«Հայաստանը չի միացել ԵՄ խորհրդի սահմանափակող միջոցների վերաբերյալ որոշմանը». ԱԳՆ

ԵՄ խորհրդի՝ դեկտեմբերի 4-ի սահմանափակող միջոցների վերաբերյալ որոշմանը ՀՀ-ն չի միացել: Այդ մասին լուրը ArmLur.am-ին հաստատում են ՀՀ ԱԳՆ-ից:

«Ելնելով արտաքին քաղաքական առաջնահերթություններից և ԵՄ հետ գործընկերության շրջանակներում՝ ՀՀ-ն դիտարկում և հաճախ միանում է ԵՄ հայտարարություններին՝ ցուցաբերելով իր աջակցությունն ու համերաշխությունը դրանցում արծարծվող հարցերի վերաբերյալ:

Կոնկրետ ԵՄ խորհրդի դեկտեմբերի 4-ի սահմանափակող միջոցների վերաբերյալ որոշմանը (2023/2721) ՀՀ-ն չի միացել, ինչպես դա երևում է նաև ԵՄ խորհրդի դեկտեմբերի 17-ի հաղորդագրությունից»,- ասված է ԱԳՆ-ի հայտարարության մեջ:

Հիշեցնենք, որ երեկ ԵՄ արտաքին քաղաքական ծառայության ղեկավար Ժոզեպ Բորելը հայտարարություն էր տարածել, ըստ որի՝ ԵՄ կազմի մեջ չմտնող 11 երկրներ, այդ թվում՝ Հայաստանը և Ադրբեջանը, միացել են «Մագնիտսկու եվրոպական ցուցակի» հերթական՝ մեկ տարով երկարաձգելու մասին ԵՄ Խորհրդի որոշմանը, որոնք Բրյուսելը սահմանել է «մարդու իրավունքների լուրջ խախտումների» մեղադրանքով:

Այս հայտարարությանը զուգահեռ ԵՄ արտաքին քաղաքականության ծառայությունը հրապարակել է ևս երկուսը` գրեթե նույն տեքստով` ԿԺԴՀ-ի դեմ պատժամիջոցների երկարաձգման և Մերձդնեստրի ղեկավարության դեմ պատժամիջոցների վերաբերյալ ԵՄ խորհրդի որոշումներին ԵՄ անդամ չհանդիսացող երկրների միանալու մասին: ԿԺԴՀ-ի դեմ պատժամիջոցներին միացել են նույն երկրները, բացի Հայաստանից և Ադրբեջանից, գումարած Սերբիան և Վրաստանը: Մերձդնեստրի դեմ պատժամիջոցներին չեն միացել Ադրբեջանը, Հայաստանը, Իսլանդիան, Սերբիան։