ԱՍՈՒՄ Է` ԴԵՄ ԵՆ ԵՂԵԼ ԱՆՕՐԻՆԱԿԱՆՈՒԹՅՈՒՆՆԵՐԻՆ

ՀՀԿ նախագահ Սերժ Սարգսյանի մերձավորներին առնչվող իրավական խնդիրների եւ այլ հարցերի շուրջ «Ժողովուրդ» օրաթերթը զրուցել է ԱԺ փոխնախագահ, ՀՀԿ խոսնակ Էդուարդ Շարմազանովի հետ:

-Պարո՛ն Շարմազանով, ՀՀԿ-ում ինչպե՞ս են ընդունվել կուսակցության նախագահ Սերժ Սարգսյանի եղբայրների ու նաեւ նրանցից մեկի ընտանիքի երկու անդամներին առնչվող իրավական խնդիրները:
-ՀՀԿ-ում նման հարցեր չեն քննարկվել: Դա իրավական տիրույթի հարց է, նախաքննության փուլում է, եւ մենք ընդհանրապես նման հարց չենք քննարկել:
-Իսկ կուսակցության նախագահ Ս. Սարգսյանի հետ այս թեմայով խոսակցություն եղե՞լ է:
-Ոչ, չեմ խոսել ես անձամբ: Եվ կուսակցության նիստերի ընթացքում էլ նման քննարկում չի ծավալվել: Հիմա քննչական գործողություններ են իրականացվում, եւ չեմ կարծում, որ պետք է դրա մասին խոսել պարոն նախագահի հետ կամ կուսակցությունը պետք է դրա մասին խոսի:
-Իսկ, ընդհանուր առմամբ, կուսակցության դիրքորոշումն ինչպիսի՞ն է ԱԱԾ ստուգումների առնչությամբ:
-Հանրապետական կուսակցությունը մշտապես բոլոր անօրինականություններին դեմ է եղել եւ բոլոր օրինականությունների ջատագով է եղել: Ամեն ինչ պետք է լինի օրենքի շրջանակներում. ե՛ւ իրավապահների, ե՛ւ քաղաքական ուժերի գործողությունները: Օրենքը պետք է գերակա լինի բոլորի համար:
-Իսկ Կարեն Կարապետյանն այլեւս կապ չունի՞ կուսակցության հետ:
-Կարեն Կարապետյանը կապ ունի կուսակցության հետ. գործադիր մարմնի անդամ է: Պարզապես Կ. Կարապետյանը խնդրել է, որպեսզի ինքը դուրս գա առաջին փոխնախագահի պաշտոնից, եւ մենք ըմբռնումով ու հարգանքով ենք ընդունել այդ որոշումը:
-Այսինքն՝ Կարապետյանը շարունակելո՞ւ է ՀՀԿ գործունեությանը մասնակցել:
-Համենայնդեպս, հինգշաբթի օրվա նիստին մասնակցել է:
-Բավական թվով անձինք դուրս են եկել կուսակցությունից: Նրանք, ըստ Ձեզ, գաղափարակիրնե՞ր էին, թե՞ այլ շահեր ունեին:
