Մեր կուսակցությունը գիտե՞ք, որով մասնակցելու ենք ընտրություններին ՝ «ԲՔ», հապավում է, բայց չեմ ասի՝ ինչ է նշանակում․ Վարդան Ղուկասյան

ArmLur.am-ի զրուցակիցը Գյումրու նախկին քաղաքապետ Վարդան Ղուկասյանն է, որը մտադիր է Գյումրու համայնքապետի ընտրություններում իր թեկնածությունն առաջադրել։

-Պարո՛ն Ղուկասյան, Նիկոլ Փաշինյանը, Գյումրիում, կարծես, խաղի կանոններ է փոխում։ Նախ հայտարարեցին, որ իրենց թեկնածուն Կարեն Սարուխանյանն է, հիմա էլ ասում են, որ ՔՊ-ն պետք է նախնական ընտրություններ անի ու համայնքապետի ԺՊ ընտրի։

-Ես չեմ ճանաչում Կարեն Սարուխանյանին, սպասում եմ, տեսնեմ՝ ի՞նչ են անելու։

Չգիտեմ, ինչ կադրեր ունեն, Գյումրու ՔՊ կառույցում այնպիսի մարդ չկա, որ 10-ից ավել ձայն ունենա։

-Դե իշխանությունների հիմնական թեկնածուները նախկին փոխքաղաքապետ Վահագն Մկրտչյանն է՝ վարչապետի տիկնոջ ազգականը ու Կարեն Սարուխանյանը։

-Շատ ուժեղ են, հալալ լինի, Վահագն Մկրտչյանին ճանաչում եմ, նրա ընտանիքին, լավ մարդիկ են։

-Պարո՛ն Ղուկասյան, իսկ ինչո՞ւ Նիկոլ Փաշինյանը հանկարծ մտափոխվեց ու որոշեց ԺՊ նշանակել։

-Ես ի՞նչ իմանամ, ինչ լինում է իրենք Ձեզ են ասում, ամեն ինչ Ձեր տակն է։

Մի բան գիտեմ, որ Գյումրում քաղաքապետերին մտնում, հարցնում էին՝ ո՞նց եք, ասում էին՝ էգուց կուգաք կասեմ, այսինքն՝ պետք է տերերին հարցնեին, նոր պատասխանեին, ժողովուրդը անունները դրել էին «էգուց կուգաք, կասենք»։

-Իսկ Ձեր շանսերը ո՞նց եք գնահատում, ըստ Ձեզ՝ որքա՞ն ձայն կհավաքեք։

-Եթե դրեցի, միանշանակա 50 տոկոս կհավաքեմ, դա քիչ է անգամ, դրա համար ամեն ինչ անում են, որ ընտրություններ չլինի, հետո ամեն ինչ կանեն, որ իմ ճանապարհը փակեն, գլխիս սարքեն։

-Այսինքն Ձեզ վրա ճնշումնե՞ր կգործադրեն։

-Ինչ ասես՝ կանեն, կապրենք՝ կտեսնենք՝ ինչ բան է դեմոկրատիան, ամեն ինչ էլ հնարավոր է, մինչ հիմա գիշեր-ցերեկ դատ ու դատաստանի մեջ եմ, բայց պետք է գնամ մինչև վերջ։ Ես իրենցից չեմ վախում, միայն Աստծուց եմ վախում։

-ՔՊ-ն էլ է բայց վստահ, որ հաղթելու են, ո՞նց եք պայքարելու իրենց դեմ։

-Շատ լավ է, թող դնեն իրենց թեկնածությունը, կուզեի՝ Բալասանյանն էլ առաջադրեր։

-Ինչո՞ւ, ուզում եք հաղթե՞լ բոլորին։

-Կտեսնեինք՝ ով, ով է։ Մեր կուսակցությունը գիտե՞ք, որով մասնակցելու ենք ընտրություններին ՝ «ԲՔ», հապավում է։

-Իսկ ի՞նչ է նշանակում այդ հապավումը, ինչպե՞ս է բացվում այն։

-Գաղտնիք է, հետո կասեմ։

Քրիստինա Մուշեղյան