Լատվիայի վարչապետ Էվիկա Սիլինան հինգշաբթի օրը հայտարարել է, որ հրաժարական է տալիս պաշտոնից՝ փաստացի հանգեցնելով երկրի կառավարական կոալիցիայի փլուզմանը։ Քաղաքական ճգնաժամը տեղի է ունենում հոկտեմբերին նախատեսված խորհրդարանական ընտրություններից առաջ։
Վարչապետի անսպասելի հրաժարականը հաջորդել է ներքաղաքական լարվածության մի շարք զարգացումներին, այդ թվում՝ պաշտպանության նախարար Անդրիս Սպրուդսի հրաժարականին։ Վերջինս պաշտոնը լքել էր այն բանից հետո, երբ Ուկրաինայի անօդաչու սարքերն, որոնք շեղվել էին Ռուսաստանի տարածքից, ներխուժել էին Լատվիայի օդային տարածք, իսկ արձագանքը գնահատվել էր ուշացած։
Դրոնների միջադեպի ընթացքում մի քանի անօդաչու սարքեր հատել էին Լատվիայի սահմանը՝ ընկնելով Բալվի և Լուձա քաղաքների մոտակայքում։ Դրանցից մեկը առաջացրել էր հրդեհ նավթային պահեստում։ Թեև զոհեր չեն գրանցվել, բնակիչները նախազգուշացում ստացել էին դեպքից մոտ մեկ ժամ անց։
Լատվիայի իշխանությունները նշել են, որ անօդաչու սարքերը եղել են ուկրաինական ծագման, սակայն շեղվել են ռուսական գործողությունների հետևանքով։ Վարչապետ Սիլինան ավելի վաղ հայտարարել էր, որ այս միջադեպը ցույց է տվել պաշտպանության ոլորտում լուրջ բացեր և համակարգային թերություններ։
Միջադեպից հետո պաշտպանության նախարար Սպրուդսը հրաժարական էր տվել՝ ընդունելով, որ ոլորտում դեռևս կան լուծման ենթակա խնդիրներ։ Միևնույն ժամանակ նա ընդգծել էր, որ երկրի զինված ուժերը և դաշնակիցները պատրաստ են պաշտպանել Լատվիան։
Փորձագետների գնահատմամբ՝ երկրի օդային պաշտպանության համակարգում առկա են մի շարք խնդիրներ՝ ներառյալ ցածր թռիչքի բարձրության վրա գտնվող օբյեկտների հայտնաբերման սահմանափակումները, ինչպես նաև վաղ նախազգուշացման համակարգերի թերությունները։
Լատվիան, միևնույն ժամանակ, պատրաստվում է ուժեղացնել իր պաշտպանական կարողությունները՝ ԵՄ-ի միջոցով մոտ 3.49 միլիարդ եվրոյի վարկային ծրագրի շրջանակում։ Այդ միջոցները նախատեսվում է ուղղել օդային պաշտպանության համակարգերի, անօդաչու սարքերի և հակա-դրոնային տեխնոլոգիաների ձեռքբերմանը։
ՆԱՏՕ-ում Լատվիայի ներկայացուցիչները քննարկումներ են ունեցել դաշինքի ղեկավարության հետ՝ երկրի օդային պաշտպանության համակարգերի ամրապնդման և նոր տեխնոլոգիաների ներդրման շուրջ։
Անի Վարդանյան
.gif)
