ԵՄ-ն մերժել է Գերմանիայի նախկին կանցլերի հնարավոր միջնորդությունը Ուկրաինայի բանակցություններում․ինչու՞

ԵՄ արտաքին քաղաքականության ղեկավար Կայա Կալասը մերժել է Ռուսաստանի նախագահի առաջարկը՝ նախկին Գերմանիայի կանցլեր Գերհարդ Շրյոդերին ներգրավել որպես միջնորդ Ուկրաինայի և Ռուսաստանի միջև հնարավոր խաղաղ բանակցություններում։

Կալասն այս մասին հայտարարել է Բրյուսելում ԵՄ արտաքին գործերի նախարարների հանդիպումից առաջ՝ ընդգծելով, որ նման տարբերակը անընդունելի է։

«Նախ՝ եթե մենք Ռուսաստանին տալիս ենք իրավունք՝ մեր անունից բանակցող նշանակելու, դա ամենախելամիտ քայլը չէ։ Երկրորդ՝ Գերհարդ Շրյոդերը փաստացի եղել է ռուսական պետական ընկերությունների բարձր մակարդակի լոբբիստ», – նշել է Կալասը։

Նրա խոսքով՝ Վլադիմիր Պուտինի նախընտրությունը Շրյոդերի նկատմամբ նշանակում է, որ վերջինս «կլիներ երկու կողմերի սեղանի մոտ»։

Ռուսաստանի նախագահը շաբաթ օրը առաջարկել էր Շրյոդերին որպես հնարավոր եվրոպական միջնորդ՝ պնդելով, որ Ուկրաինայի պատերազմը «ուղղվում է դեպի ավարտ»։

Հիշեցնենք, որ Շրյոդերը, որը Գերմանիայի նախկին կանցլերն է, երկար տարիներ պահպանել է սերտ կապեր Պուտինի հետ։ Նա մինչև 2022 թվականը եղել է ռուսական «Ռոսնեֆտ» ընկերության տնօրենների խորհրդի անդամ, ինչպես նաև աշխատել է «Գազպրոմ»-ի և «Nord Stream AG»-ի հետ կապված կառույցներում։

Ուկրաինան ևս մերժել է այս առաջարկը։ Ուկրաինայի արտաքին գործերի նախարար Անդրիյ Սիբիգան հայտարարել է․ «Ոչ, մենք դեմ ենք»։

Գերմանիայի Սոցիալ-դեմոկրատական կուսակցության արտաքին քաղաքականության ներկայացուցիչ Ադիս Ահմետովիչը, մինչդեռ, նշել է, որ առաջարկը պետք է քննարկվի եվրոպական գործընկերների հետ միասին՝ չբացառելով որոշ քննարկումներ։

Անի Վարդանյան