Պուտինը Պետդումայի առաջիկա ընտրությունները անվանել է ամենակարևոր քաղաքական իրադարձությունը

Ռուսաստանի նախագահ Վլադիմիր Պուտինը հայտարարել է, որ առաջիկա ՊետԴումայի ընտրությունները երկրի համար ունեն «չափազանց կարևոր» նշանակություն և հանդիսանում են ներքաղաքական հիմնական իրադարձություններից մեկը։

Այս մասին նա ասել է Անվտանգության խորհրդի մշտական անդամների հետ անցկացված օպերատիվ խորհրդակցության ընթացքում, որտեղ քննարկվել են նաև ընտրական գործընթացի նախապատրաստման և հասարակական անվտանգության ապահովման հարցերը։

Խորհրդակցությանը զեկույցով հանդես է եկել Ռուսաստանի ներքին գործերի նախարար Վլադիմիր Կոլոկոլցևը։ Հանդիպմանը մասնակցել են նաև կառավարության, Դաշնային խորհրդի և այլ բարձր պետական կառույցների ղեկավարներ։

Պուտինի խոսքով՝ սեպտեմբերին կայանալիք ընտրությունները հատկապես կարևոր են երկրի քաղաքական համակարգի համար։ Ընտրությունների շրջանակում նախատեսվում է ընտրել նոր պատգամավորներ ՊետԴումայում։

Ռուսական ԿԸՀ-ի տվյալներով՝ ընտրությունները նախատեսվում է անցկացնել սեպտեմբերի 20-ին, իսկ որոշ տեղեկությունների համաձայն՝ քվեարկությունը կարող է տևել մինչև երեք օր։ Ընդհանուր առմամբ, ընտրական գործընթացի ընթացքում սպասվում է ավելի քան 2,2 հազար տարբեր մակարդակի ընտրական մրցապայքար, որի արդյունքում կբաշխվի շուրջ 20,7 հազար մանդատ և պաշտոն։

Ընտրական գործընթացի նախապատրաստական փուլում շեշտը դրվում է հասարակական կարգի պահպանման և անվտանգության ապահովման վրա։

Թարգմանությունը՝ Անի Վարդանյանի