-Որակումներ չեմ ուզում տալ. մարդկանց իրավունքն է: Չեմ կարծում, որ իրավունք ունեմ որակում տալ. անմեղ են կամ մեղավոր: Ես կարող եմ իմ փոխարեն պատասխան տալ. ես ճիշտ եմ գտնում այսպես եւ այսպես եմ վարվում: Բայց յուրաքանչյուր մարդ ունի ճշմարտության իր պատկերացումները: Ես մի քանի անգամ ասել եմ, որ ժամանակն ամեն ինչի եւ ամեն մեկի պատասխանը կտա. ով է գաղափարական, ով չէ գաղափարական, ով էր ճիշտ, ով էր սխալ:
-Բայց ՀՀԿ կորիզը պահպանվո՞ւմ է:
-Այո: ՀՀԿ գործադիր մարմինը, քաղաքական կորիզը կա: Ինձ հարցնում էին, թե ի՞նչ պետք է անի Հանրապետականը հիմա. ես ասել եմ, որ Հանրապետականը քաղաքական կուսակցություն է, եղել է, կա ու կլինի: ՀՀԿ-ն կմնա որպես հայաստանյան քաղաքական դաշտի կարեւոր դերակատար: Փորձություններ կլինե՞ն. իհարկե կլինեն, քարքարոտ ճանապարհ կլինի՞. իհարկե կլինի: Քաղաքականությունը հաջողությունների եւ անհաջողությունների շղթա է: Եվ այդ իմաստով ես որեւէ արտառոց բան չեմ տեսնում ո՛չ մարդկանց հեռանալու,ո՛չ ընդդիմություն դառնալու, ո՛չ այս կամ այն իրավիճակի մեջ: Ի՞նչ է եղել: Եթե դու քաղաքականության մեջ ես, դու գաղափարի մարտիկ պետք է լինես, դու պետք է պայքարես: ՀՀԿ-ն ստեղծել է Աշոտ Նավասարդյանը` որպես անկախության մարտիկ, եւ ցանկացած կարգավիճակում ՀՀԿ-ն շարունակելու է լինել պետականության ջատագով կուսակցություն:
-Իրավական խնդիրները ազդեցի՞ն ՀՀԿ վարկանիշի վրա, եւ այս տարի արտահերթ խորհրդարանական ընտրությունների անցկացման դեպքում սա ինչպե՞ս կարող է անդրադառնալ:
-Կլինեն ընտրություններ, կտեսնենք:
-Իսկ վարկանիշի առումով ինչպե՞ս անդրադարձավ:
-Եթե տպավորություններով շարժվենք, կարող է լինել ճիշտ կամ սխալ: Դրա համար չեմ ուզում տպավորություններով գնահատել: Միգուցե եղավ ազդեցություն վարկանիշի վրա, միգուցե չեղավ: Վարկանիշն էլ այսօր կարող է բարձրանալ, վաղն` իջնել:
-Որոշ կուսակցություններ հայտարարել են, որ պատրաստ են ընտրություններին: Իսկ ՀՀԿ-ն պատրա՞ստ է:
-Չեմ կարծում, որ պետք է նայել` ՀՀԿ-ն պատրաստ է, թե պատրաստ չէ: Արտահերթ ընտրությունների անցկացումը պետք է լինի քաղաքական համաձայնության շրջանակներում: Ընտրությունները պատվերով համերգ չեն: Պայմանավորվածություն ձեռք կբերվի, կքննարկենք: Շատ բան կախված է ԸՕ բարեփոխումներից:

