Ամենաարդյունավետ բնական միջոցները գլխացավն առանց դեղորայքի մեղմելու համար

Գլխացավն ամենատարածված խնդիրներից է, որը կարող է պայմանավորված լինել ամենատարբեր պատճառներով, այդ թվում՝ սթրեսով, հոգնածությամբ, առողջական որոշակի խնդիրներով և այլն։ Նման տհաճ զգացողությունները կարող են խիստ բացասաբար անդրադառնալ մարդու կյանքի որակի վրա, ուստի զարմանալի չէ, որ մարդիկ փորձում են հնաարվորինս շուտ ազատվել ցավից։

Գլխացավերը մեղմելու համար մարդիկ սովորաբար ցավազրկող դեղամիջոցներ են ընդունում, սակայն լինում են դեպքեր, երբ ցավը կտրուկ է ի հայտ գալիս, իսկ ցավազրկող միջոց ձեռքի տակ չի լինում։ Բացի այդ, շատերը պարզապես խուսափում են ցավազրկողներից, քանի որ դրանք բավական լուրջ կողմնակի բարդություններ են առաջացնում, իսկ հաճախակի գործածության դեպքում կարող են դադարել օգնել։ Նման դեպքերում օգնության են հասնում փորձված բնական միջոցները, որոնք օգնում են շատ արագ մեղմել ցավն ու կանխել խնդրի կրկնությունը։ Ճիշտ միջոցների կիրառման դեպքում գլխացավից հեշտությամբ կարելի է ազատվել անգամ առանց դեղորայքի, ուստի ձեր ուշադրությանն ենք ներկայացնում այդ միջոցներից մի քանիսը։

Խառնել հավասար քանակությամբ երիցուկի մանրացրած ծաղիկները, անանուխի տերևները, հոռոմ-սամիթի պտուղներն ու կատվախոտի արմատը, այնուհետև ստացված խառնուրդի 2 ճաշի գդալը լցնել թերմոսի մեջ, ավելացնել կես լիտր եռման ջուր ու թրմել 30 րոպե։ Ստացված թուրմը հարկավոր է խմել օրվա ընթացքում։
2 ճաշի գդալ լորենու ծաղիկներին ավելացնել 2 բաժակ եռման ջուր և 10 րոպե դնել թույլ կրակին։ Ստացված թուրմը հարկավոր է խմել օրական 4 անգամ 1/2 բաժակ։
1 ճաշի գդալ չորացրած սրոհունդին ավելացնել մի բաժակ եռման ջուր, դնել թույլ կրակին ու եռացնել 10 րոպե այնուհետև թրմել ևս 30 րոպե։ Ստացված թուրմը քամել և խմել օրական 3 անգամ 1/4 բաժակ։
1 ճաշի գդալ չորացրած խնկածաղկին ավելացնել 300 մլ եռման ջուր, մեկ ժամ թրմել որևէ տաք տեղում, այնուհետև քամել և խմել օրական 3 անգամ 1/2 բաժակ։

Գլխացավերի դեպքում շատ արդյունավետ կարող է լինել բռնչիի հատապտուղների թարմ հյութը։ Նույնքան արդյունավետ են նաև սև հաղարջի ու ելակի թարմ հյութերը։ Բացի այդ, կարելի է նաև թունդ կանաչ թեյ խմել, որը գլխացավերի ու անգամ միգրենի դեմ պայքարի հիանալի բնական միջոց է։
Այս պարզ բնական միջոցները կարող են շատ արդյունավետ լինել գլխացավերի դեմ պայքարում, սակայն հարկ է հիշել, որ որոշ դեպքերում նման ցավը կարող է պայմանավորված լինել առողջական որոշակի խնդիրներով, ուստի մինչ դրանց դեմ պայքարելը հարկավոր է նախ բուժզննում անցնել ու բացառել վտանգավոր հիվանդությունները։ Բացի այդ, հարկ է հիշել, որ նման բնական միջոցներն ունենում են որոշակի հակացուցումներ և ինքնաբուժությունը կարող է շատ տհաճ հետևանքներ ունենալ, ուստի առաջին հերթին հարկավոր է դիմել բժշկին: Լուրջ խնդիրների դեպքում միայն փորձառու մասնագետը կկարողանա պարզել գլխացավերի առաջացման պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru