Էկոնոմիկայի նախարար Վահան Քերոբյանը հոկտեմբերի 16-ին ԱՄԷ մայրաքաղաք Աբու Դաբիում Համաշխարհային ներդրումային 8-րդ համաժողովի շրջանակում հանդիպել է Սաուդյան Արաբիայի ներդրումների նախարարի տեղակալ Բաքեր Ալհաբուբի հետ։ Հանդիպմանը ներկա է եղել նաև «Ներդրումների աջակցման կենտրոն» հիմնադրամի տնօրեն Լևոն Օհաննեսյանը։
Հանդիպման ընթացքում կողմերը քննարկել են երկու երկրների միջև համագործակցության ու ներդրումային ծրագրերի իրականացման հնարավորությունները, մասնավորապես՝ արդյունաբերության, արևային էներգիայի, ՏՏ և զբոսաշրջության ոլորտներում։
Ընդգծելով Հայաստանի աշխարհագրական բարենպաստ դիրքը՝ նախարարը նշել է, որ Հայաստանը կարող է կամուրջ հանդիսանալ Մերձավոր Արևելքի և ԵԱՏՄ անդամ-երկրների միջև։
Ներկայացնելով Հայաստանում «չոր նավահանգիստ» ստեղծելու նախագիծը՝ նախարարն առաջարկել է դիտարկել նաև այս ուղղությամբ համագործակցության հնարավորությունները։
.gif)
