«Տելեկոմ Արմենիա» ՓԲԸ-ի (Beeline ապրանքանիշ) աջակցությամբ մայիսի 8-ին կայացել է «DigiCode 2021» կիրառական ծրագրավորման հանրապետական 6-րդ պատանեկան մրցույթի եզրափակիչ փուլը։ Այս տարի մրցույթին ուղարկվել է մասնակցության 748 հայտ, որոնցից 69 թիմ իրենց աշխատանքներով ներկայացան եզրափակչին։ Եվս 19 աշակերտ մասնակցեց «Կրիայ» օլիմպիադային, որի ընթացքում նրանց առաջարկվեց լուծել բազմազան մաթեմատիկական խնդիրներ։ «Աշխատանքիս երկրորդ լավագույն մասը «Արմաթ» լաբորատորիաների բացումն է, իսկ առաջինը՝ տեսնելն է, թե ինչպես են մեր այդ լաբորատորիաների լավագույն սովորողները ելույթ ունենում պետական մասշտաբի մրցույթներում՝ «Արմաթ» ինժեներական լաբորատորիաներում դասավանդվող բոլոր ուղղություններով»,- նշեց ԱՏՁՄ գործադիր տնօրեն Րաֆֆի Քասարջյանը։
«Թվային կրթությունը այսօր անհրաժեշտ է բոլորի համար, եւ մենք՝ որպես տեխնոլոգիաների ոլորտում աշխատող ընկերություն, ուրախ ենք մասնակցել այս ծրագրին, ոգեշնչել մեր երիտասարդներին, խրախուսել նրանց հետաքրքրությունը դեպի նորագույն տեխնոլոգիաները: Վստահ եմ, որ նրանցից շատերը ապագայում լավ մասնագետներ կդառնան ու հաջողությունների կհասնեն», -նշել է «Տելեկոմ Արմենիա» ՓԲԸ-ի գլխավոր տնօրեն Հայկ Եսայանը:
Ժյուրիի կազմում ընդգրկված էին VXsoft ընկերության ներկայացուցիչներ Ռուբեն Մանուկյանը եւ Վլադիմիր Պողոսյանը, «Թիմ Տելեկոմ Արմենիա» ընկերության UNIX համակարգերի ավագ մասնագետ Թադեւոս Բաղդասարյանը, Հայաստանի ամերիկյան համալսարանի ներկայացուցիչներ Սաթենիկ Մնացականյանը եւ Հայկ Ներսիսյանը, ԱՏՁՄ վարչության անդամ, «Ինստիգեյթ» ընկերության համահիմնադիր Արման Պողոսյանը, X-Tech ընկերության համահիմնադիր Արման Աթոյանը, ԲՏԱ նախարարի խորհրդական Հայկ Ասլանյանը, «Արմաթ» ԻԼ ներկայացուցիչ Սեդրակ Վարդանյանը։ Նշենք, որ «Դիջիկոդ» մրցույթն ԱՏՁՄ ամենամյա միջոցառումներից է, որի հիմնական նպատակներն են խրախուսել եւ զարգացնել դպրոցականների ալգորիթմական մտածողությունը, աշակերտներին խաղ սպառողից վերածել խաղ ստեղծողի եւ բացահայտել տաղանդավոր պատանիներին՝ նրանց հնարավորություն տալով զարգացնել ստեղծագործական ունակությունները։
Այս տարի 8 անվանակարգերում հաղթողներ են ճանաչվել՝
Նարեկ Մարտիրոսյանը («Համակարգչային խաղեր», մինչեւ 13 տ., Գյումրու թիվ 6 հիմնակա նդպրոց),
Գարիկ Առաքելյանը («Համակարգչային խաղեր», 13 տ. բարձր, Էջմիածնի ԻԷՄ կենտրոն),
Դավիթ Ղազարյանը եւ Սամվել Ղազարյանը («Գծագրություն եւ դիզայն», Մասիսի թիվ 4 հիմնական դպրոց),
Հայուհի Միքայելյանը եւ Էմմա Մանուկյանը («Ուսուցողական խաղեր», մինչեւ 13 տ., Գավառի թիվ 5 հիմնական դպրոց),
Սամվել Աղաբաբյանը («Ուսուցողական խաղեր», 13 տ. բարձր, Մարալիկի արհեստագործական ուսումնարան),
Նարեկ Սարգսյանը եւ Գեւորգ Սարգսյանը («Սարքերի ինտեգրում», Ֆիզմաթ դպրոց)։
«Կրիայ» ծրագրով լավագույն ալգորիթմական լուծում օլիմպիադիայում հաղթել են Գագիկ Արշակյանը (մինչեւ 13 տ., Բերդի թիվ 3 հիմնական դպրոց) եւ Գրիգոր Գրիգորյանը (13 տ. բարձր, Ֆիզմաթ դպրոց)։
Գլխավոր հովանավոր՝ VXsoft ընկերություն, հովանավոր՝ «Տելեկոմ Արմենիա» ընկերություն (Beeline ապրանքանիշ), գործընկեր՝ Հայաստանի ամերիկյան համալսարան։
.gif)
