Իռլանդական «Ryanair» լոուքոսթերի` Հայաստան մուտք գործելու մասին լուրը մտահոգել է հայկական ավիաընկերություններին: Կարճ ասած` կառավարության` իռլանդական լոուքոսթերի նկատմամբ ցուցաբերած չափից ավելի ուշադրությունը նեղացրել է հայկական ավիաընկերություններին:
Այս եւ այլ թեմաների շուրջ «Ժողովուրդ» օրաթերթը զրուցեց «Տարոն Ավիա» ընկերության կոմերցիոն տնօրեն Լեւոն Քարամյանի հետ:
-Պարո՛ն Քարամյան, իրատեսական համարո՞ւմ եք այն տեղեկությունը, ըստ որի` պետության կողմից սուբսիդավորում է լինելու մի ուղեւորի համար:
-Ինձ թվում է` դա իրատեսական է: Այո, որովհետեւ հակառակ պարագայում իրենք չէին համաձայնի մուտք գործել: Չեմ կարծում, որ միայն օդի տուրքի չեղարկումը իրենց համար բավարար նախադրյալներ է ստեղծել, որ իրենք չվերթներ իրականացնեն: Դա մյուս լոուքոսթ ավիաընկերությունների նման, ինչպիսին, օրինակ, «Պոբեդան» է, նորից սկզբնական շրջանում գների մակարդակը ցածր կպահի, հետո մրցակցություն չունենալու պարագայում արհեստականորեն կբարձրացնի:
-Իսկ Ryanair-ի գործունեությունը կոնկրետ ի՞նչ ազդեցություն կունենա Ձեր ղեկավարած ընկերության գործունեության վրա: Այս դեպքում արդյոք վնաս կկրե՞ք, թե՞…
-Հաշվի առնելով այն հանգամանքը, որ մենք այս պահին չվերթներ չենք իրականացնում, մեր վրա այն ոչ մի ազդեցություն չի թողնելու:
-Ի՞նչն է պատճառը, որ ընկերությունը չվերթներ չի իրականացնում:
-Մենք չվերթներ չենք իրականացնում այլ` անհավասար մրցակցային պատճառներով: Քանի որ մենք թռիչքներ ենք իրականացնում դեպի Ռուսաստանի Դաշնության քաղաքներ, գիտեք, այնտեղի օդանավակայաններում խտրական գներ են տեղական եւ օտարերկրյա ավիափոխադրողների համար:
Այսինքն` գործում է երկու տիպի սակագին, մեկը` տեղական, մյուսը` օտարերկրյա ավիափոխադրողների համար: Ու հայկական ավիափոխադրողները դիտարկվում են որպես օտարերկրյա եւ սպասարկվում են ավելի բարձր սակագներով, քան իրենց տեղական ավիաընկերությունները:
-Պարո՛ն Քարամյան, այս խնդրից Քաղաքացիական ավիացիայի կոմիտեն տեղյա՞կ է, թե՞ ոչ: Եթե այո, ապա ի՞նչ է ձեռնարկել:
-Մենք բազմիցս այդ խնդրի մասին բարձրաձայնել ենք, բայց բավարար արձագանք չկար: Մենք ինքներս ենք դիմել Եվրասիական տնտեսական հանձնաժողովին ու բարձրաձայնել ենք այդ խնդիրը, իրենք համաձայնել են մեզ հետ, որ, իրոք, այդ խնդիրը կա, ու խոստացել են, որ մոտ ժամանակներս այդ խնդրին կանդրադառնան: Այսինքն` օդանավակայաններում սակագները կբերեն համահավասարեցման, բայց դա երբ կլինի ու ինչ սկզբունքով, այսինքն` մեր գները կնվազեն, թե իրենցն էլ կբարձրանան, չեմ կարող ասել: Հանձնաժողովը կարճ ժամանակահատվածում մեզ պատասխանեց. խոստացել են, որ այս խնդիրը կներառվի իրենց գործունեության ճանապարհային քարտեզում, եւ որքանով ես տեղյակ եմ, արդեն մի երեք-չորս օդանավակայաններում այդ համահավասերցումը տեղի է ունեցել: Բայց այդ օդանավակայանները մեզ չեն հետաքրքրում գործունեության տեսանկյունից:
-Երբ ընկերությունը թռիչքներ չի իրականացնում, ի՞նչ չափի վնասներ է կրում:
-Դե, բնական է, վնաս է այն առումով, երբ թռիչքներ էինք իրականացնում, մեր աշխատակազմը մոտ 90 հոգի էր, հիմա մինչեւ քսան է:
-Ճի՞շտ հասկացա` կրճատումներ են եղել:
-Դե իհարկե…
-Պարո՛ն Քարամյան, արդյոք ընկերությունը վնասներ կրե՞ց` ամռանը Եգիպտոսի Հուրգադա քաղաքում առանց հետադարձ թռիչքի մնացած մեր հայրենակիցներին բավականին էժան գներով տեղափոխելով Հայաստան:
-Մենք ընդառաջ գնացինք մեր կառավարության խնդրանքին. մեր ընկերության սեփականատերը բարի կամքի դրսեւորում ցուցաբերեց եւ, իհարկե, ինքնարժեքի սահմանված ցածր գնով կազմակերպեց այդ թռիչքը:
-Բայց ստացվում է, որ Դուք այսօր կառավարության կարիքն ունեք, իսկ գործադիրը դանդաղում է:
-Հա, այդ նույն արտոնությունները, որոնք հիմա արտոնել են Ryanair-ին, մենք այդ արտոնությունների մասին տարիներ շարունակ բարձրաձայնել ենք, որ այդ 10 հազար դրամի տուրքը հանեն, որ ստեղծեն բարենպաստ պայմաններ, դա չի արվել: Իսկ հիմա ինչ-որ օտարերկրյա ավիաընկերության մուտքը ապահովելու համար արվում է այդ քայլերը, ու վերջում հայտարարվում է, որ այդ պայմանները վերաբերում է բոլոր ավիաընկերություններին` ե՛ւ տեղական, ե՛ւ օտարերկրյա: Եթե կարելի է համեմատություն անել, բայց դա նույնն է, ինչպես ասում են, Զատիկից հետո ներկած ձուն պետք չէ:
-Պարո՛ն Քարամյան, նաեւ ավիաընկերություններ կան, որոնք դժգոհում են «Զվարթնոց» օդանավակայանի կողմից սահմանած վառելիքի բարձր սակագնից: Դուք նման խնդիր ունեցե՞լ եք:
-Վառելիքի գինը «Զվարթնոց» օդանավակայանում միշտ էլ բարձր է եղել, քան դրսի օդանավակայններում: Ու մենք մեր թռիչքները իրականացնելու ժամանակահատվածում ձգտում էինք դրսից մաքսիմալ քանակության նավթ լցնել, իսկ դա ազդում էր օդանավի օգտակար բեռնվածության վրա:
Զրուցեց Սյունէ Համբարձումյանը
.gif)
