Տակնուվրա են արել Արամ Վարդանյանի՝ «Վստրեչի Ապերի» տունը․ ինչ է կատարվել գիշերը

ArmLur.am-ի տեղեկություններով՝ երեկ գիշեր արտառոց իրավիճակ է տեղի ունեցել «Վստրեչի Ապեր» մականունով հայտնի հեղինակություն Արամ Վարդանյանի տանը։ Երեկոյան իրավապահները մտել են վերջինիս տուն, ըստ էության, խուզարկություն անելու նպատակով։ Իրավապահների մոտ օրինական խուզարկություն թույլտվության  որևէ փաստաթուղթ չի եղել։ Սակայն դա խոչընդոտ չի հանդիսացել, որ  տակնուվրա անեն Արամ Վարդանյանի տունը, զենք պահեն այդ պահին տանը  գտնվող երեխայի վրա։

Իրավիճակի մանրամասներին անդրադարձել է Արամ Վարդանյանի փաստաբան  Լուսինե Սահակյանը՝ սոցցանցի իր էջում հայտնելով․

«Այսօր, գիշերը ժամը 02.40-ի սահմաններում, ոստիկանության հարյուրավոր աշխատակիցների կողմից տեղի է ունեցել հարձակում Արամ Վարդանյանին և նրա հարազատներին պատկանող Արցախի փողոցի 17 հասցեում գտնվող տների վրա։ Ոստիկանության հարյուրավոր աշխատակիցներ շրջափակել են նշված հասցեում գտնվող բազմաթիվ տները, ապօրինի, առանց թույլտվության, ոչինչ չբացատրելով, որևէ փաստաթուղթ չներկայացնելով, կոտրելով դռներն ու պատուհանները, հատուկ սարքերի միջոցով կտրելով ճաղավանդակները, ներխուժել են նշված տները, որի ընթացքում նաև կատարել հափշտակություն։ Անգամ տանը մանկահասակ երեխայի առկայությունը չի կանգնեցրել ոստիկաններին շարունակել զենքի օգտագործմամբ ապօրինությունները, որի հետևանքով երեխայի առողջությանը պատճառվել լուրջ վնաս։ Վերոհիշյալ ապօրինությունների հետ կապված, նույն հասցեում՝ Արցախի փողոց թիվ 17/8, այսօր ժամը 14.00- ին հրավիրում ենք մամուլի ասուլիս»։