Տավուշի մարզպետարանից հաղորդում են, որ մարզպետարանի առողջապահության եւ սոցիալական ապահովության վարչության կողմից ամփոփվել են Իջեւանի, Դիլիջանի, Բերդի եւ Նոյեմբերյանի սոցիալական ծառայության տարածքային գրասենյակներում իրականացվող անապահովության գնահատման համակարգում ընտանիքների փաստագրման աշխատանքները: Պարզվել է, որ 2011թ. սեպտեմբեր ամսին մարզում փաստագրվել է 443 ընտանիք, մինչդեռ 2010թ. սեպտեմբերին փաստագրվել էր 502-ը: Առողջապահության եւ սոցապ վարչության գլխավոր մասնագետ Նարինե Ճաղարյանը հայտնեց, որ աշխատանքների իրականացման ընթացքում առաջանում են մի շարք խնդիրներ, որոնց պատճառով ոչ բոլոր ընտանիքներն են կարողանում փաստագրվել: Ընտանիքների անդամների մի մասն ունի բնակչության պետական ռեգիստրում փաստացի բնակության վայրում հաշվառվելու խնդիրներ, մի մասը` ընտանիքի, բացակայող անդամի վերաբերյալ անհրաժեշտ տեղեկատվություն ներկայացնելու անհարմարություն եւ այլն: Հավելենք, որ տարեցտարի նվազում է ընտանեկան նպաստ եւ միանվագ դրամական օգնություն ստացողների թիվը, որի պատճառով եւս նվազում է փաստագրվողների քանակը: Ի՞նչ իմաստ ունի ժամանակ կորցնել անհրաժեշտ փաստաթղթեր հավաքելու եւ փաստագրվելու համար, եթե նպաստ չես ստանալու:
.gif)
