ՊԵԿ մաքսային աշխատակիցներն ազատման դիմումներ են գրում. «Հրապարակ»

«Հրապարակ» օրաթերթը գրում է. ՊԵԿ մաքսային տերմինալների 54 աշխատակիցները, որոնք բողոք-նամակ էին հղել ՊԵԿ նախագահ Ռուստամ Բադասյանի դեմ՝ պահանջելով հերքել կամ ներողություն խնդրել «Հրապարակին» տված հարցազրույցում ասածների համար, իսկ նա ասել էր, թե իրենք 5-10 հազար դրամով «շնորհակալություններ» են ընդունում, նամակի պատասխանը չեն ստացել։

Սակայն այն ստորագրողների մի մասը դիմում է գրել ու ազատվել։ Մեկը ՊԵԿ Արարատյան մաքսատուն-վարչության բացթողումային բաժնի պետ Թաթուլ Մարանյանն է, որն առաջինն էր ստորագրել եւ ազատվել է «սեփական դիմումի համաձայն»։ Նա մեզ ասաց․ «Նամակի պատասխանը չի եկել, ես էլ, իմ դիմումի համաձայն, դուրս եմ եկել էդ համակարգից։ Հիմա ազատ, հանգիստ ման եմ գալիս, կյանքն եմ վայելում»։

Նա նշեց, որ իր հետ միասին ազատման դիմում են գրել ու համակարգից դուրս եկել ՊԵԿ Արարատյան մաքսատուն-վարչության պետ Կարեն Բաբայանը ու եւս մոտ տասը հոգի։ Իրենց հեռանալն ու Շուշանիկի հեռացումը փոխկապակցվա՞ծ էին։ «Չեմ կարող ասել, չգիտեմ։ Ես դիմումս գրել եմ, ուզում եմ իմ ներվերի հաշվին հանգիստ, խախանդ ապրել, որովհետեւ չեն գնահատում, չի կարելի էդպես։ Էդքան բան»,- նեղսրտած ասաց նախկին պաշտոնյան։

Ամբողջական հոդվածը կարող եք կարդալ օրաթերթի այսօրվա համարում