«ՀՀԿ ԼՔԵԼԸ` ՈՆՑ ՈՐ ԼՔԵՍ ՈՉ ՄԻ ԲԱՆԸ»

Փաստաբան Արսեն Մկրտչյանը 2009թ. ՀՀԿ անդամ է: Սակայն մինչեւ այժմ առանձնապես աչքի չի ընկել քաղաքական գործունեությամբ: Փաստաբանը վերջերս հանրությանն առավել հայտնի դարձավ` ստանձնելով պատգամավոր Մանվել Գրիգորյանի պաշտպանի պարտականությունները: «Ժողովուրդ» օրաթերթը զրուցել է Արսեն Մկրտչյանի հետ` իր քաղաքական գործունեության վերաբերյալ:

-Պարո՛ն Մկրտչյան, ինչ-որ խնդիր կա՞, որ Դուք` որպես կուսակցական, ակտիվ չեք եղել քաղաքական դաշտում:
-Ես երբեք չեմ զբաղվել ակտիվ քաղաքականությամբ: Հանրապետական կուսակցությունն էլ ինձ համար կամ իմ ընտանիքի համար որեւէ լավ բան արած չունի: Ես եմ եղել կուսակցության համար, կուսակցությունն ինձ համար երբեք չի եղել: Կուսակցությունն ինձնից միայն վերցրել է, ոչ մի բան չի տվել ինձ:
-Բայց Դուք դեռ շարունակում եք ՀՀԿ-ական լինել:
-Ես հիմա ուղղակի իմաստ էլ չեմ տեսնում ՀՀԿ-ից դուրս գալու, որովհետեւ այսօր ՀՀԿ-ից դուրս գալը ոնց որ ԽՄԿԿ-ից դուրս գաս: Դա արդեն էժան PR-ի կնմանվի` ՀՀԿ-ից դուրս գալը: ՀՀԿ չկա այլեւս, էլ ՀՀԿ չլինելը որն է: Պատկերացնում եք` եթե ես հիմա, Մանվել Գրիգորյանին պաշտպանելով, ՀՀԿ-ի տոմսը հանձնեմ: Ես երբեք չեմ դավաճանել, ես երբեք շուռ չեմ եկել այն գաղափարներից, այն իդեալներից, որոնք ՀՀԿ կանոնադրությունը, կուսակցությունը պահել է: Բայց ՀՀԿ վերնախավն անձամբ ինձ համար որեւէ բան արած չունի: Հիմա ինչ ասեմ` դուրս եմ գալիս մի կառույցից, որի գոյությունը դե ֆակտո ինձ համար չկա: Ես չեմ համարում, որ ՀՀԿ-ն այսօր գործում է, չեմ համարում, որ ՀՀԿ-ի հետ կարելի է հույսեր կապել: ՀՀԿ վերնախավն իմ նկատմամբ անձամբ միշտ դրսեւորել է այնպիսի վերաբերմունք, ինչպես, օրինակ, Ձեր, ինչպես ցանկացած ուրիշ քաղաքացու նկատմամբ: Իսկ ես Հանրապետականի հանդեպ միշտ ունեցել եմ պարտականություն եւ համարել եմ, թե դա նորմալ է: Ես կուսակցության ոչ մի բանից չեմ օգտվել:
-Իսկ եղե՞լ է, որ դիմեք ՀՀԿ-ին աջակցության համար, բայց Ձեզ ոչնչով չօգնեն:
-Ես դրա համար չեմ եղել կուսակցությունում, որ ինձ ինչ-որ մի բանով օգնեն: Բայց երբ կուսակցությունում քննարկվում էր ընտրությունների ցուցակների հարցը, ես հայտարարել եմ, որ ցանկություն ունեմ Ազգային ժողովում հայտնվել, եւ ՀՀԿ-ն անգամ քննարկման առարկա չի դարձրել դա: Ես հասկանում էի, որ ՀՀԿ-ում այնպիսի գործընթացներ են գնում, որ կադրային քաղաքականությունը վարվում է վատից էլ ավելի վատ, ես փորձում էի ինչ-որ մի բանով օգտակար լինել, ստեղծել բարոյական մարդու կերպար, նորմալ մարդու կերպար, որը ժողովրդի կողմից էլ է ընկալելի, զբաղվում է իր գործով, բայց այդպես չեղավ: Հանրապետականում ավելի ուրախ էին ցուցակների մեջ ընդգրկել այն մարդկանց, ովքեր 15 հատ կուսակցություն արդեն փոխել էին, բայց կարող էին գումարային առումով ձայներ բերել, հետաքրքիր լինել:
-Այսինքն՝ մտածել են, որ Դուք չե՞ք կարող ձայներ ապահովել:
-Դե ես ո՞վ եմ եղել ՀՀԿ-ի համար, ես անվճար իրավաբանական օգնություն ցույց տվող ՀՀԿ-ական էի, ո՞ւմ էի ես պետք, կամ հիմա էլ ՀՀԿ-ին կարող է պետք լինեմ:
-Իսկ այն, որ հիմա շատերը լքում են ՀՀԿ-ն, Ձեզ համար սպասելի՞ էր:
-Այսօր ՀՀԿ-ն լքելը` ոնց որ լքես ոչ մի բանը: ՀՀԿ չկա: Ո՞նց կարելի է լքել մի բանը, որը չկա: Ո՞ւր գնամ ես դիմումս գրեմ: ՀՀԿ-ն ինչ է անում, որ մի հատ էլ լքես էդ ՀՀԿ-ն: Այսօր ՀՀԿ հասկացություն ես չեմ տեսնում: Եթե Ձեզ թվում է` մնացել են երկու փոխխոսնակ կամ մի քանի պատգամավոր, ու դրանով Հանրապետական կուսակցությունը պետք է պահվի, ես այդպես չեմ կարծում: ՀՀԿ-ն դա ժողովուրդն էր, դա այն մարդիկ էին, ովքեր իսկական պատրիոտներ էին, եկել էին, ՀՀԿ-ի գաղափարները լրիվ ուրիշ գաղափարներ էին: Ես ՀՀԿ-ից մի պատճառով դուրս չեմ գալիս. որ չասեն, թե ուշադրություն է ուզում գրավի: Այսօր ես չեմ տեսնում այն մարդկանց, այն կորիզը, որ կար 10 տարի առաջ: Եթե 10 տարի առաջ հավատ կար, ձգտումներ կային, հիմա ո՛չ պատգամավորության ձգտումներ կան, ո՛չ քաղաքականությամբ զբաղվելու:

