«ՆՈՐ ԶՈՎՔ»-Ի ԱՆՎԱՆ ԲԻԾԸ ՄԱՔՐՎԵ՞Ց «ԻՄ ՔԱՅԼԻ» ՇՆՈՐՀԻՎ

Սկանդալային իրադարձությունը «Նոր Զովք» սուպերմարկետի սեփականատերերին մտերմացրեց իշխանությունների հետ։

Բանն այն է, որ 2023 թվականի մարտին բացահայտվել էր «Նոր Զովք» ՍՊ ընկերությունում առերեւույթ հարկային չարաշահումներ կատարելու, տեղեկատվական տեխնոլոգիաների կիրառմամբ իրացման շրջանառությունն առանձնապես խոշոր չափերով նվազ ցույց տալու միջոցով հարկային պարտավորությունները չկատարելու հանցավոր մեխանիզմի մի շարք էական հանգամանքներ։

Մասնավորապես՝ «Նոր Զովք» ՍՊ ընկերության խանութների ցանցում ներդրվել է առեւտրային ծրագիր, որը համակցվել է թաքցված էլեկտրոնային սերվերային համակարգի։

«Նոր Զովք» ՍՊԸ-ի խանութների ցանցում ներդրված այդ ծրագրի եւ էլեկտրոնային սերվերային համակարգի գործարկման արդյունքում «Նոր Զովք» ՍՊ ընկերության իրացման իրական շրջանառությունը՝ վաճառված ապրանքների դիմաց փաստացի ստացված գումարը, իրական վաճառքների վերաբերյալ տեղեկությունը կուտակվել է էլեկտրոնային սերվերային համակարգում, իսկ կիրառված հանցավոր համակարգը քողարկելու նպատակով «Նոր Զովք» ՍՊ ընկերության խանութների ցանցից առեւտուր իրականացնող գնորդներին տրամադրվել են արտաքին (առեւտրային) ծրագրի միջոցով գեներացված, փաստացի վճարված գումարներին համապատասխան կտրոններ։

2019-2023 թվականների ընթացքում ընկերության փաստացի իրացման շրջանառությունից հարկային մարմին ժամանակահատվածի վերաբերյալ հաշվարկ-հաշվետվություններում պակաս է ցույց տրվել իրացման շրջանառությունը, որի հետեւանքով չի հաշվարկվել եւ պետական բյուջե չի վճարվել 2 մլրդ 205 մլն ՀՀ դրամ ավելացված արժեքի հարկ եւ 1 մլրդ 921 մլն ՀՀ դրամ շահութահարկ:

Միլարդավոր դրամներ պետությանը չվճարած ընկերության ղեկավարը, որը նախկին իշխանության ներկայացուցիչ լինելով՝ թիրախավորվել էր ՔՊ-ականների կողմից, Աննա Հակոբյանի երեկույթին մասնակցելով՝ փորձել է «մաքրել» անվան բիծը։

Հոկտեմբերի 31-ին ՀՀ վարչապետ Նիկոլ Փաշինյանի տիկնոջ՝ Աննա Հակոբյանի «Իմ քայլը» հիմնադրամի առաջին նվիրատուների շարքը պակաս կասկածելի եւ խնդրահարույց չէ, որքան ՔՊ կուսակցության դրամահավաքը։

Եթե ՔՊ կուսակցության դրամահավաքի նվիրատուները նվիրատվություն էին արել 1 մլն դրամ եւ ավելի, սակայն դրա մասին տեղյակ չէին եղել, ապա «Իմ քայլը» հիմնադրամի ընթրիքի նվիրատվությունը ակնհայտորեն արտոնությունների ակնկալիք կամ ներողամտության ակնկալիք էր, ինչպես «Նոր Զովք»-ի դեպքում։ Աննա Հակոբյանի հետ ընթրելու էր եկել նաեւ «Նոր Զովք» սուպերմարկետների ցանցի փոխտնօրեն Ռաֆայել Խաչատրյանը։

ԷՄՄԱ ՄԻՔԱՅԵԼՅԱՆ

ՍՆՆԴԱԿԱՐԳՈՒՄ ՉՊԵՏՔ Է ԼԻՆԵՆ ԷՆԵՐԳԵՏԻԿ ԸՄՊԵԼԻՔՆԵՐ

Էներգետիկ ընպելիքները պարունակում են մեծ քանակությամբ կոֆեին, շաքար, նյութափոխանակության վրա ազդող խթանիչ նյութեր: Երեխաների սննդակարգում դրանք չպետք է տեղ ունենան, վստահեցնում է մանկաբույժ Մարինա Մելքումովան։

Էներգետիկ ըմպելիքների վնասակար ազդեցությունը`

զարկերակային ճնշման բարձրացում,

սրտի աշխատանքի արագացում,

տագնապի զգացողություն, անհանգստություն,

քնի խանգարում, անքնություն,

ջրազրկում,

ծայրահեղ դեպքերում՝ մինչեւ սրտի ռիթմի խանգարում, երիկամների սուր անբավարարություն,

ցնցումներ:

Դպրոցահասակ երեխաների առողջության վարքագծի հետազոտության (2022թ.) տվյալներով` Հայաստանում դեռահասների 40%-ը շաբաթվա ընթացքում օգտագործում է էներգետիկ ըմպելիք։