանալ` ի՞նչ փաստաթղթեր պետք է ներկայացնեմ:

Ռուզաննա Բեզրյան

ՊԱՏԱՍԽԱՆ. «Պետական կենսաթոշակների մասին» ՀՀ օրենքի 14-րդ հոդվածի 1-ին մասի համաձայն` մասնակի կենսաթոշակ նշանակվում է կրթության, մշակույթի որոշ կատեգորիաների աշխատողներին, եթե լրացել է նրանց 55 տարին, եւ ունեն առնվազն 25 օրացուցային տարվա աշխատանքային ստաժ, որից առնվազն 12 օրացուցային տարին մասնագիտական ստաժ է:
Մասնակի կենսաթոշակի իրավունք տվող մասնագիտական աշխատանքային ստաժում հաշվառվում են Հայաստանի Հանրապետության կառավարության սահմանված ցանկում նշված մասնագիտություններով եւ պաշտոններում մինչեւ 2003 թվականի օգոստոսի 1-ն աշխատած ժամանակահատվածները:
Համատեղությամբ աշխատած ժամանակահատվածը մասնագիտական աշխատանքային ստաժում չի հաշվառվում:
«Կրթության, մշակույթի որոշ կատեգորիաների աշխատողներին մասնակի կենսաթոշակի իրավունք տվող մասնագիտությունների եւ պաշտոնների ցանկը» հաստատվել է ՀՀ կառավարության 2011թ. մայիսի 5-ի թիվ 665-Ն որոշմամբ:
Քաղաքացուն խորհուրդ է տրվում դիմել ՀՀ ԱՍՀՆ ՍԱԾ աշխատակազմի բնակության վայրի կամ ցանկացած տարածքային ստորաբաժանում:

ՀՀ աշխատանքի եւ սոցիալական հարցերի նախարարության հասարակայնության հետ կապերի բաժին

«ԺՈՂՈՎՈՒՐԴ». Այսքան օրենքներ մեջբերելու կամ ՀՀ ԱՍՀՆ ՍԱԾ աշխատակազմի բնակության վայրի ստորաբաժնում ուղղորդելու փոխարեն, աշխատանքի եւ սոցիալական հարցերի նախարարությունը կարող էր հստակ պատասխանել` արդյո՞ք Ռ. Բեզրյանը կարող է ստանալ մանկավարժական թոշակ, թե՞ ոչ: Ստացվում է, որ քաղաքացին դիմել է խմբագրություն` իրեն հուզող հարցի պատասխանը ստանալու, սակայն նրան ուղղորդում են դիմել տարածքային ստորաբաժանում: Այսքանից հետո հարց է առաջանում` արդյո՞ք տարածքային բաժնում կպատասխանեն քաղաքացու հարցին, թե՞ ետ կուղարկեն: