ԸՆՏՐՈՒԹՅՈՒՆՆԵՐՈՒՄ ՔՊ-Ն ՈՂՋ ՌԵՍՈՒՐՍԸ ԳՈՐԾԻ ԿԴՆԻ

ՔՊ-ականները լծվել են Գյումրու արտահերթ ընտրություններում հաղթանակ ապահովելու գործին:

Գյումրիում ավագանու արտահերթ ընտրությունները, ըստ սահմանված ժամկետների, կանցկացվեն մարտի 30-ին:

Իշխանականները դեկտեմբերի 8-10-ն անցկացված primaries-ից (ներկուսակցական ընտրություններ) հետո անցել  են իրենց օգտին ձայներ հավաքելու «սուրբ» գործին: ՔՊ-ական պատգամավորները եւ տեղի ակտիվը պարբերաբար հանդիպումներ են ունենում գյումրեցիների հետ, նրանց խնդիրներով հետաքրքրվում ու փորձում են, ձայն կորզելու նպատակով, սիրաշահել նրանց:

Ավելին՝ «Ժողովուրդ» օրաթերթի տեղեկություններով՝ Նիկոլ Փաշինյանն իր թիմակիցներին ասել է, որ Գյումրիում հաղթելը կենաց-մահու խնդիր է, ու յուրաքանչյուր ոք պետք է իր ներդրումն ունենա հաղթանակի գործում:

Իշխանականներից ոմանք ակնարկել են, որ Գյումրիում իրենց վարկանիշը ցածր է, ինչը ապացուցեց նաեւ նախնական ընտրություններում անկուսակցական, ՔՊ-ի հետ կապ չունեցող Սարիկ Մինասյանի հաղթանակը, սակայն հրահանգվել է ողջ ռեսուրսը գործի դնել:

ՔՊ-ում հույսը դրել են Սարիկ Մինասյանի վրա, որը վերջերս ՔՊ-ին անդամակցելու դիմում է գրել եւ համայնքապետի ընտրությունների ժամանակ էլ գլխավորելու է ցուցակը:

«Էյր Արաբիա»-ն փորձեց համագործակցել Հայաստանի հեղափոխական Կառավարության հետ. վճարեց 10 միլիարդ դրամ եւ ընկավ դատարանի դռները։

ԱՆԻՖ-ի՝ «Հայաստանի պետական հետաքրքրությունների ֆոնդ» ՓԲԸ-ի ամենամեծ նախագծերից մեկը՝ «Ֆլայ Արնան», պիտի լիներ հեղափոխություն հայկական ավիացիոն ոլորտում։ Սակայն գործընթացն ավարտվեց բացասական նոտայի վրա. ծրագիրը կյանքի չկոչվեց, իսկ «Էյր Արաբիա»-ն դատի տվեց ՀՀ Կառավարությանը։ Բանն այն է, որ երբ «Էյր Արաբիա»-ն իր ցանկում ավելացնում է եւս մեկ ուղղություն, այն պետք է համապատասխանի որոշակի ներքին կանոնադրական կետերի. դրանք են պարենային ապահովվածությունը, անվտանգության երաշխիքները, Երկրի վրա դիրքը, ռելիեֆը եւ այլ կետեր։

ԱՆԻՖ-ի, այսինքն՝ Հայաստանի եւ «Էյր Արաբիայի» բանակցությունների ժամանակ Նիկոլ Փաշինյանը, փաստացի, բանավոր տվել է բոլոր երաշխիքները «Էյր Արաբիայի» ներկայացուցիչներին, հարմարվել է բոլոր կետերի հետ, անգամ անվտանգության երաշխիքներ է տվել՝ միայն թե սկսվի համագործակցությունը: «Էյր Արաբիա»-ն, հավատալով ՀՀ Կառավարության ազնվությանը, ներդրել է 10 մլրդ դրամ, 10 մլրդ դրամ էլ Հայաստանն է ներդրել. ընդհանուր ներդրվել է 20 մլրդ դրամ, իսկ ծրագիրը տապալել են։ Մարտի 20-ին վարչապետ Նիկոլ Փաշինյանը Ազգային ժողովում Կառավարության հետ հարցուպատասխանի ժամանակ հայտարարեց, թե պետական մասնակցությամբ ավիաընկերության ծրագիրը ձախողվել է: Ըստ նրա՝ ավիաընկերության հիմնադրումից հետո շուկայի կոնյուկտուրան որոշակի փոփոխություն էր կրել, նոր ընկերություններ էին հայտնվել, եւ Fly Arna-ն մրցակցությանը չէր դիմացել:

