ԵՄ-ին անդամակցելու դեպքում Հայաստանը կարող է կորցնել իր ինքնությունը, ինչպես «կորցրեց» կոնյակի անվանումը․ Վոլոդին

ՌԴ Պետդումայի նախագահ Վյաչեսլավ Վոլոդինը հայտարարել է, որ Եվրամիությանն անդամակցելու դեպքում Հայաստանը կարող է կորցնել իր ազգային ինքնությունը՝ ինչպես, իր խոսքով, արդեն կորցրել է «կոնյակ» անվանումն օգտագործելու իրավունքը։

«Վեստի» հեռուստաալիքին տված հարցազրույցում Վոլոդինը նշել է, որ Եվրամիությունը Հայաստանին խոստանում է տնտեսական աճ, ինչպես ժամանակին խոստացել էր Ուկրաինային։ Սակայն, նրա պնդմամբ, ուկրաինական արտադրանքը եվրոպական շուկաներում այդպես էլ լայն մուտք չի ստացել՝ մրցունակ չլինելու պատճառով։

«Իսկ ի՞նչ է վաճառելու Հայաստանը։ Գինին վաճառում են մեզ։ Եկավ Էմանուել Մակրոնը, գրկախառնվում էին Նիկոլ Փաշինյանի հետ, թող պայմանագիր կնքեն ու գինի մատակարարեն Ֆրանսիա։ Բայց չէ։ Նույնիսկ կոնյակն արդեն կոնյակ չէ, այլ բրենդի, որովհետև ֆրանսիացիներն ասացին՝ դա բրենդի է։ Նրանք կկորցնեն իրենց ինքնությունը այնպես, ինչպես այն կորցրին Ուկրաինայում»,– հայտարարել է Վոլոդինը։

ՌԴ Պետդումայի նախագահը միաժամանակ ընդգծել է, որ պետք է տարբերակել Հայաստանի ժողովրդին և երկրի ներկայիս իշխանություններին։

Նրա խոսքով՝ հենց իշխանություններն են, որոնք «երկիրը տանում են դեպի անդունդ»։ Վոլոդինը հավելել է, որ Ռուսաստանը շարունակում է աջակցել Հայաստանին և հայ ժողովրդին, սակայն դեմ է հարաբերություններում «ստին, երկակի ստանդարտներին և ոչ անկեղծությանը»։

«Մենք միայն ազնիվ, բաց հարաբերությունների և փոխշահավետ համագործակցության կողմնակից ենք։ Բարեկամությունը երկկողմանի երթևեկությամբ փողոց է»,– եզրափակել է նա։