Թրամփը հայտարարում է՝ ԱՄՆ-Իրան հրադադարը դեռ ուժի մեջ է՝ Հորմուզի նեղուցում կրակոցների փոխանակումից հետո

ԱՄՆ նախագահ Դոնալդ Թրամփը հայտարարել է, որ ԱՄՆ-ի և Իրանի միջև հրադադարը շարունակում է գործել՝ չնայած Հորմուզի նեղուցում տեղի ունեցած ռազմական բախմանը, որի համար կողմերը միմյանց են մեղադրում։

ԱՄՆ-ի փոխանցմամբ՝ Իրանը հրթիռներով, անօդաչու սարքերով և փոքր նավակներով հարձակվել է ամերիկյան երեք ռազմական նավերի վրա։ Վաշինգտոնը միջադեպը որակել է որպես «չհրահրված հարձակում»։ Թրամփը հայտարարել է, որ Իրանը «խաղացել է ԱՄՆ-ի համբերության հետ»։

Իրանի բարձրագույն ռազմական հրամանատարությունը, իր հերթին, պնդել է, որ ամերիկյան ուժերը թիրախավորել են իրանական նավթատար և Հորմուզի նեղուցին մոտեցող մեկ այլ նավ, ինչպես նաև օդային հարվածներ հասցրել ափամերձ մի շարք շրջանների։

Լարվածության աճը տեղի է ունենում այն բանից հետո, երբ Իրանի ԱԳՆ-ն հայտարարել էր, թե քննարկում է ԱՄՆ-ի առաջարկը՝ պատերազմը դադարեցնելու վերաբերյալ։

Ուրբաթ վաղ առավոտյան ԱՄԷ-ի պաշտպանության նախարարությունը ևս հայտնել է, որ երկրի հակաօդային պաշտպանությունը հետ է մղում Իրանից արձակված հրթիռների և անօդաչուների հարձակումը։

Իրանական պետական լրատվամիջոցները նախ հաղորդել էին Հորմուզի նեղուցում «պայթյունների» մասին՝ դրանք նկարագրելով որպես «կրակոցների փոխանակում թշնամու հետ»։ Միաժամանակ, տեղական լրատվամիջոցները հայտնել են, որ պայթյուններ են լսվել նաև Թեհրանում։

Իրանի ռազմական հրամանատարության հայտարարության համաձայն՝ ԱՄՆ-ի «օդային հարձակումները» թիրախավորել են Բանդար Խամիրի, Սիրիկի և Քեշմ կղզու ափերը։ Թեհրանը պնդում է, որ անմիջապես պատասխանել է՝ հարվածելով ամերիկյան ռազմական նավերին և պատճառելով «զգալի վնաս»։

ԱՄՆ Կենտրոնական հրամանատարությունը հայտարարել է, որ իրանական ուժերը հարձակվել են հրթիռներով, անօդաչուներով և արագընթաց նավակներով այն պահին, երբ ամերիկյան կործանիչները անցնում էին նեղուցով։ Ըստ CENTCOM-ի՝ ԱՄՆ-ը ոչնչացրել է սպառնալիքները և հարվածել իրանական ռազմական օբյեկտներին, որոնք ներգրավված էին հարձակման մեջ։

Թրամփը Truth Social-ում գրել է, որ ԱՄՆ-ը ոչնչացրել է մի շարք փոքր նավակներ, հրթիռներ և անօդաչուներ՝ ընդգծելով, որ իրանական կողմը «մեծ վնասներ» է կրել։

Միաժամանակ նա կրկին նախազգուշացրել է, որ եթե Իրանը արագ չհամաձայնի խաղաղության պայմանավորվածությանը, ԱՄՆ-ը ապագայում «ավելի ուժեղ և ավելի կոշտ» հարվածներ կհասցնի։

BBC-ին իսրայելական աղբյուրը հայտնել է, որ վերջին բախումներում Israel-ը ներգրավվածություն չի ունեցել։

Միևնույն ժամանակ, Axios-ը հաղորդել էր, որ Սպիտակ տունը մոտ է Իրանի հետ 14 կետանոց հուշագրի համաձայնեցմանը, որը կարող է հիմք դառնալ հետագա միջուկային բանակցությունների համար։

Իրանի խորհրդարանի ազգային անվտանգության և արտաքին քաղաքականության հանձնաժողովի ներկայացուցիչ Էբրահիմ Ռեզային, սակայն, այդ հուշագիրը անվանել է «ցանկությունների ցուցակ»՝ հայտարարելով, որ Իրանը «մատը պահում է ձգանի վրա» և կպատասխանի կոշտ ձևով, եթե ԱՄՆ-ը չընդունի իր պայմանները։

Թրամփը նախկինում ևս հայտարարել էր, որ եթե Իրանը չհամաձայնի գործարքի, ապա ռմբակոծությունները կվերսկսվեն «շատ ավելի մեծ ինտենսիվությամբ»։ ԱՄՆ նախագահը նաև կրկնել է իր պնդումը, թե Իրանը համաձայնել է երբեք միջուկային զենք չունենալ, սակայն Թեհրանը պաշտոնապես չի հաստատել այդ հայտարարությունը։

Անի Վարդանյան