ԱՆԻՖ-ի ձախողումների մասին Ազգային ժողովի ամբիոնից «Հայաստան» խմբակցության պատգամավոր Աննա Գրիգորյանը ե՛ւ վարչապետ Նիկոլ Փաշինյանին, ե՛ւ ՀՀ ֆինանսների նախարար Վահե Հովհաննիսյանին կոնկրետ հարցադրումներ էր արել, թե ինչպես է տապալվել ծրագիրը, եւ ինչի մասին այն կարող է վկայել։

Գրիգորյանը, մասնավորապես, ասել էր. «Պարո՛ն Հովհաննիսյան, երբ գալիս ասում եք՝ «ամեն դրամը, ա՛յ հերոս հարկատու, մենք էֆեկտիվ ենք օգտագործելու», առնվազն մի դրվագով ապացուցվում է, որ Դուք չեք կարողանում էֆեկտիվ օգտագործել մեր հարկատուների վճարած գումարները։ Ես հնարավորություն եմ ունեցել Նիկոլ Փաշինյանին էլ հարցնելու: Նույն ԱՆԻՖ հիմնադրամում տասնյակ քաղաքացիներ աշխատել են եւ ամսական ստացել են միջինը 10,000 դոլար։ 10,000 դոլար աշխատավարձ են ստացել, պարգեւավճար են ստացել, դա էլ հերիք չէ՝ իրենց հիմնական գործառույթները գումարով արտապատվիրակել են մի այլ կազմակերպության, որ իրենց փոխարեն այդ գործն իրականացնի։ Այդքանով հանդերձ իրենք խնդիր ունեին՝ ԱՆԻՖ հիմնադրամը նորմալ աշխատեցնելու. 5 տարի հետո փակվում է այդ հիմնադրամը։ Հաջորդը. այդ նույն ԱՆԻՖ հիմնադրամով Fly Arna կազմակերպությունն է ստեղծվում ու Նիկոլ Փաշինյանը, այս ամբիոնում կանգնած, ինձ պատասխանում էր, ասում էր՝ գիտեք, պրոտեկցիոնիզմով պետք է զբաղվեինք, նախընտրեցինք չանել։ Ուրեմն, այդ ժամանակահատվածում բոլոր ավիաընկերությունները միայն պլյուսով էին դուրս գալիս, չէ՞, պարոն Սուքիասյան, միակ կազմակերպությունը, որի արդյունքում փակվում է, Fly Arna-ն է, եւ դա էլ հերիք չէ, քանի որ ինքը համագործակցում էր Air Arabia-ի հետ, մեզ դատի են տվել հիմա դրա համար։ Եվ, փաստացի, Արաբական Միացյալ Էմիրությունների հետ ԱՆԻՖ-ով երկու հիմնական պրոյեկտ ունեինք՝ Fly Arna-ն եւ «Մասդար»-ը: Երկուսն էլ տապալվել են, ու սա ոչ միայն գումարներ վատնելու մասին է, այլ նաեւ մեր ներդրումային գրավչության զրոյացման»,- ԱԺ-ում նոյեմբերի 13-ին ասել էր Աննա Գրիգորյանը։

Ավելի վաղ՝ ամռանը, Արաբական Air Arabia ավիաընկերությունը պատրաստվում էր արբիտրաժային գործընթաց սկսել Հայաստանի դեմ։ Այդ մասին հայտնել էր Global Arbitration Review-ն։ Պատճառը հայկական Fly Arna ավիաընկերությունն էր, որի սեփականատերերից մեկը հենց Շարջայից թռիչքներ իրականացնող Air Arabia ավիաընկերությանը փոխկապակցված International Business Company (FZE)-ն էր։

