Ադրբեջանում դատում են Լեռնային Ղարաբաղից տեսանյութ հրապարակած հայտնի ռազմական փորձագետին

Բաքվի Նիսամիի շրջանային դատարանը պետական ​​գաղտնիք հանդիսացող տեղեկություններ հրապարակելու մեջ մեղադրվող և նախորդ տարվա նոյեմբերին կալանավորված հայտնի ռազմական փորձագետ Ադալեթ Վերդիևի քրեական գործով նախապատրաստական ​​խորհրդակցություն է իրականացրել։

Ինչպես հաղորդում է «Արմենպրես»-ը, այս մասին հայտնում է ադրբեջանական ԱՊԱ լրատվական գործակալությունը։

Որոշվել է դատական նիստն անցկացնել փակ ձևաչափով։ Պատճառը քրեական գործում պետական ​​գաղտնիք հանդիսացող տեղեկատվության առկայությունն է։ Դատական ​​նիստը նշանակվել է մարտի 19-ին։

Տեղեկության համաձայն՝ 2024թ. նոյեմբերի 22-ին Լենային Ղարաբաղի տարածքներում կազմակերպված մեդիա շրջագայության ժամանակ Ադալեթ Վերդիևը, որը որպես ռազմական փորձագետ մասնակցել է մեդիաշրջագայությանը, տեսանյութ է նկարահանել, որում երևում են բարձունքները, որտեղ գտնվում են Ադրբեջանի մարտական դիրքերը, սահմանապահ զորքերի տեղակայման վայրերը, և իր մեկնաբանությունների ուղեկցությամբ դրանք հրապարակել սոցցանցային հարթակում։

Ըստ Ադրբեջանի իրավապահ մարմինների՝ նա, օգտագործելով իր պաշտոնեական լիազորությունները, ծանր հետևանքներով լուրջ վնաս է հասցրել Ադրբեջանի շահերին։

Հավաքված ապացույցների հիման վրա Ադալեթ Վերդիևին մեղադրանք է առաջադրվել Ադրբեջանի քրեական օրենսգրքի 284.1 (պետական ​​գաղտնիքի հրապարակում) և 308.2 (պաշտոնեական լիազորությունների չարաշահում, որն առաջացրել է ծանր հետևանքներ) հոդվածների հատկանիշներով։