Պահքի սեղան․ Ղալլեն՝ բուսական և ավանդական․ ինչպե՞ս պատրաստել այն

Այսօր Մեծ Պահքի երրորդ օրն է։ Այն տեւում է 48 օր՝ Բուն Բարեկենդանից մինչեւ Սուրբ Հարության տոն (Զատիկ)։

Պահքի շրջանում օգտագործում են բացառապես բուսական ծագում ունեցող սննդամթերք:

Ուստի՝ ArmLur.am-ը Մեծ Պահքի ողջ ընթացքում կներկայացնի բուսական կերակրատեսակներ, որոնք կարելի է ուտել պահքի ժամանակ։

Ղալլեն (Ղալլե)
Ղալլենը Արեւմտյան Հայաստանի Արաբկիր քաղաքի խոհանոցին պատկանող պասուց ուտեստ է։ Այն լավագույն տարբերակներից է պահքի ժամանակ՝ ե՛ւ ավանդական է, ե՛ւ ամբողջովին բուսական։
Ղալենը պատրաստվում է ձավարով (կոպիտ բլղուրով) եւ բողկով։ Համեմվում է սոխով, ձեթով, չոր ռեհանով, կարմիր պղպեղով եւ աղով։
Պատրաստման համար անհրաժեշտ է կտրտած բողկը եփել աղաջրի մեջ, ավելացնել ձավարը եւ շարունակել եփել, ապա սոխառած անել ձեթով, խառնել փլավին եւ համեմել չոր ռեհանով, աղով ու կարմիր պղպեղով։

Միշտ հիշե՛ք․ պահքի ընթացքում հրաժարվում են ոչ միայն որոշակի կերակուրներից, այլև մոլի սովորություններից, շատախոսությունից, ստախոսությունից, հայհոյանքից և այլ մեղքերից: Կերակրից հրաժարվելն առանց մեղքից հետ կանգնելու` անիմաստ ու անօգուտ է, որովհետեւ «սատանան միշտ պահքի մեջ է, ոչինչ չի ուտում, բայց մեղք գործելուց չի դադարում եւ չի հոգնում» (Սուրբ Գրիգոր Տաթեւացի):

Միշտ հիշե՛ք․ պահք պահում ենք մենք մեզ համար, մեր մեղքերից, վատ սովորություններից ազատվելու համար, այլ ոչ ցուցադրության համար։ Մատթեոս 6։16-18-ում գրված է․ «Երբ ծոմ պահեք, տրտմերես մի լինեք կեղծավորների նման, որոնք իրենց երեսներն այլանդակում են, որպեսզի մարդկանց այնպես երևան, թե ծոմ են պահում, ճշմարիտ եմ ասում ձեզ, այդ իսկ է նրանց վարձը, այսինքն` մարդկանց երևալը և նրանցից գովվելը: Այլ երբ դու ծոմ պահես, օծի քո գլուխը և լվա քո երեսը, որպեսզի չերևաս մարդկանց ծոմ պահող, այլ քո Հորը, գաղտնաբար, և քո հայրը, որ տեսնում է, ինչ որ ծածուկ է, կհատուցի քեզ»:

Նանիկ Աղասյան