«Հետքը» գրել էր, որ «Հայկական ազգային ավիաուղիներ» ՓԲԸ-ն, որն առավել հայտնի է Fly Arna անունով, հունվարի 16-ից թռիչքներ չի իրականացնում: Այս ավիաընկերությունը ստեղծվել էր հայ-արաբական համագործակցության արդյունքում։ Դրա 49 %-ը պատկանում էր «Հայաստանի պետական հետաքրքրությունների ֆոնդ» ՓԲԸ-ին (ԱՆԻՖ), որը պետական հիմնադրամ էր եւ ներկայում գտնվում է լուծարման փուլում։ 49 %-ն էլ պատկանում էր Air Arabia ավիաընկերությանը: Մնացած 2 %-ի սեփականատերը ՀՀ քաղաքացի Վարուժան Ներգիզյանն էր, որը ծնունդով Հալեպից է եւ աշխատում է Արաբական Միացյալ Էմիրությունների, Լիբանանի եւ Մերձավոր Արեւելքի այլ երկրների բիզնես ոլորտներում:

Ավիաընկերության վերջին ինքնաթիռը փետրվարի 26-ին Երեւանից թռել էր Շարջա, ապա դուրս բերվել օդանավերի հայկական ռեգիստրից։ Ստացվում է, որ Հայաստանը «Էյր Արաբիային» վստահեցրեց եւ, խոսակցական ձեւով ասած, «գցեց» ավիաընկերությանը։

Սա պատմություն է, որը վկայում է Հայաստանում պետական մակարդակով կոռուպցիոն շղթաների գործունեության, խաբեության մասին։

Այսօր Երեւանի ավագանին կավարտի աշխատանքը: Տարեվերջյան այսօրվա նիստում քննարկվելու են համայնքի 2025 թվականի բյուջեն եւ զարգացման ծրագիրը: «Ժողովուրդ» օրաթերթի հետ զրույցում ավագանու ընդդիմադիր՝ «Ազգային առաջընթաց» խմբակցության քարտուղար Իզաբելլա Աբգարյանը նշում է՝ անընդունելի են համարում, որ համայնքի զարգացման ծրագիրը չզեկուցվող ֆորմատով է այսօր քննարկվելու: Նրա խոսքով՝ նիստի ժամանակ պահանջելու են բաց ֆորմատով քննարկել հարցը: Երեւանի ավագանու նիստում կառաջարկվի նաեւ  նոր նախագիծ, որով մինչեւ 2025 թվականի փետրվարի 1-ը նոր փաթեթների հետ միաժամանակ կպահպանվի մեկ երթեւեկության համար նախատեսված 100 դրամանոց արժեքը՝ բացառապես էլեկտրոնային եղանակով՝ Tellcell Wallet-ով, վճարային տերմինալներով ձեռք բերված թղթային QR տոմսերով, ինչպես նաեւ բանկային քարտերով։

ՀՀ արդարադատության նախարարության ենթակայության տակ գտնվող 3 կարեւոր կառույց այս պահին առանց ղեկավարի է։ Մասնավորապես՝ պրոբացիոն ծառայության, քրեակատարողական ծառայության եւ հարկադիր կատարման ծառայության պետերի պաշտոնները։ «Ժողովուրդ» օրաթերթին հասած լուրերի համաձայն՝ ՀՀ արդարադատության նախարար Սրբուհի Գալյանը ներքին կարգով ասել է, որ մինչեւ այդ ոլորտը համակարգող տեղակալ չնշանակի, տվյալ ոլորտում պետ չի նշանակելու: Այս տեղեկությունը փորձեցինք պարզել արդարադատության նախարարությունից, որտեղից ի պատասխան՝ արդարադատության նախարարի մամուլի քարտուղար Ծովինար Խաչատրյանը հայտնեց. «Նման խոսակցությունները իրականությանը չեն համապատասխանում, ու նախարարը նման բան երբեւէ չի ասել»։