G7 գագաթնաժողով․ առաջնորդները խոստանում են «անվերապահ աջակցություն» Ուկրաինային

Ֆրանսիայի Էվիան քաղաքում ընթացող G7 գագաթնաժողովի երրորդ և վերջին օրը շարունակվում է։ Երեկ երեկոյան անդամ երկրների առաջնորդները համատեղ հայտարարությամբ վերահաստատել են իրենց «անվերապահ աջակցությունը Ուկրաինային՝ իր ազատության, ինքնիշխանության և տարածքային ամբողջականության պաշտպանության գործում»։

Հայտարարության մեջ ընդգծվում է, որ Ուկրաինայի դիմադրողականությունը թույլ է տվել նոր դինամիկա ստեղծել ռազմաճակատում, և այդ ընթացքը պահպանելու համար G7 երկրները կավելացնեն հակաօդային պաշտպանության միջոցների, միջամտող հրթիռների և հեռահար զինատեսակների մատակարարումները։

Բացի այդ, առաջնորդները նշել են, որ ԱՄՆ–Իրան վերջին համաձայնագիրը, որը վերաբերում է Հորմուզի նեղուցի վերաբացմանը, կարող է դառնալ հնարավորություն՝ «ուժեղացնելու ճնշումը Ռուսաստանի պատերազմական տնտեսության վրա»։ Այդ համատեքստում G7-ը նախատեսում է խստացնել պատժամիջոցները՝ ներառյալ նավթի և գազի ոլորտները։

Չինաստանի գործոնը՝ տնտեսական քննարկումների կենտրոնում

Գագաթնաժողովի շրջանակում քննարկվել է նաև համաշխարհային տնտեսական աճի և «հավասարակշռված, կայուն զարգացման» հարցը՝ Միջազգային արժույթի հիմնադրամի (IMF) և Տնտեսական համագործակցության և զարգացման կազմակերպության (OECD) մասնակցությամբ։

Գլխավոր մտահոգությունը շարունակում է մնալ Չինաստանը։ Ըստ զեկույցների՝ Պեկինի արտահանման վրա հիմնված տնտեսությունը նպաստում է գլոբալ անհավասարակշռություններին, իսկ OECD-ի տվյալներով՝ Չինաստանը իր արտադրությունը սուբսիդավորում է մինչև ութ անգամ ավելի շատ, քան զարգացած երկրները։

G7-ի ներկայացուցիչները նշել են, որ որոշ երկրներ արտադրում են չափազանց շատ, որոշները՝ քիչ, և այս անհավասարակշռությունը «վտանգավոր է համաշխարհային տնտեսության համար»։ Այս հարցը նախատեսվում է շարունակել քննարկել նաև G20 ձևաչափում։

Զելենսկի–Թրամփ հանդիպման հարցը

Գագաթնաժողովում դեռ բաց է մնում Ուկրաինայի նախագահ Վոլոդիմիր Զելենսկու և ԱՄՆ նախագահ Դոնալդ Թրամփի հնարավոր հանդիպման հարցը։

Չնայած սպասումներին, մինչ այժմ երկու առաջնորդների միջև պաշտոնական հանդիպում չի կայացել, բացառությամբ կարճ շփման՝ Ուկրաինային նվիրված աշխատանքային նիստի ժամանակ։

Ուկրաինական կողմի տեղեկություններով՝ հնարավոր է, որ հանդիպումը տեղի ունենա գագաթնաժողովի վերջին օրը։ Միևնույն ժամանակ, Թրամփը նախատեսում է մասնակցել Ֆրանսիայի նախագահ Էմանուել Մակրոնի կազմակերպած ընթրիքին՝ Վերսալի պալատում, որը նվիրված է ԱՄՆ անկախության 250-ամյակին։

Գերմանիա–Ուկրաինա պաշտպանական համագործակցություն

Գերմանական HENSOLDT ընկերությունը և ուկրաինական Fire Point-ը ստորագրել են փոխըմբռնման հուշագիր՝ նոր հակաբալիստիկ օդային պաշտպանության համակարգի մշակման համար։

Ծրագրի շրջանակում HENSOLDT-ը կզբաղվի ռադարային համակարգերի արտադրությամբ և ինտեգրմամբ, իսկ Fire Point-ը կլինի գլխավոր կապալառուն և պատասխանատու՝ համակարգի նախագծման և FP-7 հրթիռների փորձարկման համար։

Վոլոդիմիր Զելենսկին ամիսներ շարունակ կոչ է անում եվրոպական երկրներին զարգացնել սեփական հակահրթիռային պաշտպանական համակարգերը՝ ընդգծելով, որ արտադրական հնարավորությունները կան, սակայն գործընթացը դանդաղեցնում են թույլտվությունների բացակայությունը ԱՄՆ-ից։

ԱՄՆ–Իրան համաձայնագրի հիմնական կետերը

G7 շրջանակում շրջանառված տեղեկատվության համաձայն՝ Իրանը համաձայնել է երբեք չարտադրել միջուկային զենք՝ պատժամիջոցների ամբողջական չեղարկման դիմաց։

Համաձայնագիրը նախատեսում է պատերազմի դադարեցում բոլոր ճակատներում, այդ թվում՝ Լիբանանում, ինչպես նաև երկու կողմերի միջև ինքնիշխանության հարգում, Հորմուզի նեղուցում նավարկության ազատության վերականգնում և Իրանի սառեցված ակտիվների ապասառեցում։

Վերջնական համաձայնագիրը պետք է հաստատվի ՄԱԿ-ի Անվտանգության խորհրդի պարտադիր բանաձևով։

Հեղինակ՝ Անի Վարդանյան