Նյութերը` ՄԵՐԻ ՄԱՐՏԻՐՈՍՅԱՆԻ

ԱՆՎՏԱՆԳՈՒԹՅՈՒՆԻՑ ԴՐԴՎԱԾ
ՀՀ երրորդ նախագահ Սերժ Սարգսյանը դեռ մի փոքր էլ անտուն կմնա: Կառավարության աշխատակազմի ղեկավար Էդուարդ Աղաջանյանը տեղեկացրել է, որ տան տրամադրման հետ կապված աշխատանքները դեռեւս ընթանում են, իսկ հիմնական խնդիրը կապված է անվտանգության ապահովման հետ: «Որեւէ առանձնահատուկ բան չկա, պարզպաես պետգույքում համապատասխանող անշարժ գույք չկա այս պահին: Համապատասխանող նկատի ունեմ նախորդ երկու նախագահներին տրամադրված առանձնատների տրամաբանության մեջ որեւէ գույք չկա, այդ իսկ պատճառով տարբերակներ են քննարկվում, որպեսզի պետությունն ինչ-որ գույք գնի Սերժ Սարգսյանի համար»,-«Ժողովուրդ» օրաթերթի հետ զրույցում նշեց նա: Դիտարկմանը` մինչ այս եղե՞լ են տարբերակներ, որոնք Սերժ Սարգսյանի կողմից մերժվել են, Աղաջանյանը պարզաբանեց. «Իրականում առաջարկներ եղել են: Օրինակ՝ մի առաջարկ է եղել, որի շուրջ անվտանգության աշխատակիցներն են բացասական կարծիք հայտնել: Այնպես չէ, որ Սերժ Սարգսյանն ասում է` սա վատն է, կամ իմ համար քիչ է, ավելի շատ անվտանգության խնդիրներից ելնելով են այդ առաջարկները մերժվում, բայց ես կարծում եմ` մոտ օրերս ինչ-որ բան կգտնենք»:

ՄԻԼԻՈՆԱՆՈՑ ՄԻՋՈՑԱՌՈՒՄՆԵՐ
Երեւանի քաղաքապետարանը ամռան երեք ամիսներին տոնական միջոցառում անցկացնելու նպատակով քաղաքային բյուջեից նախատեսում է ծախսել 34 մլն դրամ` մոտ 70 հազար դոլար: Օրինակ՝ «Երեւանյան ամառ 2018 հունիս» մշակութային միջոցառման համար, որն արդեն կայացել է, ծախսել է մոտ 14 մլն դրամ: Կազմակերպվել են ֆիլմերի ցուցադրություն, համերգներ: Իսկ ահա «Երեւանյան ամառ 2018 հուլիս» մշակութային միջոցառումը նախատեսվում է անցկացնել հուլիսի 9-ին, Կարապի լճում կկազմակերպվի «Ոսկե ծիրան» միջազգային կինոփառատոնի ընտրված ֆիլմերի բացօթյա ցուցադրություն: Այս միջոցառման համար կծախսվի մոտ 4 մլն դրամ: Բացի այս, «Ժողովուրդ» օրաթերթը պաշտոնական փաստաթղթերից տեղեկացավ, որ օգոստոսին կկազմակերպվի երկու միջոցառում` մինչեւ օգոստոսի 13-ը եւ 31-ին: «Երեւանյան ամառ 2018 օգոստոս» մշակութային միջոցառումների շրջանակում, մինչեւ օգոստոսի 13-ը, Ազատության հրապարակում կկազմակերպվի DJ, բենդերի մասնակցությամբ 4 ժամ տեւողությամբ համերգային ծրագիր, որի համար կծախսվի մոտ 8 մլն դրամ: Նույնքան կծախսվի նաեւ օգոստոսի 31-ին Կարապի լճի տարածքում համերգային ծրագրի համար:
Նկատենք, որ Երեւանի քաղաքապետարանում կարծես թե չեն ըմբռնում երկրում տեղի ունեցած փոփոխությունները, եւ շարունակում են շռայլ ծախսերը, այն էլ` մեծ գումարներ են ծախսում անիմաստ ծրագրերի վրա: