Այսօր շարունակվել է ԼՂ նախկին ղեկավարության գործով շինծու դատաքննությունը. երբ որոշում կկայացվի

Բաքվի դատարանում այսօր շարունակվել է Արցախի ռազմաքաղաքական ղեկավարության գործով շինծու, կեղծ «դատավարությունը»։

Բաքվի դատարանը հաջորդ նիստին՝ հունվարի 27-ին, որոշում կկայացնի խափանման միջոց կալանքը տնային կալանքով փոխարինելու միջնորդության վերաբերյալ: Այս մասին հայտնում են ադրբեջանական ԶԼՄ-ները։

Բավքում ապօրինաբար կալանքի տակ են գտնվում նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, Ազգային ժողովի նախագահ Դավիթ Իշխանյանը, նախկին պետնախարար Ռուբեն Վարդանյանը, Պաշտպանության բանակի նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը և նախկին արտգործնախարար Դավիթ Բաբայանը:

Ռուբեն Վարդանյանի գործն առանձնացվել է և ընթանում է առանձին վարույթով: Չնայած իր գործի նյութերը մյուսների հետ միավորելու նրա խնդրանքին, դատարանը որոշել է 422 հատորներից 400-ը առանձին դիտարկել: Նրա գործով դատական նիստը կշարունակվի հունվարի 27-ին: